1 Nao luk, bae mi soem long yu se oli no stanemap wan king ova long graon; be long semfala yia ia, yes, nambateti yia, oli prapa spolem gud jea blong jajmen, yes, oli kilimded jif jaj blong kantri ia.

2 Mo ol pipol oli seraot wan agensem narawan; mo oli seraot wan aot long narawan i go long ol laen, evri man folem famli blong hem, mo ol nara famli blong hem mo ol fren; mo olsem ia nao oli bin prapa spolem gud gavman blong kantri ia.

3 Mo evri laen i bin jusum wan jif o wan lida ova long olgeta; mo olsem ia nao oli bin kam ol laen mo ol lida blong ol laen.

4 Nao luk, i no gat eni man long medel blong olgeta, hemia nomo sapos hem i gat plante famli mo plante famli mo ol fren; from hemia, ol laen blong olgeta i kam bigwan tumas.

5 Nao evri samting ia i hapen, mo i no gat eni wo yet long medel blong olgeta; mo evri nogud fasin ia i kam long ol pipol from oli letem olgeta long paoa blong Setan.

6 Mo oli bin prapa spolem gud ol loa blong gavman, from sikret grup blong ol fren mo ol famli blong olgeta we oli bin kilimded ol profet.

7 Mo oli bin mekem wan bigfala rao long graon, inaf blong mekem se pat blong ol pipol ia we oli moa stret mo gud, kolosap evriwan long olgeta oli kam nogud; yes, i gat be smol namba nomo blong ol man we oli gat stret mo gud fasin, long medel blong olgeta.

8 Mo olsem ia nao sikis yia i no pas i go yet stat long taem we bigfala pat long ol pipol oli tanem olgeta oli gowe long stret mo gud fasin blong olgeta, olsem wan dog we i gobak long traot blong hem, o olsem pig we i go slip long sofmad.

9 Nao sikret grup ia, we i karem bigfala nogud fasin i go long ol pipol, i mekem olgeta oli kam tugeta, mo oli putum olsem hed blong olgeta, wan man we oli singaotem hem Jekob;

10 Mo oli bin singaotem hem king blong olgeta; from hemia, hem i kam king ova long nogud grup ia; mo hem i wan long olgeta we i givim voes blong hem agensem ol profet we oli bin testifae long saed blong Jisas.

11 Mo i bin hapen se oli no strong long namba olsem ol laen blong ol pipol we oli joen tugeta, be nomo, ol lida blong olgeta oli stanemap ol loa blong olgeta, evriwan folem laen blong hem; be oli ol enemi, i nomata oli no wan pipol we i stret mo gud, be yet, oli wan long fasin blong no laekem olgeta we oli bin mekem kavenan blong prapa spolem gud gavman.

12 From hemia, Jekob, from hem i luk se ol enemi blong olgeta oli moa plante bitim olgeta, from hem i king blong grup, taswe hem i bin givim oda long ol pipol blong hem se oli mas ronwe i go long pat blong graon we i stap long Not olgeta, mo long ples ia oli bildimap, long olgeta bakegen, wan kingdom, kasem taem we olgeta we oli bin pulaot i joenem olgeta, (from hem i bin switim olgeta se bae i gat plante man we bae oli pulaot) mo oli bin kam strong inaf blong rao wetem ol laen blong ol pipol; mo oli bin mekem olsem.

13 Mo maj blong olgeta i bin kwik tumas we i no gat wan samting we i save stopem hem, kasem taem we oli go aot long ples we ol pipol i nomo save kasem olgeta. Mo olsem ia nao teti yia i bin en; mo olsem ia nao i bin ol laef blong ol pipol blong Nifae.

14 Mo i bin hapen long teti mo wan yia we oli bin seraot i go long ol laen, evri man folem famli blong hem, famli mo ol fren; be oli bin kam long wan agrimen se bae oli no go blong faet wan wetem narawan; be oli no kam wan long saed blong ol loa blong olgeta, mo fasin blong olgeta blong gavman, from oli bin stanemap olgeta folem ol tingting blong olgeta we oli bin ol jif blong olgeta mo ol lida blong olgeta. Be oli bin stanemap ol loa we i strong mekem se wan laen bae i no mas mekem rong agensem narawan, inaf blong mekem se long sam pat oli bin gat pis long graon; be, ol hat blong olgeta oli tanem i go longwe long Lod, God blong olgeta, mo oli bin stonem ol profet mo oli sakem olgeta aot long medel blong olgeta.

15 Mo i bin hapen se Nifae—from ol enjel oli bin visitim hem, mo tu, voes blong Lod, from hemia, from hem i bin luk ol enjel, mo from hem i witnes wetem ae blong hem, mo from we hem i kasem paoa long hem blong hem i save gat save long saed blong seves blong Kraes, mo tu, from we hem i witnes wetem ae blong hem long fasin blong olgeta blong aot kwiktaem long stret mo gud fasin i go long ol fasin nogud blong olgeta mo ol rabis sin;

16 From hemia, from we hem i bin harem nogud from hat blong olgeta i strong mo ol tingting blong olgeta oli blaen—hem i go aot long medel blong olgeta long semfala yia, mo i stat blong testifae, strong mo klia, fasin blong sakem sin mo fasin blong kam klin aot long ol sin tru long fet long Lod Jisas Kraes.

17 Mo hem i bin tijim plante samting long olgeta; mo evri samting ia, oli no save raetemdaon, mo wan pat blong olgeta bae i no naf, from hemia, mi no raetemdaon olgeta long buk ia. Mo Nifae i bin tij wetem paoa mo wetem bigfala atoriti.

18 Mo i bin hapen se oli kros long hem, hemia from hem i gat moa bigfala paoa bitim olgeta, from i no save hapen se oli no save bilivim ol toktok blong hem, from fet blong hem long Lod Jisas Kraes i bigwan tumas mekem se ol enjel oli bin givhan long hem evri dei.

19 Mo long nem blong Jisas, hem i bin sakemaot ol devel mo ol spirit we oli no klin; mo tu, brata blong hem, hem i mekem hem i laef bakegen long ded, afta we ol pipol oli bin stonem hem mo mekem hem i ded.

20 Mo ol pipol oli bin luk samting ia, mo witnes long samting ia, mo oli kros long hem from paoa blong hem; mo tu, hem i mekem plante moa merikel, long ae blong ol pipol, long nem blong Jisas.

21 Mo i bin hapen se teti mo wan yia i bin pas i go, mo i gat be smol namba nomo we i bin jenisim laef blong olgeta i go long Lod; be olgeta ia we oli bin jenisim laef, oli bin soemaot long ol pipol se paoa mo Spirit blong God i bin visitim olgeta, we i stap long Jisas Kraes, long hem we oli biliv.

22 Mo olgeta evriwan we Nifae i bin sakemaot ol devel aot long olgeta, mo oli kam oraet long ol sik blong olgeta mo ol samting we oli slak long olgeta, olgeta ia oli bin soemaot long ol pipol se Spirit blong God i wok long olgeta, mo oli kam oraet; mo oli soemaot ol saen tu mo oli mekem sam merikel long medel blong ol pipol.

23 Olsem ia nao nambateti mo tu yia i bin pas i go tu. Mo Nifae i prij long ol pipol long stat blong teti mo tri yia; mo hem i prijim long olgeta, fasin blong sakem sin mo fasin blong kam klin aot long ol sin long olgeta.

24 Nao mi wantem yu blong tingbaot tu, se i no bin gat eniwan we i kam blong sakem sin we i no kasem baptaes wetem wota.

25 From hemia, Nifae i bin odenem ol man long seves ia, blong olgeta olsem we bae oli kam long olgeta, oli mas kasem baptaes wetem wota, mo hemia, i olsem wan witnes mo wan testemoni long fored blong God, mo long ol pipol, se oli bin sakem sin mo oli kasem fasin blong kam klin aot long ol sin blong olgeta.

26 Mo i gat plante long stat blong yia ia we oli bin kasem baptaes from oli sakem sin; mo olsem ia nao bigfala pat blong yia ia i bin pas i go.