1 Im kiiō, nejū m̧aan, ippa eļapļo̧k n̄an aō ba n̄an kwe jān ta iaar ba n̄an m̧aan ro jeiūm̧; bwe lo, kwaar ke lo pen eo an ļeo jeiūm̧, an tiljek, im an niknik ilo kōjparok kien ko an Anij? Lo, eaar ke kwaļo̧k juon jon̄ok em̧m̧an n̄an eok?

2 Bwe kwaar jab kanooj eo̧ron̄ naan ko aō āinwōt ļeo jeiūm̧, ilubwiljin armej in riZoram raņ. Kiiō en̄in men eo ippa ņae eok; kwaar kōmmejāje ilo am̧ kanooj kajoor im ilo mālōtlōt.

3 Im ejjab aolepān in, nejū m̧aan. Kwaar kōm̧m̧an men eo ekanooj kabbūrom̧ōjm̧ōj n̄an eō; bwe kwaar kaarmejjete jerbal eo, im kar ilo̧k ilo āneen Sirōn ilubwiljin tōrerein ko an riLeman ro, ilo̧kanļo̧k kōrā kijon̄ eo Isabel.

4 Aaet, lio eaar ko̧o̧te bōro ko rellōn̄, a men in eaar jab jekpen eo n̄an eok, nejū m̧aan. Kwōn kar lale wōt jerbal eo kar kōjatdikdik kake ioom̧.

5 Kwōj jab jeļā ke, nejū m̧aan, bwe men kein rej kajjōjō imejān Irooj; aaet, kajjōjōtata ioon aolep jero̧wiwi otemjeļo̧k ijello̧kun wōt kōto̧o̧rļo̧k bōtōktōkin ro ejjeļo̧k ruweer ak kaarmejjete Jetōb Kwōjarjar?

6 Bwe lo, eļan̄n̄e kwōj kaarmejjete Jetōb Kwōjarjar n̄e E m̧okta eaar wōr jikin ilo kwe, im kwōj jeļā bwe kwōj kaarmejjete E, lo, men in ej jero̧wiwi eo jamin jeorļo̧k; aaet, im jabdewōt eo ej uror ņae meram eo im jeļāļo̧kjeņ jān Anij, ej jab pidodo n̄an e n̄an bōk jeorļo̧k bōd; aaet, ij ba n̄an eok, nejū m̧aan, bwe ejjab pidodo n̄an e n̄an bōk juon jeorļo̧k bōd.

7 Im kiiō, nejū m̧aan, inaaj kūr n̄an Anij bwe kwe en ejjeļo̧k ruōm̧ kōn juon nana eļap. Iban bōk iien kōn men kein ruōm̧ n̄an kainepataik buruōm̧, eļan̄n̄e eaar jab n̄an em̧m̧an eo am̧.

8 A lo, kwōj jab maron̄ ņooj men kein ruōm̧ jān Anij; im eļan̄n̄e kwōj jab ukeļo̧k renaaj jutak āinwōt juon kam̧ool ņae eok ilo raan eo āliktata.

9 Kiiō nejū m̧aan, ikōņaan bwe kwōn ukeļo̧k im eļļo̧k jān jero̧wiwi ko am̧, im jab bar ilo̧k ilo̧kan jurjurmelea ko an mejam̧, ak debwāāle eok make ilo aolep men kein; bwe ijello̧kun wōt n̄e kwōj kōm̧m̧ane men in kwōjjab maron̄ jolōte aelōn̄ eo an Anij. O, kwōn keememej, im bōk e ioom̧, im debwāāle eok make ilo men kein.

10 Im ij jiron̄ eok n̄an bōk e ioom̧ n̄an kōnono ippān ļōm̧aro jeiūm̧ rerūtto ilo aolep jibadbad ko am̧; bwe lo kwōj pād wōt ilo am̧ inono, im kwōj pād ilo aikuj katakin jān ļōm̧aro jeiūm̧. Im leļo̧k eo̧ron̄ n̄an aer kapilōk.

11 Kwōj jab kōtļo̧k kwe make bwe jabdewōt men e waan im bwebwe in tōl eok; kwōn jab kōtļo̧k devil bwe en bar tōlļo̧k buruōm̧ ilo̧kan kōrā kijon̄ raņ. Lo, O nejū m̧aan, ekōjkan ļap in nana eo kwaar bōktok ioon riZoram raņ; bwe ke raar lo am̧ m̧akūtkūt raar jab tōmak ilo naan ko aō.

12 Im kiiō Jetōb in Irooj ej ba n̄an eō: Kwōn jiron̄ ro nejūm̧ n̄an kōm̧m̧an em̧m̧an, n̄e raab tōl būruōn elōn̄ armej n̄an ko̧kkure; kōn menin ij jiron̄ eok, nejū m̧aan, ilo mijak e Anij, bwe kwōn bōjrak jān nana kein am̧;

13 Bwe kwōn oktakļo̧k n̄an Irooj kōn aolepān am̧ ļōmņak, kajoor, im maron̄; bwe kwōn jab bar tōlļo̧k būruōn kōrā kijon̄ raņ n̄an kōm̧m̧an nana; ak kwōn ro̧o̧lļo̧k n̄an er, im kwaļo̧k jirilo̧k ko am̧ im bōd eo kwaar kōm̧m̧ane.

14 Kwōn jab kappukot m̧weie ko ak men ko rewaan an laļ in; bwe lo, kwōj jab maron̄ ineekiļo̧k ippam̧.

15 Im kiiō, nejū m̧aan, ikōņaan ba jidik n̄an eok kōn itok eo an Kraist. Lo, ij ba n̄an eok, bwe E in eo em̧ool Enaaj itok n̄an bōkļo̧k jero̧wiwi ko an laļ; aaet, E ej itok n̄an kajeeded naan ko rem̧m̧an kōn lo̧mo̧o̧r n̄an armej ro An.

16 Im kiiō, nejū m̧aan, en̄in eaar jerbal eo kar kūr eok n̄an e; n̄an kajeeded naan ko rem̧m̧an n̄an armej rein, n̄an kōpooj ļōmņak ko aer; ak ilo bar juon wāween bwe lo̧mo̧o̧r en maron̄ itok n̄an er, bwe ren maron̄ kōpooj ļōmņak ko an ro nejier n̄an ron̄jake naan eo ilo iien An itok.

17 Im kiiō inaaj kaenōm̧m̧an am̧ ļōmņak jidik kōn ennaan in. Lo, kwōj bwilōn̄ etke men kein aikuj jeļā kaki juon iien im̧aanļo̧k. Lo, ij ba n̄an eok, ej jab ke jetōb eo ilo iien in aorōk n̄an Anij āinwōt Jetōb eo naaj ilo iien An itok?

18 Ej jab ke emennin aikuj bwe karōk in lo̧mo̧o̧r en kwaļo̧k n̄an armej rein ejja āinwōt n̄an ro nejier?

19 Ej jab ke ejja pidodo in wōt ilo iien in n̄an Irooj n̄an jilkintok An enjeļ n̄an kajeeded naan kein rem̧m̧an n̄an kōj āinwōt n̄an ro nejid, ak āinwōt ālikin iien An itok?