1 Kiiō ālikin Alma eaar kōnono naan kein, raar ijjilōkļo̧k n̄an e im kōņaan jeļā eļan̄n̄e rej aikuj tōmak ilo juon Anij, bwe ren maron̄ bōk leen eo eaar kōnono kake, ak ekōjkan rej maron̄ kalbwini ine eo, ak ine eo eaar kōnono kake, eo eaar ba ej aikuj in kalbwini ilo burueer; ak ilo wāween ōt rej aikuj jino kōjerbal tōmak eo aer.

2 Im Alma eba n̄an er: Lo, kom̧ ar ba bwe kom̧ij jab maron̄ kabun̄-jar n̄an ami Anij kōnke kar kadiwōjļo̧k kom̧ jān im̧ōn kwelo̧k ko ami. A lo, ij ba n̄an kom̧, eļan̄n̄e kom̧ij ļōmņak bwe kom̧ij jab maron̄ kabun̄-jar n̄an Anij, eļap ami bōd, im kom̧ij aikuj lin̄ōri jeje ko rekwōjarjar; eļan̄n̄e kom̧ij ļōmņak bwe raar katakin kom̧ men in, kom̧ij jab meļeļe er.

3 Kom̧ij keememej ke n̄an kōnono jān ta Zinōs, rikanaan in etto eo, eaar ba kōn jar ak kabun̄-jar?

4 Bwe eaar ba: Kwōj tūriam̧o, O Anij, bwe Kwaar ron̄ jar eo aō, em̧ool ke iaar pād ilo āne jem̧aden; aaet, Kwaar tūriam̧o ke iaar jar kōn ro raar aō rikōjdat, im Kwaar ukōt tok er n̄an eō.

5 Aaet, O Anij, im kwaar tūriam̧o n̄an eō ke iaar kūr n̄an Eok ilo meļaaj eo aō; ke iaar kūr n̄an Eok ilo jar eo aō, im Kwaar ron̄jake eō.

6 Im bar juon alen, O Anij, ke iaar ro̧o̧l n̄an m̧weo im̧ō Kwaar ron̄jake eō ilo jar eo aō.

7 Im ke iaar ilo̧k n̄an jikū ittino, O Irooj, im kar jar n̄an Eok, kwaar ron̄jake eō.

8 Aaet, Kwōj tūriam̧o n̄an ro nejūm̧ n̄e rej kūr n̄an Eok, n̄an ron̄ jān Eok im jab jān armej, im Kwōnaaj ron̄jake er.

9 Aaet, O Anij, Kwaar tūriam̧o n̄an eō, im ron̄jaki kūr ko aō ilubwiljin jarlepju ko Am̧.

10 Aaet, im Kwaar barāinwōt ron̄jake eō ke kar kadiwōjļo̧k eō im ro aō rikōjdat kar dike eō; aaet, Kwaar ron̄jake kūr ko aō, im kar ļōkatip ippān rikōjdat ro aō, im Kwaar loļo̧k er kōn Am̧ illu kōn ko̧kkure ejidimkij.

11 Im Kwaar ron̄jake eō kōnke en̄taan ko aō im aō m̧ool; im ej kōnke eo Nejūm̧ āindein Kwaar tūriam̧o n̄an eō, kōn menin Inaaj kūr n̄an Kwe ilo aolep en̄taan ko aō, bwe ilo Kwe ej aō m̧ōņōņō, bwe Kwaar ukōtļo̧k ekajet ko Am̧ jān eō, kōnke eo Nejūm̧.

12 Im kiiō Alma eba n̄an er: Kom̧ij tōmak ke jeje kein rekwōjarjar ko kar jeje jān er etto?

13 Lo, eļan̄n̄e kom̧ij, kom̧ aikuj tōmak ta Zinōs eaar ba; bwe lo eaar ba: Kwaar ukōtļo̧k ekajet ko Am̧ kōnke eo Nejūm̧.

14 Kiiō lo, ro jeiū im jatū, In kajjitōk eļan̄n̄e kom̧ ar kōnono jān jeje ko rekwōjarjar? Eļan̄n̄e kom̧ ar, ekōjkan ami kar jab tōmak ioon eo Nejin Anij?

15 Bwe ejjab kar jeje bwe Zinōs make eaar kōnono men kein, ak Zenōk barāinwōt eaar kōnono men kein—

16 Bwe lo, eaar ba: Kwōj illu, O Irooj, ippān armej rein, kōnke reban meļeļe tūriam̧o ko Am̧ ko Kwaar likūt ioer kōnke eo Nejūm̧.

17 Im kiiō, ro jeiū im jatū, kom̧ij lo bwe rikanaan eo kein karuo in etto eaar kam̧ool kōn Nejin Anij, im kōnke armej reban meļeļe naan ko an raar kade e n̄an mej.

18 A lo, ejjab aolep in; rein rej ro wōt raar kōnono kōn Nejin Anij.

19 Lo, Ekar kōnono kake jān Moses; aaet, im lo juon kakōļļe kar kotak ilo āne jem̧aden, bwe jabdewōt ej reilo̧k n̄an e en maron̄ mour. Im elōn̄ raar reilo̧k im mour.

20 Ak eiiet raar jeļā meļeļein men kein, im men in kōnke pen in burueer. A elōn̄ ro jon̄an pen in burueer raar jab reilo̧k, kōn menin raar jako. Kiiō unin aer kar jab reilo̧k ej kōnke raar jab tōmak bwe enaaj kar kōmour er.

21 O ro jeiū im jatū, eļan̄n̄e kom̧ maron̄ kar mour jān wōt reilo̧k bwe kom̧in maron̄ mour, kom̧in kar ke m̧ōkaj im reilo̧k, ak kom̧in ke kar kapene wōt būruōmi ilo jab tōmak, im jowan, bwe kom̧in jab reilo̧k, bwe kom̧in maron̄ jako?

22 Eļan̄n̄e āindein, wo naaj itok ioomi; ak eļan̄n̄e ejjab āindein, innām kom̧in reilo̧k im jino tōmak ilo Nejin Anij, bwe Enaaj itok n̄an lo̧mo̧o̧ren armej ro An, im bwe Enaaj en̄taan im mej n̄an pinmuur kōn jero̧wiwi ko aer, im bwe Enaaj bar jerkak jān ro remej, eo enaaj kakūrm̧ool jerkakpeje, bwe aolep armej renaaj jutak Im̧aan, n̄an ekajet ilo raan eo āliktata im raan in ekajet, ekkar n̄an jerbal ko aer.

23 Im kiiō, ro jeiū im jatū, ikōņaan bwe kom̧in kab kalbwini naan eo ilo būruōmi, im ke ej jino n̄an juļ em̧ool āindein ņa kōņin kōn tōmak eo ami. Im lo, enaaj erom juon wōjke, im jebarļo̧k ilo kom̧ n̄an mour eo ejjeļo̧k jem̧ļo̧kin. Innām Anij en lewōj n̄an kom̧ bwe eddo ko ami ren mera; kōn lan̄lōn̄ an Nejin. Im em̧ool aolep men in kom̧ maron̄ kōm̧m̧an eļan̄n̄e kom̧ kōņaan. Amen.