1 O lenei ina ua uma ona tautala atu e Alema nei upu, sa latou fe’au mai ia te ia i le fia iloa pe tatau ona latou talitonu i se Atua e tasi, ina ia mafai ona latou mauaina o lenei fua lea sa ia tautala i ai, pe faapefea ona latou totō o le fatu, po o le upu lea na ia tautala i ai, lea na fai mai o ia e ao ina totōina i o latou loto; po o le a le ala e tatau ona latou amata ona faatino ai lo latou faatuatua.

2 Ma sa fai atu Alema ia te i latou: Faauta, sa outou fai mai ua le mafai ona outou tapuai atu i lo outou Atua ona ua tutuli ese outou i fafo mai i o outou sunako. Ae faauta, ou te fai atu ia te outou, afai ua outou manatu ua le mafai ona outou tapuai atu i le Atua, ua outou matuā sese lava, ma e tatau ona outou sailiili i tusitusiga paia; afai tou te manatu ua latou a’oa’o mai ia te outou lenei mea, ua outou le malamalama i ai.

3 Tou te manatua lo outou faitauina o le mea na fai mai ai Senosa, le perofeta anamua, e uiga i le tatalo po o le tapuaiga?

4 Auā sa fai mai o ia: Ua e alofa mutimutivale lava, le Atua e, ona ua e faafofoga mai i la’u tatalo, a’o o’u i ai lava i le vao; ioe, sa e alofa mutimutivale ina ua ou tatalo atu e uiga ia te i latou o e na avea ma o’u fili, ma sa e liliu mai i latou ia te a’u.

5 Ioe, le Atua e, sa e alofa mutimutivale mai ia te a’u ina ua ou tagi atu ia te oe i lo’u fanua; ina ua ou tagi atu ia te oe i la’u tatalo, sa e faafofoga mai ia te a’u.

6 O lenei foi, le Atua e, ina ua ou alu atu i lo’u fale sa e faafofoga mai ia te a’u i la’u tatalo.

7 Ma ina ua ou alu atu i lo’u afeafe, le Alii e, ma tatalo atu ia te oe, sa e faafofoga mai ia te a’u.

8 Ioe, e te alofa mutimutivale i au fanau pe a latou tagi atu ia te oe, ina ia e faafofogaina i latou ae le o tagata, ma o le a e faafofoga mai lava ia te i latou.

9 Ioe, le Atua e, ua e alofa mutimutivale mai ia te a/u, ma e faafofogaina a’u tagi i le lotolotoi o a’u faapotopotoga.

10 Ioe, ma sa e faafofoga mai foi ia te a’u, ina ua tuli ese a’u i fafo ma inosia e o’u fili; ioe, sa e faafofoga mai i a’u tagi, ma sa e toatamai i o’u fili, ma sa e asiasi mai ia te i latou i lou toasa ma le faafanoga vave.

11 Ma sa e faafofoga mai ia te a’u ona o o’u puapuaga ma lo’u faamaoni; ma ona o lou Alo ua e alofa mutimutivale tele mai ai ia te a’u, o lea o le a ou tagi atu ai ia te oe i o’u puapuaga uma, ona o oe ua i ai lou olioli; ona ua e liliu ese au faamasinoga mai ia te a’u, ona o lou Alo.

12 Ma o lenei sa fai atu Alema ia te i latou: Tou te talitonu ea i ia tusitusiga paia na tusia e i latou o anamua?

13 Faauta, afai tou te talitonu i ai, e ao ina outou talitonu i le mea ua fai mai ai Senosa; auā faauta, na fai mai o ia: Ua e liliu ese au faamasinoga ona o lou Alo.

14 O lenei faauta, o’u uso e, ou te fia fesili atu pe ua outou faitauina ea tusitusiga paia? Afai ua outou faitauina, e mafai faapefea ona outou le talitonu i le Alo o le Atua?

15 Ona ua le tusia e faapea ua na’o Senosa sa tautala mai e uiga i nei mea, ae sa tautala foi Senoka e uiga i nei mea—

16 Auā faauta, sa fai mai o ia: Ua e toatamai, le Alii e, i lenei nuu, ona ua latou le fia malamalama i lou alofa mutimutivale ia ua e to mai i luga o i latou ona o lou Alo.

17 Ma o lenei, ou uso e, ua outou vaai ua molimau mai se perofeta lona lua o anamua e uiga i le Alo o le Atua, ma ona sa le fia malamalama tagata i ana upu, o lea na latou fetogi ai o ia i maa ia oti ai.

18 Peitai faauta, ua le ona pau lea; ua le na’o i laua ia e na tautatala mai e uiga i le Alo o le Atua.

19 Faauta, sa tautalagia o ia e Mose; ioe, ma faauta sa sii a’e i luga se faatusa i le vao, e faapea o soo se tasi e tepa a’e i ai e mafai ona ola. Ma e toatele sa tepa i ai ma ola ai.

20 Peitai e toaitiiti sa malamalama i le uiga o ia mea, ma o le pogai ona o le maaa o o latou loto. Peitai sa i ai le toatele o e sa sili atu ona maaa tele sa latou le fia tetepa a’e ai, ma o lea na fano ai i latou. O lenei o le pogai na latou le fia tetepa a’e ai, ona sa latou le talitonu o le a faamaloloina ai i latou.

21 E, o’u uso e, afai e mafai ona faamaloloina outou i le na’o le tepa atu o o outou mata ina ia mafai ona faamaloloina outou, pe tou te le fia tetepa vave atu ea, pe sili atu ia te outou le faamaaa o o outou loto i le le talitonu, ma faapaie, ma outou le fia tetepa atu ai o outou mata, ma outou fano ai?

22 Afai o lea, o le a oo mai le malaia i o outou luga; ae afai e le o lea, ona tetepa a’e lea o o outou mata ma amata ona talitonu i le Alo o le Atua, o le a afio mai o ia e togiola ona tagata, ma o le a mafatia ma maliu o ia e togiola mo a latou agasala; ma o le a toetu mai o ia mai le oti, lea o le a faataunuu ai le toetutū, o le a laulaututū ai tagata uma i ona luma, e faamasinoina i le aso faamasino mulimuli, e tusa ma a latou galuega.

23 Ma o lenei, o’u uso e, ou te manao ia outou totō le upu lenei i o outou loto, ma a amata ona tupu a’e ia faapea ona tausia i lo outou faatuatua. Ma faauta, o le a avea ma laau, e totogo ae i totonu o outou i le ola tumau e faavavau. Ma ona talosia lea ia tuuina mai e le Atua ia te outou ia māmā a outou avega, e ala i le olioli o lona Alo. Ma o nei mea uma lava e mafai ona outou faia, pe afai tou te loto i ai. Amene.