1 Ha ojehu opakuévo ary diesiocho umi mondaha ehersitokuéra oñembosakoʼi ñorairõrã, ha oñepyrũ oguejy ha osẽ tenda yvatégui, ha yvyty, ha taveʼỹgui, ha hendambarete, ha henda ñemimbýgui, ha oñepyrũ ojagarra hikuái umi tetã, tetã nortegua ha tetã surgua, ha oñepyrũ ojagarra hikuái opa tetã nefita-kuéra ohejareivaʼekue, ha umi tavaguasu oñemonandivaʼekue.

2 Ha katu péina ápe, ndaipórikuri mymba saite ni mymba ojejuka hag̃ua umíva umi tetã nefita-kuéra ohejareivaʼekuépe, ha ndaipóri mymba ojuka hag̃ua umi mondaha ndahaʼéiramo taveʼỹmente.

3 Ha umi mondaha ndaikatúi oikove ndahaʼéiramo upe taveʼỹmente, ndaipórigui tembiʼu; nefita-kuéra omonandíguikuri hetã, ha ombyatýkuri ivaka ha imymbaʼatykuéra ha opa mbaʼehepy oguerekóva, ha oñembyaty hikuái peteĩ atýpente.

4 Upévare, ndaipóri mbaʼéichapa umi mondaha omonda ni ohupytývo tembiʼu, ndohóiramo ñorairõme nefita-kuéra rehe; ha nefita-kuéra oĩ peteĩ atýpente, ha hetaiterei hikuái, ha oguereko hikuái hiʼupy ha kavaju, ha vaka, ha mymbaʼaty opáichagua, oikove hag̃ua hikuái siete ary aja, ára ohaʼarõva ikatutahápe ohundi hikuái yvy ape árigui umi mondaha; ha péicha opákuri ary diesiocho.

5 Ha ojehu ary diesinuévepe, Giddiani ohecha tekotevẽha oho ñorairõme nefita-kuéra rehe, ndoguerekóigui mbaʼéichapa oikovéta hikuái ndahaʼéiramo ñemonda, pokarẽ, ha jejuka rupive.

6 Ha noñanimái oñemosarambívo hikuái yvy ape ári oñotỹ hag̃ua yvaraʼỹi, ani mbaʼe nefita-kuéra hoʼa hiʼarikuéra ha ojuka chupekuéra; upévare Giddiani heʼi ijehersitokuérape toho upe arýpe ñorairõme nefita-kuérare.

7 Ha ojehu oho hikuái ñorairõme; ha haʼékuri sexto jasýpe; ha péina ápe, tuicha ha ivaieterei ára ohoramoguare hikuái ñorairõrã; ha oñemonde hikuái mondaha oñemondeháicha; ha ogueraha peteĩ ovecha pire ilómore, ha oñembopara tuguýpe, ha oñemoakãperõ hikuái, ha oñemoʼã akãmoʼãhápe; ha tuicha ha ivaieterei Giddiani ehérsito iñarmadúra rupi ha oñemboparapágui hikuái tuguýpe.

8 Ha ojehu nefita-kuéra ehérsito, ohechávo mbaʼéichapa oĩ Giddiani ehersitokuéra, hoʼapaite hikuái yvýpe, ha ohupi iñeʼẽ Ñandejára Itupãme, operdona ha omosãso hag̃ua chupekuéra ihayhuʼỹhakuéra pógui.

9 Ha ojehu ohechávo hikuái péva, Giddiani ehersitokuéra oñepyrũ osapukái, ovyʼaitereígui, oimoʼãgui nefita-kuéra hoʼa okyhyjégui ijehersitokuéra oporomondýivagui.

10 Ha katu upévape ojavy hikuái, nefita-kuéra ndokyhyjéigui chuguikuéra; ha katu okyhyje hikuái Itupãgui ha ojerureʼasy hikuái chupe ñemoʼã rehe; upévare, Giddiani ehersitokuéra ou vove hiʼarikuéra oĩ hikuái ñembosakoʼípe ipuʼaka hag̃ua hesekuéra; heẽ, ombohovái chupekuéra Ñandejára puʼaka reheve.

11 Ha oñepyrũ ñorairõ ko sexto jasýpe; ha tuicha ha ivaieterei upe ñorairõ, heẽ, tuicha ha ivaieterei pe jejuka guasu, jepe ndojeikuaaivaʼekue arakaʼeve upeichagua jejuka tuichaite opa Lehi tavayguakuéra apytépe osẽ guive Jerusalén-gui.

12 Ha jepeve umi ñeʼẽpohýi ha ñeʼẽmeʼẽ ojapovaʼekue Giddiani, péina ápe, nefita-kuéra ipuʼaka hesekuéra, upéicha rupi ojevy hikuái henonderãkuéra.

13 Ha ojehu Gidgiddoni heʼi ijehersitokuérape omuñavaʼerãha chupekuéra pe taveʼỹ rembeʼy peve, ha ani hag̃ua ohejarei tapére avave hoʼávape ipopekuéra; ha péicha omuña ha ojuka hikuái chupekuéra, pe taveʼỹ rembeʼy peve, jepe okumplipa peve hikuái Gidgiddoni heʼiháicha.

14 Ha ojehu Giddiani, oñemboʼy ha oñorairõvaʼekue pyʼaguasu reheve, oñemuña oñani aja; ha ikaneʼõvo hetaite oñorairõ haguére ohupyty hikuái chupe ha ojuka. Ha péicha ipaha Giddiani upe mondaha.

15 Ha ojehu nefita-kuéra ehérsito oho jey hendambaretépe. Ha ohasa pe ary diesinueve, ha mondahakuéra ndouvéi ñorairõme; ni ary veintepe ndouvéi hikuái.

16 Ni ary veintiúnope ndoúi hikuái ñorairõme, ha katu og̃uahẽ hikuái opáguio omongora hag̃ua Nefi tavayguakuérape; oimoʼãgui hikuái omohaʼeñóramo chupekuéra hetãkuéragui ha ojeréramo hesekuéra opárupi, ha oipeʼáramo chuguikuéra imbaʼekuéra ambue tetãme, omyañataha chupekuéra oñemoĩ hag̃ua ipoguýpe oipotaháicha hikuái.

17 Koʼág̃a, ohenói hikuái ambue mburuvicha, hérava Zemnaríah; upéicha Zemnaríah haʼe pe omoĩukavaʼekue ñemongora.

18 Ha katu péina ápe, péva ouporã nefita-kuérape; ndaikatúigui mondahakuéra ojoko upe tenda heta ára ikatu hag̃uáicha omovã nefita-kuérape, oguereko rupi hikuái heta hiʼupyrã,

19 Ha ndaipórigui hiʼupy mondahakuéra apytépe; ha péina ápe, ndoguerekóigui hikuái mbaʼeve oikove hag̃ua ndahaʼéiramo soʼo, ha ohupyty hikuái upe soʼo taveʼỹme;

20 Ha ojehu saʼive mymbajejuka pe taveʼỹme upéicha rupi mondahakuéra haimete omano ñembyahýigui.

21 Ha nefita-kuéra osẽ meme jeguatápe arakue ha pyharekue, ha hoʼa ijehersitokuéra ári, ha ombojaʼo chupekuéra miles ha decenas de miles-pe.

22 Ha upéicha Zemnaríah tavayguakuéra ohejase hembipota, tuichaite ñehundi oúva rupi chupekuéra ára ha pyhare.

23 Ha ojehu Zemnaríah heʼi itavayguakuérape omopuʼã hag̃ua upe ñemongora, ha oguata hag̃ua tenda yvy norte mombyryvehápe.

24 Ha koʼág̃a, Gidgiddoni oikuaávo haʼekuéra ojaposéva, ha oikuaávo ikangyha hikuái ndoguerekóigui tembiʼu, ha tuichaite mbaʼevai ojejapovaʼekue ijapytepekuérare, upévare omondo pyharekue ijehérsito, ha ojoko chuguikuéra iñesẽ, ha omoĩ ijehersitokuérape tenda ojevytahárupi hikuái.

25 Ha ojapo hikuái upéva pyharekue, ha oñemotenonde hikuái mondahakuérare, upéicha upe koʼẽme, koʼãva oñepyrũvo oguata, ojojuhu nefita-kuéra ehérsito ndive henonde ha hapykue gotyo.

26 Ha mondahakuéra oĩva sur gotyo avei oñemomombyry hendakuéragui ojevytaha rupi. Ha opa koʼã mbaʼe ojejapókuri Gidgiddoni heʼígui.

27 Ha oĩ hetaiterei miles ijapytepekuéra oñemoĩva prisionéroramo nefita-kuéra poguýpe, ha hembyrépe ojuka hikuái.

28 Ha ojagarra hikuái imburuvichakuéra, Zemnaríah-pe, ha omosaingo chupe peteĩ yvyra rehe, heẽ, pe yvyra rakãgui omano meve. Ha omosaingo rire chupe omano meve, oity hikuái upe yvyramáta yvýpe, ha osapukái, heʼívo:

29 Ñandejára toñongatu itavayguakuérape tekojoja ha korasõ marangatúpe, ojeity hag̃ua yvýpe opavave ojukaséva chupekuéra puʼaka ha mbaʼevai ñemi rupi, jepeve ojeity haguéicha ko kuimbaʼépe yvýpe.

30 Ha ovyʼa hikuái, ha osapukái jey peteĩ ñeʼẽme, heʼívo: Abraham Tupã, ha Isaac Tupã, ha Jacob Tupã tomoʼã ko tavayguakuérape tekojojápe, ohenói aja pukukue Itupã réra ojerurévo ñemoʼã rehe.

31 Ha ojehu opurahéi hikuái, oñondivepa, ha omomorã Itupãme tuichaite mbaʼeporã ojapovaʼekue hesekuérare, oñongatúvo chupekuéra ani hag̃ua hoʼa ihayhuʼỹhakuéra pópe.

32 Heẽ, ha ojerureʼasy hikuái: Hosana Tupã Ijyvatevévape. Ha ojerureʼasy hikuái: Tojehovasa Tupã Ñandejára Ipuʼakapáva réra, Tupã Ijyvatevéva.

33 Ha ikorasõkuéra henyhẽ vyʼapavẽgui, oñohẽ meve heta tesay, Tupã pyʼaporã guasu rupi omosãsóvo chupekuéra ihayhuʼỹhakuéra pógui; ha oikuaa hikuái haʼehague iñarrepentimiénto ha iñemomirĩ rupi ojeipeʼaha chupekuéra peteĩ ñehundi opaveʼỹvagui.