1 Ma o lenei, lo’u atalii e, e i ai lava ni mea e tele ou te fia fai atu ai ia te oe nai lo mea na ou ta’u atu i lou uso; auā faauta, e te le’i vaai ea i le maumaututū o lou uso, lona faamaoni, ma lona filigā i le tausiga o poloaiga a le Atua? Faauta, na te le’i faia ea mo oe se faataitaiga lelei?

2 Ona sa e le ua’i tele mai i a’u upu e pei ona sa faia e lou uso, i totonu o tagata sa Soramā. O lenei, o le mea lenei ua ia te a’u e faasaga ia te oe; sa e faia lava pea i le mitamitavale i lou malosi ma lou poto.

3 Ma ua le ona pau lea, lo’u atalii e. Sa e faia se mea sa mamafa ia te a’u; ona sa e tuu le galuega o le talaiga, ma e alu atu i le laueleele o Sairona e i totonu o tuaoi o sa Lamanā, i le fafine talitane o Isapela.

4 Ioe, sa ia faatosina ese loto o le toatele; peitai, lo’u atalii e, sa le o se ’alofaga tatau lea mo oe. Sa tatau ona e tausi i le galuega lea na faatuatuaina ai oe.

5 Ua e le iloa ea, lo’u atalii e, o nei mea o ni mea inosia i le silafaga a le Alii; ioe, ua silisili ona inosia i lo o agasala uma vagana ai le faamasaaina o le toto lē sala po o le faafitia o le Agaga Paia?

6 Auā faauta, afai e te faafitia le Agaga Paia ina ua uma ona mau ia te oe, ma ua e iloa ua e faafitia o ia, faauta, o se agasala lenei e le mafaamagaloina; ioe, ma o soo se tasi e fasioti tagata e faasaga i le malamalama ma le iloa o le Atua, e le faigofie ia te ia ona maua o le faamagaloga; ioe, ou te fai atu ia te oe, lo’u atalii e, e le faigofie ia te ia ona maua o se faamagaloga.

7 Ma o lenei, lo’u atalii e, ou te moomoo i le Atua ma’umau pe a na e lē sala i se solitulafono tele faapea. Ou te le fia ta’ua pea au solitulafono, e lagā a’e ai lou agaga, pe a ua lē mo lou lelei.

8 Ae faauta, e le mafai ona e natia au solitulafono mai le Atua; ma e vagana ai ua e salamo, o le a tutū o se molimau e faasaga ia te oe i le aso gataaga.

9 O lenei, lo’u atalii e, ou te manao ia e salamo ma lafoai au agasala, ma aua e te toe saili atu i tuinanau o ou mata, ae ia e faafiti e oe lava i nei mea uma; ona e vagana ai ua e faia lenei mea, e le mafai lava ona e mautofi i le malo o le Atua. E, ia e manatua, ma ia e ave i ou luga, ma faafiti e oe lava i nei mea.

10 Ma ou te poloai atu ia te oe ia e ave i ou luga e filifili faatasi ma ou uso matutua i au mea e fai; auā faauta, o loo e i lou talavou, ma ua e manaomia ona tausia oe e ou uso. Ma ua’i atu i a la’ua fautuaga.

11 Aua e te tuu atu oe lava, ia ta’ita’i ese e soo se mea ua lē aoga pe ua faavalevalea; aua e te tuu atu i le tiapolo na te toe ta’ita’i ese atu lou loto i na fafine talitane amioleaga. Faauta, lo’u atalii e, sa matuā tele lava le amioletonu na e aumai i luga o sa Soramā; auā ina ua latou vaai i lau amio, sa latou le fia talitonu i a’u upu.

12 Ma o lenei ua fetalai mai le Agaga o le Alii ia te a’u: Ia faatonu lau fanau ia latou faia mea lelei, ne’i o latou ta’ita’i ese atu loto o tagata e toatele i le faafanoga; o lea ou te poloai atu ai ia te oe, lo’u atalii e, i le mata’u i le Atua, ia e aloese mai au amioletonu;

13 Ma ia e liliu atu i le Alii ma lou manatu atoa, mafaufau atoa, ma lou malosi atoa; ina ia e le toe ta’ita’i ese loto o i latou e fai le amioleaga; ae ia e toe foi atu ia te i latou, ma tautino atu ou ’aleu ma lena sesē na e faia.

14 Aua e te saili i oa po o mea lē aoga a lenei lalolagi; auā faauta, e le mafai ona e avea i latou faatasi ma oe.

15 Ma o lenei, lo’u atalii e, ou te fia fai atu lava ia te oe e uiga i le afio mai o Keriso. Faauta, ou te fai atu ia te oe, o ia lava lea ua mautinoa o le a afio mai e aveese agasala a le lalolagi; ioe, e afio mai o ia e ta’u mai tala fiafia o le faaolataga i ona tagata.

16 Ma o lenei, lo’u atalii e, o le galuega lenei na valaauina i ai oe, e ta’u atu nei tala fiafia i lenei nuu, e saunia ai o latou mafaufau; pe ina ia mafai ona oo mai o le faaolataga ia te i latou, ina ia mafai ona latou saunia mafaufau o a latou fanau ia faalogo i le upu i le taimi o lona afio mai.

17 Ma o lenei o le a ou faafilemuina lava lou mafaufau e uiga i lenei mataupu. Faauta, ua e ofo pe aisea ua tatau ai ona mamao ona iloa muamua o nei mea a’o le’i oo mai. Faauta, ou te fai atu ia te oe, ua le tusa ea le pele i le Atua o se agaga i le taimi nei e pei o se agaga i le taimi o lona afio mai?

18 Pe ua le tutusa ea le tatau ai ona faaali mai o le fuafuaga o le togiola i lenei nuu e pei ona tatau ai foi ia latou fanau?

19 Pe ua le tutusa ea le faigofie i le Alii le auina mai i le taimi nei o lana agelu e ta’u mai nei tala fiafia ia te i tatou e pei o a tatou fanau, pe e pei o le taimi pe a mavae le taimi o lona afio mai?