1 O lenei sa oo ina ua uma ona faaiu e Amoleka nei upu, sa latou tuumuli ese i latou lava mai le motu o tagata ma o mai i le laueleele o Seasona.

2 Ioe, ma o le vaega na totoe o le au uso, ina ua uma ona latou tala’i atu o le upu ia sa Soramā, sa latou o mai foi i le laueleele o Seasona.

3 Ma sa oo ina ua uma ona talanoa faatasi o le vaega sili ona lauiloa o sa Soramā e uiga i upu ia sa tala’i atu ia te i latou, sa latou feitai ona o le upu, ona sa faaumatia ai a latou a’oa’oga sese; o lea na latou lē fia faalogo ai i upu.

4 Ma sa latou feau atu ma faapotopoto faatasi tagata uma i le laueleele uma, ma talanoa faatasi ma i latou e uiga i upu sa fofogaina.

5 O lenei sa le faailoa atu e o latou pule ma o latou faitaulaga ma o latou a’oa’o i tagata, e uiga i o latou manao; o lea na latou maua mai ai faalilolilo manatu o le nuu atoa.

6 Ma sa oo ina ua uma ona latou iloa o manatu o tagata uma, o i latou o e sa fiafia i upu ia na tautalagia e Alema ma ona uso, sa tutuli ese mai le laueleele; ma sa toatele i latou; ma sa latou o mai foi i le laueleele o Seasona.

7 Ma sa oo ina auauna atu Alema ma ona uso ia te i latou.

8 O lenei sa feitai tagata o sa Soramā i tagata o Amona o e sa i Seasona, ma sa auina atu e le pule taitai sili o sa Soramā, o se tagata amioleaga tele, i le nuu o Amona se feau, e manao ia te i latou ia latou tutuli ese mai lo latou laueleele uma, i latou uma o e na o mai mai ia te i latou i lo latou laueleele.

9 Ma sa ia manava mai ni taufaamata’u e tele e faasaga ia te i latou. Ma o lenei sa le matata’u le nuu o Amona ia latou upu; o lea sa latou le tutuli ese ai i latou, ae sa latou talia tagata matitiva uma o sa Soramā o e na o mai ia te i latou; ma sa latou tausia i latou, ma faalavalava i latou, ma tuu atu fanua ia te i latou e fai mo o latou tofi; ma sa latou auauna atu ia te i latou e tusa ma o latou manaoga.

10 O lea, o lenei mea sa oso ai le ita o sa Soramā e faasaga i le nuu o Amona, ma sa amata ona latou femiomioa’i ma sa Lamanā ma faaoso foi i latou ia feita e faasaga ia te i latou.

11 Ma sa faapea ona amata e sa Soramā ma sa Lamanā ona faia o sauniuniga mo le taua e faasaga i le nuu o Amona, ma e faasaga foi ia sa Nifaē.

12 Ma sa faapea ona ’i’u o le lona sefulufitu o tausaga o le nofoaiga a faamasino i luga o le nuu o Nifae.

13 Ma sa o ese atu le nuu o Amona mai le laueleele o Seasona, ma o mai i le laueleele o Meleka, ma faaavanoa le laueleele o Seasona mo autau a sa Nifaē, ina ia mafai ona latou tau ma autau a sa Lamanā ma autau a sa Soramā; ma sa faapea ona amata o se taua i le va o sa Lamanā ma sa Nifaē, i le lona sefuluvalu o tausaga o le nofoaiga a faamasino; ma o le a tuuina atu se tala o a latou taua i se taimi o mulimuli mai.

14 Ma sa toe foi atu Alema, ma Amona, ma o la’ua uso, ma atalii foi e toalua o Alema i le laueleele o Sara’emila, ina ua mavae ona avea o i latou o ni meafaigaluega i aao o le Atua i le aumaia o le toatele o sa Soramā i le salamo; ma o le toatele o i latou o e na aumai i le salamo, sa tutuli ese mai lo latou laueleele; peitai ua latou maua ni fanua mo o latou tofi i le laueleele o Seasona, ma ua latou ave i auupega o taua e puipui ai i latou lava, ma a latou avā, ma fanau, ma o latou laueleele.

15 O lenei o Alema, ua faanoanoa tele i le amioletonu o lona nuu, ioe, ona o taua, ma le faamasaatoto, ma finauga sa i ai i totonu o i latou; ma ona sa alu atu o ia e tala’i atu le upu, pe na auina atu e ta’u atu le upu, i totonu o tagata uma i aai uma; ma ina ua vaai atu ua faasolo ina maaa loto o tagata, ma ua amata ona latou le fiafia ona o le faigata ona tausia o le upu, sa matuā faanoanoa tele lava lona loto.

16 O lea, sa ia faatonu atu ai ia faapotopoto faatasi mai ona atalii, ina ia mafai ona ia tuu eseese atu ia te i latou uma taitoatasi lana poloaiga, e faatatau i mea e uiga i le amiotonu. Ma ua ia i matou se tala o ana poloaiga, ia na ia tuu atu ia te i latou e tusa ma lana lava talafaamaumau.