1 Lo’u atalii e, ua’i mai ou taliga i a’u upu, aua ou te fai atu ia te oe, e pei ona ou fai atu ia Helamana, e faapea e tusa ai ma lou tausia o poloaiga a le Atua o le a e manuia i le laueleele; ma e tusa ai ma lou lē tausia o poloaiga a le Atua o le a vavae ese oe mai ona luma.

2 Ma o lenei, lo’u atalii e, ou te faalagolago o le a ou maua le olioli tele ia te oe, ona o lou maumaututū ma lou faamaoni i le Atua; auā e pei ona e amata mai i lou talavou ona e vaai atu i le Alii lou Atua, ua faapea lava ona ou faamoemoe o le a aveavea’i pea ona e tausia o ana poloaiga; auā e amuia lava o ia o le e tumau e o’o i le iuga.

3 Ou te fai atu ia te oe, lo’u atalii e, ua uma ona ou maua o le olioli tele ia te oe, ona o lou faamaoni ma lou filigā, ma lou onosai ma lou tali-tiga i totonu o tagata sa Soramā.

4 Ona ua ou iloa sa e i ai i noanoaga; ioe, ma ua ou iloa foi sa fetogi oe i maa ona o ana afioga; ma sa e talitalia nei mea uma ma le onosai ona sa faatasi le Alii ma oe; ma o lenei ua e iloa o le Alii na lavea’iina oe.

5 Ma o lenei, lo’u atalii e, Sepulona, ou te manao ia e manatua, afai e te tuu atu lou faalagolago i le Atua seia faapea ona tele, o le a ia lavea’iina oe mai ou tofotofoga, ma ou faalavelave, ma ou puapuaga, ma o le a siitia a’e oe i le aso gataaga.

6 O lenei, lo’u atalii e, ou te le manao ia e manatu e faapea ua ou iloa nei mea e a’u lava ia, ae o le Agaga o le Atua ua i totonu ia te a’u na ia faailoa mai ia nei mea ia te a’u; a na le fanauina a’u i la le Atua, po ua ou le iloaina nei mea.

7 Ae faauta, o le Alii i lona alofa mutimutivale tele na ia auina mai ai lana agelu e ta’u mai ia te a’u e ao ina ou tuu le galuega o le faafanoga i totonu o lona nuu; ioe, ma sa ou vaai i se agelu faafesagai lava, ma sa ia fetalai mai ia te a’u, ma o lona siufofoga sa pei o le faititili, ma sa lūlū ai le eleele atoa.

8 Ma sa o’o ina sa ou i ai i aso e tolu ma po e tolu i se tiga oona ma le atuatuvale tele o le agaga; ma sa ou le maua lava, seia oo ina ou tagi atu i le Alii o Iesu Keriso mo le alofa mutimutivale, sa ou maua ai se faamagaloga o a’u agasala. Ae faauta, sa ou tagi atu lava ia te ia ma ou maua ai le filemu i lo’u agaga.

9 Ma o lenei, lo’u atalii e, ua ou ta’u atu ia te oe lenei mea ina ia mafai ona e a’oa’o le poto, ina ia mafai ona e iloa mai ia te a’u, ua leai se isi lava ala po o ni auala e mafai ona faaolaina ai o le tagata, ua na’o ia, ma ala mai ia Keriso. Faauta, o ia o le ola ma le malamalama o le lalolagi. Faauta, o ia o le afioga o le upumoni ma le amiotonu.

10 Ma o lenei, ona ua amata ona e a’oa’o atu o le upu ua faapea lava ona ou manao ia e a’oa’o atu pea; ma ou te manao ia e filigā ma faautauta i mea uma.

11 Vaai ia aua ne’i faafefeteina oe i luga i le faamaualuga; ioe, vaai ia aua ne’i e mitamitavale i lou lava poto, po o lou malosi tele.

12 Faaaoga le lotoa, ae le o le faafiamalosi; ma vaai foi ia pulea ou tuinanau uma, ina ia mafai ona faatumuina oe i le alofa; vaai ia e aloese mai le faapaie.

13 Aua e te tatalo e pei ona faia e sa Soramā, ona sa e vaai ua latou tatalo ina ia lagona mai e tagata, ma ina ia viia i latou mo lo latou popoto.

14 Aua e te fai atu: Le Atua e, ou te faafetai atu ia te oe ona ua sili atu lo matou lelei nai lo o matou uso; ae ia fai atu: Le Alii e, faamagalo mai lo’u le agavaa, ma ia e manatua o’u uso i le alofa mutimutivale—ioe, ta’uta’u atu lou le agavaa i luma o le Atua i taimi uma lava.

15 Ma ia alofa le Alii ia faamanuia mai i lou agaga, ma talia oe i le aso gataaga i lona malo, e nofo i lalo i le filemu. O lenei alu ia, lo’u atalii e, ma a’oa’o atu le upu i lenei nuu. Ia e manatunatu loloto. Lo’u atalii e, tofa.