1 Lo’u atalii e, ua’i mai ia ou taliga i a’u upu, ona ou te tauto atu ia te oe, e faapea e tusa ai ma lou tausia o poloaiga a le Atua, o le a e manuia i le laueleele.

2 Ou te manao ina ia e faia e pei ona ou faia, i le manatuaina o le faatagataotauaina o o tatou tamā; ona sa i ai i latou i le pologa, ma sa leai se tasi sa mafai ona laveaiina i latou vagana ai le Atua o Aperaamo, ma le Atua o Isaako, ma le Atua o Iakopo; ma sa ia laveaiina lava i latou i o latou puapuaga.

3 Ma o lenei, lo’u atalii e, Helamana, faauta, ua e i ai i lou talavou, ma o lea, ou te aioi atu ai ia te oe, ia e faalogo mai i a’u upu, ma faaa’oa’o mai ia te a’u; ona ua ou iloa o ai lava e tuu atu lo latou faalagolago i le Atua o le a lagolagoina i o latou tofotofoga, ma o latou faalavelave, ma o latou puapuaga, ma o le a siitia ae i latou i le aso gataaga.

4 Ma ou te le manao ia e manatu ua ou iloa e a’u lava ia—e le mai la le tino ae mai la le agaga, e le mai le mafaufau faaletino ae mai i le Atua.

5 O lenei, faauta, ou te fai atu ia te oe, a na le fanauina a’u i la le Atua, po ua ou le iloa nei mea; ae o le Atua na ia faailoa mai ia te a’u nei mea, e ala i le fofoga o lana agelu paia, ae le o so’u lava agavaa;

6 Ona sa ou fealuai solo faatasi ma atalii o Mosaea, e saili e faaumatia le ekalesia a le Atua; ae faauta, sa auina mai e le Atua lana agelu paia e taofi i matou i le ala.

7 Ma faauta, sa fetalai mai o ia ia te i matou, e peiseai o le leo o le faititili, ma sa gatete ai le laueleele atoa i lalo ifo o o matou vae; ma sa matou pa’u’ū uma ifo i le eleele, ona sa oo mai i o matou luga le mata’u i le Alii.

8 Ae faauta, sa fetalai mai le siufofoga ia te a’u: Tulai ia. Ma sa ou tulai ma tu a’e i luga, ma vaai atu i le agelu.

9 Ma sa fetalai mai o ia ia te a’u: Afai ua e manao ia faaumatia oe lava ia, aua e te toe saili e faaumatia le ekalesia a le Atua.

10 Ma sa oo ina ou pa’ū ifo i le eleele; i le va o aso e tolu ma po e tolu ma sa ou le mafai ai ona tatala lo’u gutu, pe mafai foi ona ou faaaoga o’u lima ma o’u vae.

11 Ma sa fetalai mai e le agelu ia te a’u ni isi mea e tele, ia na lagona e o’u uso, ae sa ou le lagonaina; aua ina ua ou faalogo atu i nei upu—Afai ua e manao ia faaumatiaina oe lava ia, aua e te toe saili e faaumatia le ekalesia a le Atua—sa ou taia i le mata’u tele lava ma le ofo ne’i faaumatia a’u, sa ou pa’ū ifo i le eleele ma sa ou le toe lagona se mea.

12 Ae sa ou lagona le tiga ma le mafatia faavavau, ona sa faanoanoa lo’u agaga i le tulaga silisili ma lagona le tiga i a’u agasala uma.

13 Ioe, sa ou manatua a’u agasala ma amioletonu uma, ia sa ou mafatia ai i tiga o seoli; ioe, sa ou vaai ua ou fouvale faasaga i lo’u Atua, ma sa ou le tausia ana poloaiga paia.

14 Ioe, ma sa ou fasiotia le toatele o ana fanau, pe sa ou ta’ita’i ese atu foi i latou i le faafanoga; ioe, ma i se aotelega, sa matuā tele lava a’u amioletonu, o le mafaufau ifo i lo’u alu atu i luma o lo’u Atua sa matuā lagona ai le tiga o lo’u agaga i le mata’u tele e le mafaamatalaina.

15 Sa ou mafaufau ifo, e, pe a na mafai ona faaaunuua o a’u ma tineia i le agaga ma le tino, ina ia le aumaia ai a’u e tulai i luma o lo’u Atua, e faamasinoina i a’u galuega.

16 Ma o lenei, mo le tolu ao ma le tolu po sa faatigaina ai a’u, i tiga o se agaga ua faasalaina lava.

17 Ma sa oo ina a’o faapea ona ou lagona le tiga ma le mafatia, a’o o’u faanoanoa i le manatuaina o a’u agasala e tele, faauta, sa ou manatuaina foi lo’u faalogo i lo’u tamā o vavalo atu i tagata e uiga i le afio mai o Iesu Keriso e toatasi, o se Atalii o le Atua, e togiola mo agasala a le lalolagi.

18 O lenei, ina ua tau ane lo’u mafaufau i lenei manatu, sa ou tagi ifo i totonu o lo’u loto: E, Iesu e, oe le Alo o le Atua, ia e alofa mutimutivale mai ia te a’u, o sē ua i ai i le au oona, ma ua siomia faataamilo e filifili tumau e faavavau o le oti.

19 Ma o lenei, faauta, ina ua ou mafaufauina lenei mea, sa ou le toe manatuaina o’u tiga; ioe, sa ou le toe faanoanoa i le manatuaina o a’u agasala.

20 Ma ’oi, le olioli e, ma le malamalama ofoofogia tele na ou vaaia; ioe, sa faatumulia lo’u agaga i le olioli sa sili atu ona tele e pei o lo’u tiga!

21 Ioe, ou te fai atu ia te oe, lo’u atalii e, e leai se mea e faapea ona silisili ona malosi ma faapea ona silisili le oona e pei o o’u tiga. Ioe, ma ou te toe fai atu foi ia te oe, lo’u atalii e, i le tasi itu, e leai se mea e faapea ona silisili ona logolelei ma suamalie e pei o lo’u olioli.

22 Ioe, sa ou manatu sa ou vaai, e pei lava ona vaai lo tatou tamā o Liae, i le Atua, o afio i lona nofoalii, ua siosiomia e ’au agelu e le masino, e peiseai o loo pepese ma vivii atu i lo latou Atua; ioe, ma sa moomoo lo’u agaga i le fia i ai iina.

23 Ae faauta, sa toe maua e o’u lima ma o’u vae lo latou malosi, ma sa ou tulai i luga i o’u vae, ma faailoa atu i tagata ua fanauina au i la le Atua.

24 Ioe, ma mai i lena taimi e o’o mai i le taimi nei, ua ou galue e aunoa ma se malolo, ina ia mafai ona ou aumai o agaga i le salamo; ina ia mafai ona ou aumai i latou e tofo i le olioli tele lea sa ou tofo i ai; ina ia mafai foi ona fanauina i latou i la le Atua, ma faatumuina i le Agaga Paia.

25 Ioe, ma o lenei faauta, lo’u atalii e, ua tuuina mai e le Alii ia te a’u le olioli e silisili ona tele i le fua o a’u galuega;

26 Auā ona o le upu lea na ia tuuina mai ia te a’u, faauta, e toatele ua fanauina i la le Atua, ma tofo e pei ona ou tofo, ma faafesagai e pei ona ou vaai; o lea ua latou iloa ai e uiga i nei mea sa ou tautala i ai, e pei ona ou iloa; ma o le malamalama ua ia te a’u ua mai i le Atua lea.

27 Ma sa lagolagoina a’u a’o ou i ai i lalo o tofotofoga ma faalavelave o ituaiga eseese uma, ioe, ma puapuaga uiga eseese uma; ioe, sa laveaiina a’u e le Atua mai le falepuipui, ma mai i noanoaga, ma mai i le oti, ioe, ma ou te tuu atu lo’u faalagolago ia te ia; ma o le a ia laveai mai pea ia te au.

28 Ma ua ou iloa o le a ia faatulai mai a’u i luga i le aso gataaga, e mau faatasi ma ia i le mamalu; ioe, ma o le a ou viia o ia e faavavau, ona sa ia aumai o tatou tamā mai Aikupito, ma ia tofatumoanaina tagata Aikupito i le Sami Ulaula; ma sa ia ta’ita’i atu i latou i lona mana i le laueleele na folafolaina; ioe, ma sa ia laveaiina i latou mai le pologa ma le faatagataotauaina mai lea taimi i lea taimi.

29 Ioe, ma sa ia aumaia foi o tatou tamā mai le laueleele o Ierusalema; ma sa ia laveaiina foi i latou, e ala i lona mana tumau e faavavau, mai le pologa ma le faatagataotauaina, mai lea taimi i lea taimi, e oo mai lava i le aso nei; ma ua ou taofi pea i le manatua taimi uma lo latou faatagataotauaina; ioe, ma e tatau foi ona e taofi i le manatua, e pei ona sa ou faia, lo latou faatagataotauaina.

30 Ae faauta, lo’u atalii e, ua le ona pau lea; ona e tatau ona e iloa e pei ona ou iloa, e faapea e tusa ai ma lou tausia o poloaiga a le Atua o le a e manuia i le laueleele; ma e tatau foi ona e iloa, e faapea e tusa ai ma lou lē tausia o poloaiga a le Atua, o le a vavae ese oe mai ona luma. O lenei ua tusa lea ma lana afioga.