1 K’ehomaq reetal, kik’ulman anajwan naq lix reyeb’ laj Lamanita kixtaqla xjek’inkil jun li aatin sa’ xyanq chixjunil lix tenamit, naq moko te’xk’e ta ruq’ sa’ xb’een laj Ammon, chi moko laj Aaron, chi moko laj Omner, chi moko laj Himni, chi moko ani chik reheb’ lix komoneb’ li te’xik chixjultikankil li raatin li Dios, sa’ b’araq chi na’ajej te’wanq wi’, sa’ jar raqal re lix ch’och’eb’.

2 Relik chi yaal, kixtaqla jun li aatin sa’ xyanqeb’, naq moko te’xk’e ta li ruq’ sa’ xb’eeneb’ re xb’ak’b’aleb’, chi moko re xtz’apb’aleb’ sa’ tz’alam; chi moko te’xchuub’aheb’, chi moko te’xsak’eb’, chi moko te’risiheb’ chaq sa’ xch’utleb’aaleb’, chi moko te’xrapleheb’; chi moko te’xkuteb’ rik’in pek, re b’an naq te’ruuq chi ok sa’ rochocheb’ chi moko ramb’ileb’ ta ru, ut sa’ ajwi’ lix santil ochocheb’, ut sa’eb’ lix santil muheb’aaleb’.

3 Ut chi jo’kan te’ruuq chi xik ut chixjultikankil li aatin jo’ chanru li rajomeb’, xb’aan naq li rey ak kijale’ xch’ool choq’ re li Qaawa’, ut chixjunil lix junkab’al, jo’kan naq kixtaqla xjek’inkil li aatin chiru li ch’och’ choq’ re lix tenamit, re naq li raatin li Dios moko taawanq ta xramb’al ru, re b’an taaxik chiru chixjunil li ch’och’, re naq eb’ lix tenamit te’q’unb’esiiq xch’ool chirix li maa’us aj na’leb’ kanab’anb’il chaq xb’aaneb’ lix yuwa’eb’, ut re te’q’unb’esiiq xch’ool naq ras riitz’ineb’ rib’ chixjunileb’, ut naq tento raj naq ink’a’ te’kamsinq, chi moko te’poqlenq, chi moko te’elq’aq, chi moko te’muxuq sumsu, chi moko te’xb’aanu k’a’ruhaq paay chi maa’usilal.

4 Ut anajwan kik’ulman naq chirix naq li rey kixtaqla xjek’inkil li aatin a’in, naq laj Aaron ut eb’ lix komon xkoheb’ sa’ li junjunq chi tenamit, ut sa’ li junjunq chi ochoch neke’loq’onink wi’, ut ke’xxaqab’eb’ li iglees, ut ke’xk’ojob’eb’ laj tij ut laj tzolonel chiru chixjunil li ch’och’ sa’ xyanqeb’ laj Lamanita, re xjultikankil ut xk’utb’al li raatin li Dios sa’ xyanqeb’; ut chi jo’kan k’a’jo’ naq ke’ok chi usaak.

5 Ut chi mil ke’k’ame’ chixnawb’al chirix li Qaawa’; relik chi yaal, chi mil ke’k’ame’ chixpaab’ankil li na’leb’ kanab’anb’il chaq reheb’ laj Nefita; ut kik’ute’ chiruheb’ li tz’iib’anb’il esil ut li profeetil aatin li numsinb’il chaq toj sa’ li kutan a’an.

6 Ut jo’ chanru naq ch’olch’o ru naq li Qaawa’ yo’yo, jo’kan ajwi’ ch’olch’o naq jo’ k’ihaleb’ li ke’paab’an, malaj jo’ k’ihaleb’ li ke’k’ame’ chixnawb’al li yaal, rik’in lix jultikahomeb’ laj Ammon ut eb’ lix komon, jo’ chanru li musiq’ej re k’utb’esink ut re profeetil aatin, ut lix wankil li Dios li nak’anjelank re li sachb’a-ch’oolej rik’ineb’—relik chi yaal, ninye eere, jo’ naq yo’yo li Qaawa’, jo’ k’ihaleb’ laj Lamanita li ke’paab’ank re lix jultikahomeb’, ut ke’jale’ xch’ool choq’ re li Qaawa’, maajo’q’e ke’xjalb’ehi rib’.

7 Xb’aan naq ke’ok choq’ jun tenamit tiik xch’ool; ke’xkanab’ li k’anjeleb’aal re xpo’jikeb’ xch’ool, re ink’a’ chik ke’xpleeti li Dios, chi moko anihaq reheb’ li ras riitz’ineb’.

8 Anajwan, a’ineb’ li ke’jale’ xch’ool choq’ re li Qaawa’:

9 Lix tenamiteb’ laj Lamanita li wankeb’ sa’ li ch’och’ Ismael;

10 Ut jo’kan ajwi’ xkomoneb’ lix tenamiteb’ laj Lamanita li wankeb’ sa’ li ch’och’ Middoni;

11 Ut jo’kan ajwi’ xkomoneb’ lix tenamiteb’ laj Lamanita li wankeb’ sa’ li tenamit Nefi;

12 Ut jo’kan ajwi’ xkomoneb’ lix tenamiteb’ laj Lamanita li wankeb’ sa’ li ch’och’ Xilom, ut li wankeb’ sa’ li ch’och’ Xemlon, ut sa’ li tenamit Lemuel, ut sa’ li tenamit Ximnilom.

13 A’ineb’ ut xk’ab’a’eb’ li tenamit reheb’ laj Lamanita li ke’jale’ xch’ool choq’ re li Qaawa’; ut a’ineb’ li ke’kanab’ank re li k’anjeleb’aal re xpo’jikeb’ xch’ool; relik chi yaal, chixjunileb’ lix k’anjeleb’aal re pleet; ut aj Lamaniiteb’ chixjunileb’.

14 Ut eb’ laj Amalekita moko ke’jale’ ta xch’ool, yal jun ajwi’; chi moko anihaq reheb’ laj Amulonita; eb’ a’an ke’xkawob’resi b’an li raameb’, ut jo’kan ajwi’ li raameb’ laj Lamanita sa’ li jar raqal chi ch’och’ li wankeb’ wi’ rochocheb’, relik chi yaal, ut chixjunileb’ lix k’aleb’aaleb’ ut chixjunileb’ lix tenamiteb’.

15 Jo’kan ut, ak xqak’e xk’ab’a’eb’ chixjunileb’ lix tenamiteb’ laj Lamanita li ke’xjal wi’ xk’a’uxleb’ ut ke’k’ame’ chixnawb’al li yaal, ut ke’jale’ xch’ool.

16 Anajwan ut kik’ulman naq li rey ut eb’ li ke’jale’ chaq xch’ool ke’wan rajom naq taawanq junaq xk’ab’a’eb’, re naq chi jo’kan jachb’ilaq ru xk’ab’a’eb’ rik’ineb’ li ras riitz’ineb’; jo’kan naq li rey kixk’uub’ xna’leb’ rik’in laj Aaron ut rik’in naab’al reheb’ laj tij sa’ xyanqeb’, chirix li k’ab’a’ej te’xk’ul sa’ xb’eeneb’, re naq te’nawe’q ru.

17 Ut kik’ulman naq ke’xk’e choq’ xk’ab’a’eb’, aj Anti-Nefi-Lehi; ut a’in li k’ab’a’ej yeeb’il reheb’, ut moko aj Lamanita ta chik yeeb’il reheb’.

18 Ut ke’ok chi wanq choq’ jun tenamit k’a’jo’eb’ xsak’ahil; relik chi yaal, ut wankeb’ sa’ chaab’ilal rik’ineb’ laj Nefita; jo’kan naq ke’ok chiraatinankil rib’ rik’ineb’, ut moko taaqenb’ileb’ ta chik xb’aan xmajewahom li Dios.