1 Anajwan ut kik’ulman naq chirix naq ke’xaqab’aman lix tenamit laj Ammon sa’ li ch’och’ Jerxon, ut kixaqab’aak ajwi’ jun li iglees sa’ li ch’och’ Jerxon, ut ke’k’ojob’aak li teep aj pleet reheb’ laj Nefita sa’ xsutam li ch’och’ Jerxon, relik chi yaal, sa’ chixjunileb’ li nub’aal chixsutam li ch’och’ Tzarahemla; k’ehomaq reetal, eb’ li teep aj pleet reheb’ laj Lamanita ke’xtaaqe chaq li ras riitz’in chiru li yamyookil ch’och’.

2 Ut chi jo’kan kiwan jun li pleet q’axal nim; relik chi yaal, maajun wa nawb’il ru xkomon a’an sa’ xyanq chixjunil li tenamit sa’ li ch’och’ chalen chaq sa’ li kutan naq laj Lehi ki’el chaq Jerusalen; relik chi yaal, ut lajetq mil reheb’ laj Lamanita ke’kamsiik ut ke’jek’iik chi najt.

3 Relik chi yaal, ut jo’kan ajwi’ kiwan li kamsiik q’axal nim sa’ xyanq lix tenamit laj Nefi; a’b’anan eb’ laj Lamanita ke’alinasiik ut ke’jek’iik, ut eb’ lix tenamit laj Nefi ke’sutq’i wi’chik sa’ xch’och’eb’.

4 Ut anajwan a’in jun kutan kiwan wi’ nimla rahil ch’oolejil ut yaab’ak li ki’ab’iman chiru chixjunil li ch’och’, sa’ xyanqeb’ chixjunil lix tenamit laj Nefi—

5 Relik chi yaal, xyaab’eb’ li xmalka’an li ke’yaab’ak xb’aan xb’eelomeb’, ut jo’kan ajwi’ li yuwa’b’ej li ke’yaab’ak xb’aaneb’ li ralal, ut li rab’inb’ej xb’aan li ras riitz’in; relik chi yaal, li ras riitz’in xb’aan li yuwa’b’ej; ut chi jo’kan ki’ab’iman xyaab’ li rahil ch’oolej sa’ xyanqeb’ chixjunil, ke’yaab’ak xb’aaneb’ li rech alaleb’ li ke’kamsiik chaq.

6 Anajwan ut relik chi yaal naq a’in jun rahil ch’oolejil kutan; relik chi yaal, xq’ehil li rahil ch’oolej, ut xq’ehil naab’al li kuyuk sa’ ut tijok.

7 Ut jo’kan naraqe’ li ro’laju chihab’ rawa’b’ejileb’ laj raqol aatin sa’ xb’een lix tenamit laj Nefi;

8 Ut a’in resilal laj Ammon ut eb’ lix komon, lix b’eenikeb’ sa’ li ch’och’ Nefi, li rahilal ke’xk’ul sa’ li ch’och’, lix rahileb’ xch’ool, ut lix ch’a’ajkilaleb’, ut lix sahileb’ xch’ool li maak’a’ xtawb’al xyaalal, ut lix k’ulunikeb’ ut xkolb’aleb’ rix li komon sa’ li ch’och’ Jerxon. Anajwan ut, li Qaawa’, laj Tojol rixeb’ chixjunil li winq, chirosob’tesihaq chi junelik li raameb’.

9 Ut a’in resileb’ li pleet ut li wech’ok-ib’ sa’ xyanqeb’ laj Nefita, jo’ ajwi’ li pleet ke’wan wi’ laj Nefita rik’ineb’ laj Lamanita, ut ak raqenaq li ro’laju chihab’ rawa’b’ejileb’ laj raqol aatin.

10 Ut chirix li xb’een chihab’ toj sa’ li ro’laju xk’ehe’ chi uxmank lix sachlijikeb’ k’iila mil chi yu’amej; relik chi yaal, xk’ehe’ chi ilmank li xuwajelil hoyok kik’.

11 Ut lix tib’eleb’ k’iila mil yokyookeb’ chi taq’a sa’ li ch’och’, ut lix tib’eleb’ k’iila mil yookeb’ chi q’aak chi tub’tu chiru lix b’een li ch’och’; relik chi yaal, ut k’iila mil yookeb’ chi yaab’ak xb’aan xsachikeb’ li rech alal, xb’aan naq wan rajom naq te’xxuwa, jo’ chanru lix yeechi’ihom li Qaawa’, naq k’eeb’ileb’ chi wank sa’ li rahilal maak’a’ roso’jik.

12 A’ut k’iila mil chik raheb’ xch’ool chi yaal xb’aan xsachikeb’ li rech alal, a’b’anan neke’saho’ ut neke’nimob’resiik xch’ooleb’ rik’in xyo’oninkil, ut neke’xnaw ajwi’, jo’ chanru lix yeechi’ihom li Qaawa’, naq waklesinb’ileb’ chi wank sa’ xnim uq’ li Dios, sa’ jun wanjik re sahil ch’oolejil li maajo’q’e na’oso’.

13 Ut chi jo’kan naqil chanru xnimal li moko juntaq’eeteb’ ta wi’ li winq xb’aan li maak ut li q’etok aatin, ut lix wankilal laj tza, li nachal xb’aan xb’alaq’il li na’leb’ li kixk’uub’ a’an re xra’alenkil xch’ooleb’ li winq.

14 Ut chi jo’kan naqil li nimla b’oqok re naq te’xyal xq’e li winq chi k’anjelak sa’eb’ li rawimq li Qaawa’; ut chi jo’kan naqil xnimal xyaalal naq wan li rahil ch’oolejil, ut jo’kan ajwi’ naq wan li sahil ch’oolejil—li rahil ch’oolejil xb’aan li kamk ut li sache’k sa’ xyanqeb’ li winq, ut li sahil ch’oolejil xb’aan lix saqen li Kristo choq’ re li yu’amej.