1 Im ālikin men kein eaar wōr juon ainikien kar ron̄ ilubwiljin aolep ro ilo laļ, ioon aolep mejān āne in, im ej kūr:

2 Wo, wo, wo n̄an armej rein; wo n̄an aolepān ro ilo aolepān laļ ijello̧kun wōt n̄e renaaj ukeļo̧k; bwe devil ej ettōn̄, im enjeļ ro an rej m̧ōņōņō, kōnke kar mej eo an m̧aan ro rewūlio im kōrā ro redeo̧ nejin armej ro Aō; im ej kōnke aer kalijekļo̧k im jōjō ko aer rekar wōtlo̧k!

3 Lo, jikin kwelo̧k en eļap Zaraemla Iaar tile kōn kijeek, im ro ie kobban.

4 Im lo, jikin kwelo̧k en eļap Moronai Iaar kōm̧m̧an bwe en tūm̧laļļo̧k ilo m̧wilaļ ko in lo̧meto, im ro ie kobban n̄an maļon̄.

5 Im lo, jikin kwelo̧k en eļap Moronaia Iaar kalibobo kōn bwidej, im ro ie kobban, n̄an ņooj nana ko aer im kajjōjō ko aer jān im̧aan Meja, bwe bōtōktōkin rikanaan ro im ro rekwōjarjar ren jab naaj itok wōt n̄an Eō ņae er.

6 Im lo, jikin kwelo̧k in Gilgal Iaar kōm̧m̧an bwe en rum̧ļo̧k, im ro ie kobban n̄an kallib ilo m̧wilaļ ko in laļ;

7 Aaet, im jikin kwelo̧k in Onaia im ro ie kobban, im jikin kwelo̧k in Mokum im ro ie kobban, im jikin kwelo̧k in Jerusalem im ro ie kobban, im dān ko Iaar kōm̧m̧an bwe ren wanlōn̄ļo̧k ilo ijo jikier, n̄an ņooj nana eo im kajjōjō ko aer jān im̧aan Meja, bwe bōtōktōkin rikanaan ro im ro rekwōjarjar ren jab itok wōt n̄an Eō ņae er.

8 Im lo, jikin kwelo̧k in Kadiandi, im jikin kwelo̧k in Kadiomna, im jikin kwelo̧k in Jekab, im jikin kwelo̧k in Kimkimno, aolep kein Iaar kōm̧m̧an bwe ren rum̧ļo̧k, im kōm̧m̧an bat ko im kom̧laļ ko ilo ijoko jikier; im ro ie kobbaer Iaar kalbwin er ilo m̧wilaļ ko in laļ, n̄an ņooj nana im kajjōjō ko aer jān im̧aan Meja, bwe bōtōktōkin rikanaan ro im ro rekwōjarjar ren jab itok wōt n̄an Eō ņae er.

9 Im lo, jikin kwelo̧k en eļap Jekabukat, eo eaar obrak kōn armej ro an kiin̄ Jekab, Iaar kōm̧m̧an bwe en bwil kōn kijeek kōnke jero̧wiwi ko aer im nana eo aer, ko raar ilōn̄in aolep nana ko an aolepān laļ, kōnke uror ko im kanejnej ko aer rettino; bwe eaar er ro raar ko̧kkure aenōm̧m̧an eo an armej ro Aō im kien eo an āneo; kōn menin Iaar kōm̧m̧an bwe ren bwil, n̄an ko̧kkure er jān im̧aan Meja, bwe bōtōktōkin rikanaan ro im ro rekwōjarjar ren jab itok wōt n̄an Eō ņae er.

10 Im lo, jikin kwelo̧k in Leman, im jikin kwelo̧k in Jos, im jikin kwelo̧k in Gad, im jikin kwelo̧k Kiskumen, Iaar kōm̧m̧an bwe ren bwil kōn kijeek, im ro kobbaer ie, kōnke aer nana im kadiwōjļo̧k rikanaan ro, im kad ro Iaar jilkinļo̧k n̄an kwaļo̧k n̄an er kōn nana eo im kajjōjō ko aer.

11 Im kōnke raar kadiwōjļo̧k er aolep, bwe en ejjeļo̧k juon rijim̧we ilubwiljier, Iaar jilkinlaļļo̧k kijeek im ko̧kkure er, bwe aer nana im kajjōjō ko aer ren maron̄ ņojak jān im̧aan Meja, bwe bōtōktōkin rikanaan ro im ro rekwōjarjar ro Iaar jilkinļo̧k ilubwiljier ren jab maron̄ kūr n̄an Eō jān bwidej ņae er.

12 Im elōn̄ ko̧kkure reļļap Iaar kōm̧m̧an n̄an itok ioon āniin, im ioon armej rein, kōnke aer nana im kajjōjō ko aer.

13 O aolep kom̧ ro dāpij er kōnke kom̧ ar jim̧weļo̧k jān er, kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?

14 Aaet, em̧ool Ij ba n̄an kom̧, eļan̄n̄e kom̧ naaj itok n̄an Eō kom̧ naaj lo mour indeeo. Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok, e Inaaj bōk, im em̧ōņōņō ro rej itok n̄an Eō.

15 Lo, N̄a Jisōs Kraist eo Nejin Anij. Iaar kōm̧anm̧an lan̄ ko im laļ, im men otemjeļo̧k ilo er. Iaar pād ippān Jema jān jinoin. N̄a ij ilo Jema, im Jema ilo N̄a, im ilo n̄a Jema eaar kaiboojoj e etan.

16 Iaar itok n̄an ro Aō, im ro Aō raar jab bōk Eō. Im jeje ko rekwōjarjar kōn itok eo Aō rej kūrm̧ool.

17 Im jon̄an wōt eo eaar bōk Eō, n̄an er Iaar leļo̧k n̄an erom m̧aan ro nejin Anij; im em̧ool āindein Inaaj n̄an jon̄an wōt eo renaaj tōmak ilo Eta, bwe lo, kōn Eō lo̧mo̧o̧r ej itok, im ilo N̄a kien Moses ej kūrm̧ool.

18 N̄aij meram im mour an laļ. N̄a Alpa im Omega, jinoin im jem̧ļo̧k in.

19 Im kom̧ naaj jab ajetok n̄an Eō kōto̧o̧rļo̧k bōtōktōk; aaet, katok ko ami im katok kijeek ko ami naaj kōjjem̧ļo̧k i, bwe Iban bōk ejjeļo̧k iaan katok ko ami im katok kijeek ko ami.

20 Im kom̧ naaj ajetok āinwōt juon katok n̄an Eō bōro e rup im jetōb ettā. Im jabdewōt eo ej itok n̄an Eō kōn bōro e rup im jetōb ettā, e Inaaj peptaij kōn kijeek im kōn Jetōb Kwōjarjar, kōnke aer tōmak ilo N̄a ilo iien aer oktak, kar peptaij kōn kijeek im kōn Jetōb Kwōjarjar, im rejjab jeļā kake.

21 Lo, Iaar itok n̄an laļ n̄an bōktok lo̧mo̧o̧r n̄an laļ, n̄an lo̧mo̧o̧ren laļ jān jero̧wiwi.

22 Kōn menin, jabdewōt eo ej ukeļo̧k im itok n̄an Eō āinwōt juon ajri, e Inaaj bōk e, bwe kōn in ej an aelōn̄ in Anij. Lo, n̄an in Iaar likūt mour eo Aō, im kar bar bōk e; kōn menin ukeļo̧k, im itok n̄an Eō kom̧ jem̧ļo̧k ko in laļ, im mour.