1 Im ālikin men kein ilo jem̧ļo̧k in karuwalitōk iiō eo jarin tariņae ro im riko̧o̧t ro raar pojak n̄an pata, im kar jino wanlaļļo̧k im n̄an kaiur m̧aanļo̧k jān bat ko, im jān toļ ko, ilo āne jem̧aden, im jikin tariņae ko reppen aer, im jikin ko rettino aer, im kar jino bōk āneo, jim̧or kar ilo āneo irōk im ko raar ilo āneo iōn̄, im kar jino bōk aer aolep āne ko riNipai ro raar ilo̧k jān i, im jikin kwelo̧k ko kar likūt er bwe en ejjeļo̧k kobbaer.

2 A lo, eaar ejjeļo̧k mennin mour ko rawiia ak kakidudu ilo āne ko riNipai ro raar ilo̧k jān i, im eaar ejjeļo̧k kakidudu n̄an riko̧o̧t ro ijello̧kun wōt ilo āne jem̧aden.

3 Im riko̧o̧t ro rej jamin kar mour ijello̧kun wōt ilo āne jem̧aden, kōn ān̄den in m̧ōn̄ā; bwe riNipai ro raar likūt āne ko āneer ejjeļo̧k kobbaer, im kar ainļo̧k bwijin in sip ko aer im bwijin in mennin mour ko reļļap aer im aolep men ko m̧weieer, im raar pād ilo juon ānbwin.

4 Kōn menin, eaar ejjeļo̧k iaļ n̄an riko̧o̧t ro n̄an rakim im n̄an bōk m̧ōn̄ā, ijello̧kun wōt n̄e eaar n̄an wanlōn̄ļo̧k ilo lukkuun pata ņae riNipai ro; im riNipai ro kōnke raar pād ilo juon ānbwin, im kōnke raar kanooj ļap ilo oraer, im kar ko̧koņ n̄an er mennin aikuj ko, im o̧o̧j ko im kau ko, im bwijin in mennin mour ko reddik otemjeļo̧k, bwe ren maron̄ mour ium̧win oran in jiljilimjuon iiō, ilo iien eo raar kōjatdikdik n̄an ko̧kkure riko̧o̧t ro ļo̧k jān mejān āneo; im āindein karuwalitōk iiō eo eaar eļļā.

5 Im ālikin men kein ilo kajon̄oulruwatimjuon iiō eo Kiddianai eaar lo bwe eaar mennin aikuj bwe en wanlōn̄ļo̧k n̄an pata ņae riNipai ro, bwe eaar ejjeļo̧k iaļ bwe ren mour ijello̧kun wōt n̄e eaar n̄an rakim im ko̧o̧t im uror.

6 Im raar ekkōl im jab kajeeded er ioon mejān āneo jon̄an eo reban maron̄ kadek grain, n̄e riNipai ro raab itok ioer im m̧an er; kōn menin Kiddianai eaar leļo̧k naan in jiron̄ n̄an jarin tariņae ko an ilo iiō in ren wanlōn̄ļo̧k n̄an pata ņae riNipai ro.

7 Im ālikin men kein raar wanlōn̄ļo̧k n̄an pata; im eaar ilo allōn̄ eo kein kajiljino; im lo, eļap im nana kar raan eo raar wanlōn̄ļo̧k n̄an pata; im rekar kalkal ilo̧kan wāween ko an riko̧o̧t; im raar kōņak juon kilin lamb ipeļaakin ipier, im raar uno ilo bōtōktōk, im bōraer raar āl, im eaar wōr pinjān bōraer; im eļap im nana eaar jekjek in jarin tariņae ko an Kiddianai, kōnke nuknuk in tariņae ko aer, im kōnke raar uno ilo bōtōktōk.

8 Im ālikin men kein jarin tariņae ko an riNipai ro, ke raar lo jekjek in jarin tariņae ko an Kiddianai, raar aolep wōtlo̧k n̄an laļ, im kar kotak kūr ko aer n̄an Irooj aer Anij, bwe En kōjparok im kōtļo̧k er jān ilo pein rikōjdat ro aer.

9 Im ālikin men kein ke jarin tariņae ko an Kiddianai eaar lo men in raar jino lam̧ōj kōn juon ainikien eļļaaj, kōnke lan̄lōn̄ eo aer, bwe raar ļōmņak bwe riNipai ro raar wōtlo̧k kōn mijak kōnke rōkaammijak in jarin tariņae ko aer.

10 A ilo men in raar jab po burueer, bwe riNipai ro raar jab mijak er; a raar mijak aer Anij im akweļap n̄an e kōn oņaake; kōn menin, ke jarin tariņae ko an Kiddianai raar ibebļo̧k ioer er raar pojak n̄an iioon er; aaet, ilo kajoor eo an Irooj raar bōk er.

11 Im pata eo eaar ijjino ilo allōn̄ eo kein kajiljino; im eļap im nana eaar pata eo ijo; aaet, eļap im nana eaar im eo ijo, jon̄an eaar jan̄in wōr men eo jeļā kake jon̄an an ļap wōt im eo ilubwiljin aolep armej in Liai jān ke eaar likūt Jerusalem.

12 Im mekarta kōlōļn̄o̧n̄ ko im kanejnej ko Kiddianai eaar kōm̧m̧ani, lo, riNipai ro raar m̧an er, jon̄an raar wōtlo̧k jān im̧aer.

13 Im ālikin men kein Kidkidonai eaar jiron̄ bwe jarin tariņae ko an ren lukwarkware er jon̄an wōt ettoļo̧k in tōrerein ko an āne jem̧aden eo, im bwe rejjab kōtļo̧k jabdewōt eo en kar wōtlo̧k ilo peier ilo iaļ eo; im āindein raar lukwarkware er im m̧an er, n̄an tōrerein ko an āne jem̧aden eo, em̧ool m̧ae aer kar kakūrm̧ool naan in jiron̄ eo an Kidkidonai.

14 Im ālikin men kein Kiddianai, eo eaar jutak im ire kōn peran, kar lukwarkware e ke eaar ko; im kōnke eaar kijeļo̧k kōnke an ire eļap kar jibwe e im m̧an e. Im āindein eaar jem̧ļo̧k in Kiddianai riko̧o̧t eo.

15 Im ālikin men kein jarin tariņae ko an riNipai ro raar bar ro̧o̧l n̄an aer jikin likōpejn̄ak. Im ālikin men kein kajon̄oulruwatimjuon iiō in eaar eļļā, im riko̧o̧t ro raar jab bar itok n̄an pata; im raar jab bar itok ilo karon̄oul iiō eo.

16 Im ilo ron̄oul im juon iiō raar jab wanlōn̄ļo̧k n̄an pata, a raar wanlōn̄ļo̧k jān aolep ijeņ im ijeņ n̄an jepooļe peļaakin armej in Nipai; bwe raar ļōmņak bwe eļan̄n̄e ren kar kabbōjrak armej in Nipai jān āne ko āneer, im dāpij wōt er ijeņ im ijeņ, im eļan̄n̄e ren kar kabbōjrak er jān kein kapenļo̧k ko ilik, ren kar kōm̧m̧an bwe ren kōtļo̧k er ekkar n̄an kōņaan ko aer.

17 Kiiō raar jitōn̄ n̄an er bar juon ritōl, eo etan eaar Zemnaraia; kōn menin eaar Zemnaraia eo eaar kōm̧m̧an bwe kabbōjrak in en bōk jikin.

18 A lo, men in eaar juon men em̧m̧anļo̧k n̄an riNipai ro; bwe riko̧o̧t ro raar jab maron̄ kabbōjrak aetok n̄an jelōt riNipai ro, kōnke eļap mennin aikuj ko raar likūt ilo jikin ko̧koņ,

19 Im kōnke jabwe in mennin aikuj ko an riko̧o̧t ro; bwe lo, eaar ejjeļo̧k jabdewōt ippāer ijello̧kun wōt kanniōk n̄an aer mour, kanniōk eo raar bōk ilo āne jem̧aden;

20 Im ālikin men kein kakidudu eo eaar jejaļo̧k ilo āne jem̧aden eo jon̄an riko̧o̧t ro raar nan̄in jako kōn kwōle.

21 Im riNipai ro raar wōnm̧aanļo̧k wōt ilo aer ilo̧k ilo raan im ilo bon̄, im wōtlo̧k ioon jarin tariņae ko aer, im jek er kōn to̧ujin ko im kōn jon̄oul ko in to̧ujin ko.

22 Im āindein eaar kōņaan eo an armej ro an Zemnaraia n̄an jenlikļo̧k jān kōttōbalbal eo aer, kōnke ko̧kkure eo eļap eaar itok ioer ilo bon̄ im ilo raan.

23 Im ālikin men kein Zemnaraia eaar leļo̧k naan in jiron̄ n̄an armej ro an bwe ren jenlikļo̧k jān m̧urm̧ur eo, im ren ilo̧k ilo m̧ōttan ko rettoļo̧ktata in āneo iōn̄.

24 Im kiiō, Kidkidonai kōnke eaar jeļā kōn kōttōbalbal eo aer, im kōnke eaar jeļā kōn m̧ōjņo̧ eo aer kōnke ean̄den kōn m̧ōn̄ā, im eļap im eo eaar waļo̧k ilubwiljier, kōn menin eaar jilkinļo̧k jarin tariņae ko an ilo bon̄, im kar kabbōjrak iaļ in jenlikļo̧k eo aer, im kar likūt jarin tariņae ko an ilo iaļ in jenlikļo̧k eo aer.

25 Im men in raar kōm̧m̧ane ilo bon̄, im eļļāļo̧k ilo ilo̧k eo aer jān riko̧o̧t ro, āindein bwe ilo raan eo ilju, ke riko̧o̧t ro raar jino ilo̧k eo aer, rekar iioon jarin tariņae ko an riNipai ro jim̧or ilo tum̧aanier im tulikier.

26 Im riko̧o̧t ro raar pād iturōk kar barāinwōt kabbōjrak er ilo jikin in jenlikļo̧k ko aer. Im aolep men kein raar kōm̧m̧an jān naan in jiron̄ an Kidkidonai.

27 Im eaar wōr elōn̄ to̧ujin ko in ro raar ajeļo̧k er make rikalbuuj n̄an riNipai ro, im bwe eo aer rekar mej.

28 Im ritōl eo aer, Zemnaraia, kar bōk e im totoik e jān juon wōjke, aaet, em̧ool ilo jebantata m̧ae eaar mej. Im ke raar totoik e m̧ae eaar mej raar juok wōjke eo n̄an laļ, im lam̧ōj kōn juon ainikien eļļaaj, im ba:

29 Irooj in oņaake armej ro An ilo jim̧we im ilo kwōjarjar in bōro, bwe ren maron̄ kawōtlo̧k n̄an laļ aolep ro renaaj kappukot n̄an m̧an er kōnke kajoor im kanejnej ittino ko, em̧ool āinwōt ļein kar kawōtlo̧k e n̄an laļ.

30 Im raar m̧ōņōņō im bar lam̧ōj kōn juon wōt ainikien, im ba: Anij an Ebream, im Anij an Aisak, im Anij an Jekab, en oņaake armej rein ilo jim̧we, toun wōt aer naaj kūr ioon etan aer Anij kōn oņaake.

31 Im ālikin men kein raar n̄irļo̧k, aolep ilo juon wōt, ilo al, im wūjtake aer Anij kōn menin eļap Eaar kōm̧m̧an n̄an er, ilo kōjo̧o̧r er jān wōtlo̧k ilo pein rikōjdat ro aer.

32 Aaet, raar lam̧ōj: Hosana n̄an Anij Eutiejtata. Im raar lam̧ōj: En jeraam̧m̧an etan Irooj Anij Ekajoor Bōtata, Anij Eutiejtata.

33 Im burueer raar ļapļo̧k kōn lan̄lōn̄, n̄an lutōk mājidjid in elōn̄ dānnin jan̄, kōnke em̧m̧an eo eļap an Anij ilo kōtļo̧k er jān pein rikōjdat ro aer; im raar jeļā eaar kōnke aer ukeļo̧k im ettā bwe ren kar maron̄ rōļo̧k jān ko̧kkure indeeo.