1 E, pe ana o a’u o se agelu, ma mafai ona ou maua le moomooga o lo’u loto, ina ia mafai ona ou alu atu ma tautala atu ma le pu a le Atua, ma i se leo e lūlūina ai le eleele, ma alaga atu le salamo i tagata uma!

2 Ioe, po ua ou alaga atu i agaga uma taitoatasi, i se leo e pei o le faititili, le salamo ma le fuafuaga o le togiolaina, ina ia latou salamo ma o mai i lo tatou Atua, ina ia le toe i ai se faanoanoa i luga o le lalolagi uma.

3 Ae faauta, o a’u o se tagata, ma ua ou agasala i lo’u manao; ona e tatau ona ou malie i mea ua tuuina mai e le Alii ia te a’u.

4 E le tatau ona ou suia i o’u mana’oga le poloaiga mausali a le Atua amiotonu, ona ua ou iloa e faamatuu mai e ia i tagata e tusa ma o latou manao, pe mo le oti po o le ola; ioe, ua ou iloa e tofi mai e ia i tagata, ioe, e poloai mai e ia ia te i latou poloaiga e le masuia, e tusa ma o latou loto, pe o i latou e mo le faaolataga, po o le faafanoga.

5 Ioe, ma ua ou iloa ua oo mai le lelei ma le leaga i luma o tagata uma; o ia o lē ua ia lē iloaina le lelei mai le leaga ua lē tausalaina; ae o ia o lē ua ia iloaina le lelei ma le leaga, e tuuina mai ia te ia e tusa ma ona manao, pe manao o ia i le lelei po o le leaga, le ola po o le oti, le olioli po o le faanoanoa o le mafaufau.

6 O lenei, ona ua vaai ua ou iloa nei mea, aisea ou te manao tele ai nai lo le faia o le galuega ua valaauina ai au?

7 Aisea ou te manao ai pe a na o a’u o se agelu, ina ia mafai ona ou tautala atu ai i tuluiga uma o le lalolagi?

8 Aua faauta, ua faamatuu mai e le Alii i atunuu uma, o lo latou lava atunuu ma gagana, latou te a’oa’o atu ai lana afioga, ioe, i le poto, o mea uma ua ia silafia e tatau ona latou maua; o lea ua tatou vaai ai e faatonu mai le Alii i le poto, e tusa ma le mea ua tonu ma moni.

9 Ua ou iloa le mea ua poloaiina ai a’u e le Alii, ma ua ou mitamita ai. Ou te le mitamita ona o a’u lava ia, ae ou te mitamita i le mea ua poloaiina ai a’u e le Alii; ioe, ma o lo’u mitamitaga lenei, atonu ia mafai ona avea a’u o se meafaigaluega i aao o le Atua e aumai ai se agaga i le salamo; ma o lo’u olioli lea.

10 Ma faauta, a ou vaai atu i le toatele o o’u uso ua salamo faamaoni, ma ua o mai i le Alii lo latou Atua, ona faatumulia ai lea o lo’u agaga i le olioli; ona ou manatua lea o mea na faia e le Alii mo a’u, ioe, e oo lava i lona faafofoga mai i la’u tatalo; ioe, ona ou manatua ea lea o lona aao alofa mutimutivale na ia faaloaloa mai ia te a’u.

11 Ioe, ma ou te manatua foi le faatagataotauaina o o’u tamā; ona ua ou iloa moni lava sa lavea’iina i latou e le Alii mai le pologa, ma o lenei mea na ia faatuina ai lana ekalesia; ioe, o le Alii le Atua, o le Atua o Aperaamo, o le Atua o Isaako, ma le Atua o Iakopo, na lavea’iina i latou mai le pologa.

12 Ioe, ua ou manatua pea le faatagataotauaina o o’u tamā; ma o lena lava Atua e tasi o lē na lavea’iina i latou mai lima o tagata Aikupito, na lavea’iina i latou mai le pologa.

13 Ioe, ma o lena lava Atua e tasi na faatuina lana ekalesia i totonu o i latou; ioe, ma o lena lava Atua na valaauina a’u i se valaauga paia, e tala’i atu ana afioga i lenei nuu, ma tuuina mai ia te a’u le manuia tele, o se mea ua atoatoa ai lo’u olioli.

14 Peitai ua le na o lo’u lava manuia ua ou olioli ai, ae ua sili atu le atoatoa o lo’u olioli ona o le manuia o o’u uso, o ē na o a’e i le laueleele o Nifae.

15 Faauta, sa latou galulue malolosi, ma ua latou aumai fua e tele; ma o le a tele lava lo latou taui!

16 O lenei, pe a ou mafaufau i le manuia o o’u uso nei e segia ese atu lo’u agaga, ua oo lava e peiseai ua vavae ese atu ai mai le tino, e pei o lea, i le tele naua o lo’u olioli.

17 Ma o lenei ia talosia lava ia tuuina mai e le Atua ia te i latou nei, o o’u uso, ia mafai ona latou nonofo ai i le malo o le Atua; ioe, ma i latou uma foi o ē o fua o a latou galuega, ina ia latou le toe ulufafo atu, ae ia mafai ona latou viia o ia e faavavau; ma ia talosia lava ia tuuina mai e le Atua ia faia e tusa ma a’u upu, e pei lava ona ou tautala atu ai. Amene.