1 O lenei o upu nei na tala’i atu ai Amoleka i tagata o e sa i le laueleele o Amonaea, e faapea:

2 O a’u o Amoleka; o a’u o le atalii o Kitona, o ia o le atalii o Isamaeli, o lē na tupuga mai ia Aminati; ma o Aminati lava lea o lē na faaliliuina le tusitusiga sa i luga o le pa o le malumalu, lea na tusia e le tamatama’iaao o le Atua.

3 Ma o Aminati o sē e tupuga mai ia Nifae, o le atalii o Liae, o lē na alu a’e mai le laueleele o Ierusalema, o sē na tupuga mai ia Manase, o le atalii o Iosefa o lē na faatau atu i Aikupito i lima o ona uso.

4 Ma faauta, o a’u foi o se tagata e lē itiiti le taualoa i totonu o i latou uma o e ua latou iloaina a’u; ioe, ma faauta, e toatele o’u aiga ma a’u uo, ma ua ou maua foi oa e tele e ala i lo’u galue filifiligā.

5 Ae ui i lea, ina ua tuanai nei mea uma, sa le’i tele ni mea sa ou iloa e uiga i ala o le Alii, ma ana mealilo ma lona mana ofoofogia. Ua ’ou fai atu sa le’i tele ni mea sa ’ou iloa e uiga i nei mea; ae faauta, ua ou sesē, ona ua ’ou vaai i le tele o ana mealilo ma lona mana ofoofogia; ioe, e oo lava i le faasaoina o ola o lenei nuu.

6 Ae ui i lea, sa ou faama’a’a lo’u loto, ona sa valaauina a’u i le tele o taimi ae sa ou lē fia faalogo; o lea sa ou iloa e uiga i nei mea, peitai sa ’ou lē fia iloaina; o lea na ’ou alu ai pea lava i le fouvale faasaga i le Atua, i le amioleaga o lo’u loto, seia oo mai i le aso fa o le masina lona fitu lenei, o le lona sefulu lea o tausaga o le nofoa’iga a faamasino.

7 A’o o’u malaga atu e vaai i se tasi o lo’u aiga latalata mai lava, faauta sa oo mai se agelu a le Alii ia te a’u ma fetalai mai: Amoleka, foi atu i lou lava fale, ona o le a e fafagaina se perofeta a le Alii; ioe, o se tagata paia, o sē o se tagata filifilia o le Atua; ona sa anapogi o ia i aso e tele ona o agasala a lenei nuu, ma ua matelaina o ia i le fia’ai, ma ia e talia o ia i lou fale ma fafaga ia te ia, ma o le a ia faamanuiaina oe ma lou aiga; ma o le a i ai i ou luga ma lou aiga le faamanuiaga a le Alii.

8 Ma sa oo ina ou usiusitai i le siufofoga o le agelu, ma ’ou toe foi agai mai i lo’u fale. Ma a’o o’u alu atu iina sa ’ou maua le tagata na fetalai mai ai le agelu ia te a’u: Ia e talia i lou fale—ma faauta o le tagata lava lenei o lē sa tautala atu ia te outou e uiga i mea a le Atua.

9 Ma sa fetalai mai le agelu ia te a’u o ia o se tagata paia; o le mea lea ua ou iloa ai o ia o se tagata paia ona na fetalai mai ai se agelu a le Atua.

10 Ma ’ou te toe fai atu, ua ’ou iloa ua moni mea ua ia molimau mai ai; auā faauta ou te fai atu ia te outou, e pei ona soifua le Alii, sa faapea lava ona ia auina mai o lana agelu e faailoa mai ia te a’u nei mea; ma sa ia faia lenei mea a’o nofo le Alema lenei i lo’u fale.

11 Auā faauta, ua ia faamanuiaina lo’u aiga, ua ia faamanuiaina a’u, ma o’u fafine, ma a’u fanau, ma lo’u tamā ma o’u aiga; ioe, e oo i o’u aiga uma ua ia faamanuiaina, ma ua i ai i o matou luga le faamanuiaga a le Alii e tusa ma afioga na ia fetalai mai ai.

12 Ma o lenei, ina ua uma ona tautala atu e Amoleka nei upu sa amata ona taufaiofo o tagata, ona ua vaai ua sili atu nai le tasi le molimau o e ua molimau mai e uiga i mea ua tu’ua’ia ai i latou, ma mea foi o le a oo mai, e tusa ma le agaga o valoaga sa i ai ia te i laua;

13 Ae ui i lea, sa i ai ni isi o i latou na manatu e fesiligia i la’ua, ina ia mafai e ala ia latou togafiti popoto ona latou maua i la’ua i upu la te tautatala i ai, ina ia mafai ona latou maua ai se molimau e faasaga ia te i la’ua, ina ia mafai ona latou avatu o i la’ua i o latou faamasino ina ia mafai ona faamasinoina i la’ua e tusa ma le tulafono, ma ina ia mafai ona fasioti o i la’ua pe lafo i le falepuipui, e tusa ma le solitulafono e mafai ona latou faafoliga mai ua la solia pe ua molimau faasaga ia te i la’ua.

14 O lenei o i latou o alii o e na saili e faaumatia i la’ua, o i latou ia o e o loia, o e na totogi pe na tofia e le nuu e faatautaia le tulafono i taimi o a latou faamasinoga, po o i taimi o faamasinoga o solitulafono a tagata i luma o faamasino.

15 O lenei o nei loia sa aoaoina i auala ma togafiti popoto uma a le nuu; ma sa latou faia lenei mea ina ia mafai ai ona latou tomai i la latou galuega.

16 Ma sa oo ina amata ona latou fesiligia Amoleka, ina ia mafai ona latou faasese ana upu, pe faaeseese ai upu o le a ia tautala mai ai.

17 O lenei sa latou le iloa e mafai e Amoleka ona iloa a latou fuafuaga. Ae sa oo ina a’o amata ona latou fesiligia o ia, sa ia iloa o latou mafaufauga, ma sa ia fai atu ia te i latou: E, outou e le tupulaga amioleaga ma le faapi’opi’o, outou loia ma tagata pepelo, ona ua outou faataatitiaina faavae a le tiapolo; ona ua outou tataoina mailei ma matāsele e pu’e ai tagata paia o le Atua.

18 Ua outou faataatitiaina fuafuaga e faapi’opi’o ai ala o e amiotonu, ma aumai ai i lalo le toasa o le Atua i luga o o outou ulu, e oo ina faaumatia atoa ai lenei nuu.

19 Ioe, ua tonu ona fai mai o Mosaea, o lē o lo tatou tupu mulimuli, ina o le a tuu atu e ia le malo, ina ua leai se tasi e tuu atu i ai, ma ia faatonuina ai ia pulea lenei nuu e o latou lava leo—ioe, ua tonu lava ona ia fai mai, afai e oo mai le taimi e filifili ai e le leo o lenei nuu le amioletonu, o lona uiga, afai e oo mai le taimi e pa’u’ū atu ai lenei nuu i le solitulafono, o le a matua i latou mo le faafanoga.

20 Ma o lenei ou te fai atu ia te outou ua tonu le faamasinoga a le Alii ia outou amioletonu; ua tonu le fetalai mai o ia i lenei nuu, e ala mai i siufofoga o ana agelu: Ia outou salamo, salamo ia, ona ua lata mai le malo o le lagi.

21 Ioe, ua tonu le fetalai mai o ia, e ala mai i siufofoga o ana agelu e faapea: O le a ou alu ifo i totonu o o’u tagata, faatasi ma le fai mea tutusa ma le faamasinotonu i o’u lima.

22 Ioe, ma ou te fai atu ia te outou, a na leai talosaga a e amiotonu, o e o loo i ai nei i le laueleele, po ua asia nei lava outou i le faafanoga atoatoa; peitai o le a lē auala mai i le lolo, e pei ona faia i tagata i ona po o Noa, ae o le a auala mai i le oge, ma i faama’i, ma le pelu.

23 Ae o talosaga a e amiotonu, ua faasaoina ai outou; o lenei la, afai tou te tutuli ese mai totonu o outou e ua amiotonu, ona lē taofia ai lea e le Alii lona aao; ae o le a afio mai o ia i lona toasa tele e faasaga ia te outou; ona taia ai lea o outou i le oge, ma faama’i, ma le pelu; ma ua lata mai lava le taimi vaganā ai ua outou salamo.

24 Ma o lenei sa oo ina faateteleina le feitai o tagata ia Amoleka, ma sa latou alalaga mai, e faapea: Ua faifai le tagata lenei faasaga ia tatou tulafono ua tonu, ma a tatou loia popoto o e ua tatou filifilia.

25 Peitai sa faaloaloa atu e Amoleka lona lima, ma alaga malosi tele atu ia te i latou, e faapea: E, outou e le tupulaga amioleaga ma le faapi’opi’o, aisea ea ua ’u’u mau ai Satani i o outou loto? Aisea ea tou te tuu atu ai outou lava ia te ia ina ia mafai e ia ona maua o le mana i luga o outou, e faatauaso ai o outou mata, ia outou lē malamalama ai i upu ua tautala atu ai, e tusa ma lo latou moni?

26 Auā faauta, ua ou molimau tetee atu ea i la outou tulafono? Ua outou lē malamalama; ua outou fai mai ua ou tautala tetee i la outou tulafono; peitai ou te lei faia lava, ae ua ou tautala lagolago i la outou tulafono, i lo outou ta’usalaina.

27 Ma o lenei faauta, ou te fai atu ia te outou, o le faavae o le faafanoga o lenei nuu ua amata ona faataatia e le amioletonu o o outou loia ma o outou faamasino.

28 Ma o lenei sa oo ina ua uma ona tautala atu e Amoleka nei upu sa alalaga mai tagata e faasaga ia te ia, fai mai: O lenei ua tatou iloa nei o lenei tagata o se tama a le tiapolo, ona ua pepelo mai o ia ia te i tatou; ona ua ia tautala e tetee i la tatou tulafono. Ma o lenei ua ia fai mai na te le’i tautala tetee i ai.

29 O lenei foi, ua faifai o ia faasaga ia tatou loia, ma o tatou faamasino.

30 Ma sa oo ina tuu e loia i totonu o o latou loto, ina ia latou manatua nei mea e faasaga ia te ia.

31 Ma sa i ai i totonu o i latou se tasi o lona igoa o Seseroma. O lenei, o ia lea sa tausolomua i le tu’ua’ia o Amoleka ma Alema, ona o ia o se tasi o e sa sili ona atamai i totonu o i latou, ona o le tele o ana mataupu na faia i totonu o le nuu.

32 O lenei o le faamoemoega o nei loia, o le maua lea o le oa; ma sa latou maua le oa e tusa ma a latou galuega.