1 Ut kik’ulman sa’ xtiklajik li ro’ chihab’ rawa’b’ejileb’ ki’ok chi wank jun li wech’ok-ib’ sa’ xyanq li tenamit; xb’aan naq jun winq, aj Amlici nayeeman re, rik’in naq a’an jun winq q’axal seeb’ xb’alaq’, relik chi yaal, jun winq nim xna’leb’ jo’ chanru xna’leb’ li ruchich’och’, okenaq sa’ xk’anjelil li winq li kikamsink re laj Gideon rik’in yok’leb’ ch’iich’, li kitaqlaak xkamsinkil jo’ chanru li chaq’rab’—

2 Anajwan laj Amlici a’in, rik’in xseeb’al xb’alaq’, kixk’am chaq naab’al li tenamit rik’in; toj reetal naq q’axal ke’ok chi nimank xwankil; ut ke’ok chixyalb’aleb’ xq’e re te’xxaqab’ laj Amlici re taawanq choq’ rey sa’ xb’een li tenamit.

3 Anajwan rik’in a’in ke’chal xk’a’uxleb’ li ani wankeb’ sa’ li iglees, ut jo’kan ajwi’ chixjunileb’ li moko ke’k’ame’ ta xb’aan li q’unb’esink ch’oolej naxb’aanu laj Amlici; xb’aan naq ke’xnaw naq jo’ naxye lix chaq’rab’eb’, naq tento taaxaqab’amanq xkomon li na’leb’ a’in rik’in xyaab’ xkuxeb’ li tenamit.

4 Jo’kan ut, wi ta taaruuq naq laj Amlici taak’ule’q xb’aan xyaab’ xkux li tenamit, a’an, xb’aan naq winq aj maak, tixmaq’ raj chiruheb’ li k’a’ru xk’ulub’eb’ ut li kanab’anb’ileb’ chixb’aanunkil sa’ li iglees; xb’aan naq a’an kiraj xsachb’al lix iglees li Dios.

5 Ut kik’ulman naq eb’ li tenamit ke’xch’utub’atq rib’ chiru chixjunil li ch’och’, li junjunq chi winq a’ yaal k’a’ru li k’oxlanb’il xb’aan, ma re xk’ulb’al malaj re xtz’eqtaanankil laj Amlici, chi jachjookeb’ ru sa’ jar molam, ut naab’al li wech’ok kiwan ut li wech’ok-ib’ sachol ch’oolej chirib’ileb’ rib’.

6 Ut chi jo’kan ke’xch’utub’eb’ rib’ re xk’eeb’al xyaab’eb’ xkux chirix li na’leb’; ut kik’ojob’aman xyaab’eb’ xkux chiruheb’ laj raqol aatin.

7 Ut kik’ulman naq kitz’eqtaanaak laj Amlici xb’aan xyaab’eb’ xkux li tenamit, jo’kan naq moko kik’ehe’ ta jo’ rey sa’ xb’een li tenamit.

8 Anajwan rik’in a’in k’a’jo’ ke’saho’ xch’ool li ani moko neke’k’ulub’an ta re; a’b’an laj Amlici kireek’asiheb’ li ani neke’k’ulub’an re chi josq’o’k rik’ineb’ li moko neke’k’ulub’an ta re.

9 Ut kik’ulman naq eb’ a’an ke’xch’utub’ rib’, ut ke’xk’ojob’ laj Amlici re taawanq choq’ xreyeb’.

10 Anajwan, naq kik’ehe’ laj Amlici choq’ rey sa’ xb’eeneb’, kixtaqlaheb’ naq te’xchap li k’anjeleb’aal re pleet chiruheb’ li ras riitz’ineb’, ut a’in kixb’aanu re taaruuq tixk’eheb’ rub’el xwankil.

11 Anajwan eb’ lix tenamit laj Amlici rik’in ajwi’ xk’ab’a’ laj Amlici naq nawb’ileb’ ru, a’aneb’ laj Amlicita neke’yehe’ re; ut li jun ch’ol chik a’aneb’ aj Nefita nekeyehe’ re, malaj lix tenamit li Dios.

12 Jo’kan naq lix tenamiteb’ laj Nefita ak neke’xnaw k’a’ru rajomeb’ laj Amlicita, ut chi jo’kan ke’xkawresi rib’ chixk’ulb’aleb’; relik chi yaal, ke’xkawresi rib’ rik’in yok’leb’ ch’iich’, ut rik’in k’onk’ookil ch’iich’ ut rik’in roq tzimaj, ut rik’in tzimaj, ut rik’in pek, ut rik’in jok’, ut rik’in li k’iila paay chi k’anjeleb’aal re pleet, li jar raqal wan.

13 Ut chi jo’kan ke’kawresiman chixk’ulb’aleb’ laj Amlicita sa’ xq’ehil lix chalikeb’. Ut ke’xaqab’aak laj taqlanel, ut li taqenaqil aj taqlanel, ut xb’eenileb’ aj taqlanel, jo’ chanru li rajlankileb’.

14 Ut kik’ulman naq laj Amlici kixkawresiheb’ lix winq rik’in li k’iila paay chi k’anjeleb’aal re pleet, li jar raqal wan; ut kixxaqab’eb’ ajwi’ aj taqlanel ut aj jolominel sa’ xb’een lix tenamit, re xk’amb’aleb’ xb’e sa’ xpleetinkileb’ li ras riitz’ineb’.

15 Ut kik’ulman naq ke’k’ulun laj Amlicita sa’ xb’een li tzuul Amnihu, li wan sa’ releb’ saq’e chirix li nima’ Sidon, a’ li nanume’ chire li ch’och’ Tzarahemla; ut aran ke’xtikib’ xpleetinkileb’ laj Nefita.

16 Anajwan laj Alma, rik’in naq a’an xb’eenil aj raqol aatin ut aj jolominel sa’ xb’een lix tenamit laj Nefi, jo’kan naq kitaqe’ rochb’eeneb’ lix tenamit; relik chi yaal, rochb’eeneb’ laj taqlanel ut eb’ li xb’eenil aj taqlanel, relik chi yaal, sa’ xjolomileb’ lix teep aj pleet, re xpleetinkileb’ laj Amlicita.

17 Ut ke’ok chixkamsinkileb’ laj Amlicita sa’ xb’een li tzuul chirix Sidon sa’ releb’ saq’e. Ut eb’ laj Amlicita ke’xyal rib’ chiruheb’ laj Nefita rik’in xnimaleb’ xmetz’ew, toj reetal naq naab’al reheb’ laj Nefita ke’t’ane’ chiruheb’ laj Amlicita.

18 A’b’anan li Qaawa’ kixk’e xmetz’ew li ruq’eb’ laj Nefita, jo’kan naq ke’xkamsiheb’ laj Amlicita rik’in nimla kamsink, jo’kan naq ke’ok chi eelelik chiruheb’.

19 Ut kik’ulman naq eb’ laj Nefita ke’xtaaqeheb’ laj Amlicita chiru chixjunil li kutan a’an, ut ke’xkamsiheb’ rik’in nimla kamsink, jo’kan naq ke’kamsiik reheb’ laj Amlicita kab’laju mil rik’in oob’ cient ut kab’laju xka’k’aal li aamej; ut reheb’ laj Nefita ke’kamsiik waqib’ mil rik’in oob’ cient ut wiib’ xkaak’al chi aamej.

20 Ut naq laj Alma ink’a’ chik kiru chixtaaqenkileb’ laj Amlicita, kik’ulman naq kixtaqlaheb’ lix tenamit chixyiib’ankil lix muheb’aal t’ikr sa’ li ru taq’a Gideon, ut li ru taq’a k’eeb’il xk’ab’a’ jo’ chanru laj Gideon a’an li kikamsiik xb’aan ruq’ laj Nehor rik’in yok’leb’ ch’iich’; ut sa’ li ru taq’a a’in eb’ laj Nefita ke’xyiib’ lix muheb’aal t’ikr re xnumsinkil li q’ojyin.

21 Ut laj Alma kixtaqlaheb’ aj muqmuukil k’ehol eetal re xtaaqenkil li rela’eb’ laj Amlicita, re tixnaw chirix li na’leb’ ke’xk’uub’ ut lix muqmuukil ajomeb’, re naq taaruuq chixkawresinkil rib’ chixramb’aleb’, re naq tixkol rix lix tenamit re naq ink’a’ te’sache’q.

22 Anajwan, eb’ li kixtaqla chixk’eeb’al reetal lix teepeb’ laj Amlicita, a’aneb’ laj Tzeram, laj Amnor, laj Manti, ut laj Limher xk’ab’a’eb’; a’ineb’ li xkoheb’ rik’in xwinqeb’ re xk’eeb’al reetal lix teepaleb’ laj Amlicita.

23 Ut kik’ulman naq chi wulajaq chik ke’sutq’i sa’ lix teepeb’ laj Nefita q’axal sa’ aanil, chi q’axal sachsookeb’ xch’ool, ut chi k’a’jo’ li xiw chapb’ileb’ wi’, ut ke’xye:

24 K’ehomaq reetal, kiqataaqeheb’ lix teepeb’ laj Amlicita, ut k’a’jo’ xsachik qach’ool naq sa’ li ch’och’ Minon, chi taqenaq sa’ xb’een li ch’och’ Tzarahemla, sa’ xb’ehil li ch’och’ Nefi, kiqil jun teepeb’ laj Lamanita k’i rajlankileb’, ut k’ehomaq reetal, eb’ laj Amlicita ke’xjunaji rib’ rik’ineb’;

25 Ut chalenaqeb’ sa’ xb’eeneb’ li qas qiitz’in sa’ li ch’och’ a’an, ut eb’ a’an yookeb’ chaq chi eelelik chiruheb’ rik’in lix ketomqeb’, ut li rixaqileb’, ut lix kok’aleb’, sa’ xjayal li qatenamit; ut wi ink’a’ naqaseeb’a qib’ te’reechani li qatenamit, ut eb’ li qayuwa’, ut li qixaqil, ut li qakok’al te’kamsiiq.

26 Ut kik’ulman naq eb’ lix tenamit laj Nefi ke’xk’ameb’ lix muheb’aal t’ikr, ut ke’el chaq sa’ li ru taq’a Gideon sa’ xjayal lix tenamiteb’, a’an li tenamit Tzarahemla.

27 Ut k’ehomaq reetal, naq yookeb’ chixq’axb’al li nima’ Sidon, eb’ laj Lamanita ut laj Amlicita, chi q’axal k’iheb’, ka’ch’in chik ma jo’ xk’ihaleb’ li samahib’ chire li palaw, ke’chal sa’ xb’eeneb’ chixsachb’aleb’.

28 A’b’anan, eb’ laj Nefita k’eeb’ileb’ xmetz’ew xb’aan li ruq’ li Qaawa’, rik’in naq ke’tijok chaq chi anchaleb’ xmetz’ew re, naq a’an tixkoleb’ sa’ ruq’eb’ chaq li xik’ neke’ilok reheb’, jo’kan naq li Qaawa’ kirab’i li relajihomeb’, ut kixk’eheb’ xmetz’ew, ut eb’ laj Lamanita ut laj Amlicita ke’t’ane’ chiruheb’.

29 Ut kik’ulman naq laj Alma kipleetik rik’in laj Amlici rik’in li yok’leb’ ch’iich’, chi xaqxo chiru; ut chi anchaleb’ xmetz’ew ke’xyal xmetz’ew chirib’ileb’ rib’.

30 Ut kik’ulman naq laj Alma, rik’in naq a’an jun winq re li Dios, ut eek’asinb’il rik’in nimla paab’aal, kixjap re chixyeeb’al: At Qaawa’, chiwanq aawuxtaan ut chakol inyu’am, re tinwanq choq’ k’anjeleb’aal sa’ laa wuq’ re xkolb’al ut xk’uulankil li tenamit a’in.

31 Anajwan chirix naq laj Alma kixye li aatin a’in kixyal wi’chik ru rik’in laj Amlici, ut kik’ehe’ xmetz’ew, jo’kan naq kixkamsi laj Amlici rik’in li yok’leb’ ch’iich’.

32 Ut kixyal ajwi’ ru rik’in lix reyeb’ laj Lamanita; a’b’an lix reyeb’ laj Lamanita ki’eelelik chi q’ajel-ix chiru laj Alma, ut a’an kixtaqlaheb’ lix moos aj kolol rix re xyalb’al ru rik’in laj Alma.

33 A’b’an laj Alma, rochb’eeneb’ lix moos aj kolol rix, ke’xpleetiheb’ lix moos aj kolol rix li rey aj Lamanita toj reetal naq kixkamsiheb’ ut kixsutq’isiheb’ chirix.

34 Ut chi jo’kan kixpa ru li ch’och’, malaj ut li uul, li wan chire li nima’ Sidon sa’ rokeb’ saq’e, ut kixkut sa’ lix ha’il Sidon lix tib’eleb’ laj Lamanita li ke’kamsiik chaq, re naq te’wanq xb’e lix tenamit chi q’axonk ut chixyalb’al ru rik’ineb’ laj Lamanita ut eb’ laj Amlicita li wankeb’ chire li nima’ Sidon sa’ rokeb’ saq’e.

35 Ut kik’ulman naq chirix naq chixjunileb’ ke’xq’ax li nima’ Sidon, naq eb’ laj Lamanita ut laj Amlicita ke’ok chi eelelik chiruheb’, us ta k’a’jo’ xk’ihaleb’ chi ink’a’ kiru xk’eeb’aleb’ sa’ ajl.

36 Ut ke’eelelik chiruheb’ laj Nefita sa’ xjayal li yamyookil ch’och’ li wan sa’ rokeb’ saq’e ut sa’ xnim li saq’e, aran chirix xnub’aal li ch’och’; ut eb’ laj Nefita ke’xtaaqeheb’ rik’in xmetz’eweb’, ut ke’xkamsiheb’.

37 Relik chi yaal, yalaq b’ar ke’k’ule’, ut ke’kamsiik ut ke’alinasiik, toj reetal naq ke’jek’iik sa’ xjayal li rokeb’ saq’e, ut sa’ xnim li saq’e, toj reetal naq ke’wulak sa’ li yamyookil ch’och’ Hermountz nayeeman re; ut a’an li jun raqal chi yamyookil ch’och’ neke’wanje’ wi’ li k’iche’ xul q’axal aj ti’oneleb’.

38 Ut kik’ulman naq ke’kam naab’al sa’ li yamyookil ch’och’ xb’aan xtoch’olaleb’, li ke’k’uxe’ xb’aaneb’ li xul a’an ut jo’kan ajwi’ li so’sol aj rub’el choxa; ut ke’tawe’ lix b’aqeleb’, ut ke’tuub’aak sa’ xb’een li ch’och’.