1 Ma sa oo ina poloaiina Alema ma Amoleka ia o ese mai lena aai; ma sa la o ese atu, ma o mai seia oo mai i le laueleele o Saitoma; ma faauta, o iina na la maua i ai tagata uma o e na o ese mai le laueleele o Amonaea, o e na tutuli ese ma fetogia i maa, ona sa latou talitonu i upu a Alema.

2 Ma sa la faamatala atu ia te i latou mea uma na tutupu ia latou avā ma fanau, ma e uiga foi ia i la’ua lava, ma e uiga i lo la’ua mana o le laveaiina.

3 Ma sa faataotolia foi Seseroma i Saitoma ua ma’i, i se fiva mumū, lea na mafua mai i le puapuagatia tele o lona mafaufau ona o lana amio leaga, ona sa manatu o ia ua le toe i ai Alema ma Amoleka; ma sa manatu o ia ua fasiotia i laua ona o lana amioletonu. Ma o lenei agasala tele, ma le tele o isi ana agasala, sa atuatuvale ai lona mafaufau seia oo ina matuā tiga tele lava, sa le laveaiina mai ai; o lea na amata ai ona mū o ia i se mumū vevela.

4 O lenei, ina ua faalogo o ia ua i ai Alema ma Amoleka i le laueleele o Saitoma, sa amata ona toa lona loto; ma sa ia auina atu vave se feau ia te i la’ua, e manao ia i la’ua ia o mai ia te ia.

5 Ma sa oo ina o atu loa lava i la’ua, i le usiusitai i le feau lea sa ia auina mai ia te i la’ua; ma sa la o atu i totonu o le fale ia Seseroma; ma sa la maua atu o ia i luga o lona moega, ua gasegase, ua vaivai lava i se fiva mumū; ma sa mafatia tele foi lona mafaufau ona o ana amioletonu; ma ina ua vaai mai o ia ia te i la’ua, sa ia faaloaloa mai lona lima, ma aioi mai ia te i la’ua, ina ia la faamaloloina o ia.

6 Ma sa oo ina fai atu Alema ia te ia, ma uu i lona lima: Ua e talitonu ea i le mana o Keriso mo le faaolataga?

7 Ma sa tali mai o ia ma fai mai: Ioe, ua ou talitonu i upu uma na e a’oa’o mai.

8 Ma sa fai atu Alema: Afai ua e talitonu i le togiola a Keriso e mafai ona faamaloloina oe.

9 Ma sa fai mai o ia: Ioe, ua ou talitonu e tusa ma au upu.

10 Ma ona tagi atu ai lea o Alema i le Alii, ua faapea atu: Le Alii e, lo matou Atua, ia e alofa mutimutivale mai i lenei alii, ma faamaloloina o ia e tusa ma lona faatuatua lea ua ia Keriso.

11 Ma ina ua uma ona fai atu e Alema o nei upu, sa oso i luga Seseroma i ona vae, ma amata ona savali; ma sa faia lenei mea ma le ofo tele o tagata uma; ma sa alu atu le tala o lenei mea i le laueleele uma o Saitoma.

12 Ma sa papatiso Seseroma e Alema i le Alii; ma sa amata mai i lena taimi ma agai atu i le lumanai ona ia tala’i atu i tagata.

13 Ma sa faatuina e Alema se aulotu i le laueleele o Saitoma, ma faapaia faitaulaga ma a’oa’o i le laueleele, e papatiso mo le Alii soo se tasi o e sa mananao e papatisoina.

14 Ma sa oo ina sa toatele i latou; ona sa latou lolofi mai itulagi uma faataamilo ia Saitoma, ma ua papatisoina.

15 Ae o tagata sa i ai i le laueleele o Amonaea, sa tumau pea i latou o ni tagata loto-maaa ma ua maaa; ma sa latou le salamo ia latou agasala, ma latou tuua’i le mana uma o Alema ma Amoleka i le tiapolo; ona sa latou auai i le faatuatuaga a Ne’oa, ma sa latou le talitonu i le salamo mai i a latou agasala.

16 Ma sa oo ina o Alema ma Amoleka, ina ua lafoai atu e Amoleka o ana auro uma, ma ario, ma ana mea taua uma, ia sa i le laueleele o Amonaea, mo le afioga a le Atua, ina ua teena o ia e i latou o e sa avea ma ana uo ma lona tamā foi ma ona aiga;

17 O lea, ina ua uma ona faatuina e Alema le ekalesia i Saitoma, ina ua vaaia se taofiga tele, ioe, ina ua vaaia ua taofia tagata ona o le faamaualuluga o o latou loto, ma amata ona latou faalotomaualalalo i latou lava i luma o le Atua, ma amata ona latou faapotopoto faatasi i latou lava i o latou falesa e tapuai i le Atua i luma o le fatafaitaulaga, mataala ma tatalo e le aunoa, ina ia laveaiina i latou mai ia Satani, ma mai le oti, ma mai le faafanoga—

18 O lenei e pei ona ou fai atu, ina ua vaai Alema i nei mea uma, o lea na ia ave ai Amoleka ma o mai i le laueleele o Sara’emila, ma sa ia ave o ia i lona lava fale, ma tausi ia te ia i ona puapuaga, ma faamalosi o ia i la le Alii.

19 Ma sa faapea ona iu o le lona sefulu o tausaga o le nofoaiga a faamasino i luga o le laueleele o Nifae.