1 Ut kik’ulman naq laj Alma ut laj Amulek ke’taqlaak chi elk chaq sa’ li tenamit a’an, ut ke’el chaq, ut xkoheb’ toj sa’ li ch’och’ Sidom; ut k’ehomaq reetal, aran ke’xtaw chixjunileb’ li ani ke’el chaq sa’ li ch’och’ Ammonihah, li ke’isiik chaq ut ke’kute’ chaq chi pek, xb’aan naq ke’xpaab’ li raatin laj Alma.

2 Ut ke’xseraq’i reheb’ chixjunil li k’a’ru ki’uxman chaq reheb’ li rixaqil ut lix kok’aleb’, ut jo’kan ajwi’ chirixeb’ a’an, ut chirix li wankilal ke’kole’ wi’.

3 Ut jo’kan ajwi’ laj Tzeesrom yokyo chi yaj aran Sidom, chi naxamamnak li tiq chirix, li kichal xmaak li nimla rahilal kixnumsi sa’ xk’a’uxl sa’ xk’ab’a’ lix maa’usilal, xb’aan naq sa’ xch’ool a’an naq laj Alma ut laj Amulek maak’a’eb’ chik; ut sa’ xch’ool naq kamsinb’ileb’ xb’aan xmaa’usilal a’an. Ut li nimla maak a’in, ut xk’ihaleb’ chik lix maak, kixtawasi lix k’a’uxl toj reetal naq kiniman xrahil chi numtajenaq, chi maak’a’ xb’anb’al; jo’kan naq ki’ok chi k’ate’k rik’in jun li tiq naxamamnak.

4 Anajwan, naq kirab’i naq laj Alma ut laj Amulek wankeb’ sa’ li ch’och’ Sidom, ki’ok chi chalk xkawil xch’ool sa’ raam; ut tikto kixtaqla jun esil rik’ineb’, kiraj naq te’chalq rik’in.

5 Ut kik’ulman naq tikto xkoheb’, re ab’ink chiru li esil kixtaqla chaq reheb’; ut koxe’okaq sa’ li ochoch rik’in laj Tzeesrom; ut ke’xtaw sa’ xb’een lix ch’aat, yaj, q’axal tawajenaq rik’in xxamlel li tiq; ut jo’kan ajwi’ numtajenaq xrahil lix k’a’uxl xb’aan xmaa’usilal; ut naq kirileb’ kixye’ li ruq’, ut kixtz’aama chiruheb’ naq te’xk’irtesi.

6 Ut kik’ulman naq laj Alma kixye re, sa’ xchapb’al li ruq’: Ma nakapaab’ lix wankil li Kristo choq’ re li kolb’a-ib’?

7 Ut a’an kichaq’ok ut kixye: Yaal, ninpaab’ chixjunil li aatin li xak’ut.

8 Ut laj Alma kixye: Wi nakapaab’ li tojb’al-ix xb’aan li Kristo, naru tatk’irtesiiq.

9 Ut a’an kixye: Yaal, ninpaab’ jo’ chanru laa waatin.

10 Toja’ ut naq laj Alma ki’elajin chiru li Qaawa’, ut kixye: At Qaawa’ qaDios, chawuxtaana ru li winq a’in, ut chak’irtesi jo’ chanru lix paab’aal li wan rik’in li Kristo.

11 Ut chirix naq laj Alma kixye li aatin a’in, laj Tzeesrom kipisk’ok chiroq, ut ki’ok chi b’eek; ut k’a’jo’ xsachikeb’ xch’ool chixjunileb’ li tenamit naq ki’uxman a’in; ut kisutiik resil a’in chiru chixjunil li ch’och’ Sidom.

12 Ut laj Alma kixkub’si xha’ laj Tzeesrom choq’ re li Qaawa’; ut chalen chaq sa’ li hoonal a’an ki’ok chi jultikank aatin chiruheb’ li tenamit.

13 Ut laj Alma kixxaqab’ jun li iglees sa’ li ch’och’ Sidom, ut kixk’ojob’eb’ laj tij ut laj tzolonel sa’ li ch’och’, re xkub’sinkil xha’ choq’ re li Qaawa’ li ani te’ajoq re kub’eek xha’.

14 Ut kik’ulman naq k’iheb’; xb’aan naq ke’xch’ututi chaq rib’ sa’ chixjunil li na’ajej chixsutam Sidom, ut ke’kub’e xha’.

15 A’b’anan eb’ li tenamit li wankeb’ chaq sa’ li ch’och’ Ammonihah, toj ke’kana eb’ a’an choq’ jun tenamit kaweb’ raam ut jipeb’ xk’a’uxl; ut ink’a’ ke’xjal xk’a’uxl chirixeb’ lix maak, ke’xye b’an naq re laj tza chixjunil lix wankilal laj Alma ut laj Amulek; xb’aan naq eb’ a’an neke’k’amok re lix na’leb’ laj Nehor, ut ink’a’ neke’xpaab’ xjalb’aleb’ xk’a’uxl chirixeb’ lix maak.

16 Ut kik’ulman naq laj Alma ut laj Amulek, chirix naq laj Amulek kixkanab’ chixjunil lix oor, ut lix plaat, ut k’a’aq re ru re li terto xtz’aq, li wan sa’ li ch’och’ Ammonihah, choq’ re li raatin li Dios, chi tz’eqtaananb’il xb’aaneb’ li ke’ochb’eenink chaq re junxil, ut xb’aan ajwi’ lix yuwa’ ut eb’ li rech alal;

17 Jo’kan ut, chirix naq laj Alma kixxaqab’ li iglees aran Sidom, chirix rilb’al jun li nimla ramok-ib’, relik chi yaal, chirix rilb’al naq ke’xram rib’ li tenamit chirix lix q’etq’etileb’ xch’ool, ut ke’ok chixtuulanob’resinkil rib’eb’ chiru li Dios, ut ke’ok chixch’utub’ankil rib’eb’ sa’eb’ lix santil muheb’aaleb’ re xloq’oninkil li Dios chiru li artal, rik’in yo’lek ut tijok rajlal re naq taaruuq te’kole’q chaq chiru laj Satanas, ut chiru li kamk, ut chiru li sache’k—

18 Anajwan jo’ kinye, laj Alma, chirix rilb’al chixjunil li k’a’aq re ru a’in, chi jo’kan kixk’am laj Amulek chirix ut kinume’ junpak’al sa’ li ch’och’ Tzarahemla, ut kiroksi sa’ rochoch a’an, ut kik’anjelak chiru sa’ li rahilal yoo chixnumsinkil, ut kixkawob’resi chirix li Qaawa’.

19 Ut chi jo’kan kiraqe’ lix laje chihab’ rawa’b’ejileb’ laj raqol aatin sa’ xb’een lix tenamit laj Nefi.