1 Ut anajwan kik’ulman sa’ xtiklajik li xb’ele xka’k’aal xchihab’eb’ laj raqol aatin, naq laj Ammoron kixtaqla xtz’aamankil re laj Moroni naq taa’uxq xq’ajsinkil li preex chirib’ileb’ rib’.

2 Ut kik’ulman naq laj Moroni kireek’a chi saho’k xch’ool chi numtajenaq rik’in li tz’aamahom a’in, xb’aan naq a’an naraj li k’a’aq re ru k’eeb’il choq’ reheb’ li preex aj Lamanita re naq taak’anjelaq choq’ re xtenamit a’an; ut kiraj ajwi’ tz’aqal lix tenamit re xk’eeb’al xkawilal lix teep aj pleet.

3 Anajwan eb’ laj Lamanita ke’xchap chaq k’iila ixq ut kok’al, ut maajun ixq chi moko kok’al wan sa’ xyanqeb’ chixjunil lix preex laj Moroni, malaj eb’ li preex li kixchap chaq laj Moroni; jo’kan naq laj Moroni kixk’oxla jun li na’leb’ re xk’ulb’al rik’ineb’ laj Lamanita jo’ k’ihal li preex xkomoneb’ laj Nefita li taaruuq chiru.

4 Jo’kan naq kixtz’iib’a jun li hu, ut kixtaqla sa’ ruq’ lix moos laj Ammoron, li kixk’am ajwi’ chaq jun li hu rik’in laj Moroni. Anajwan a’in li aatin kixtz’iib’a re laj Ammoron, kixye:

5 K’e reetal, at Ammoron, xintz’iib’a aawe ka’ch’inaq chirix li pleet a’in li kat-ok wi’ rik’in lin tenamit, malaj ut li ki’ok wi’ laa was rik’ineb’, ut li toj k’eek’o aach’ool chixpleetinkil chirix lix kamik.

6 K’e reetal, nawaj raj xyeeb’al ka’ch’inaq aawe chirix lix raqb’a-aatin li Dios, ut li yok’leb’ ch’iich’ re lix nimajwal josq’il, li taqsinb’il sa’ eeb’een wi ink’a’ nekejal eek’a’uxl ut nekerisiheb’ lee teep aj pleet toj sa’eb’ lee ch’och’ laa’ex, malaj li ch’och’ wan wi’ eereechanihom, a’an li ch’och’ Nefi.

7 Relik chi yaal, tinye raj aawe li na’leb’ a’in wi ta taaruuq tat-ab’inq chiru; relik chi yaal, tinye raj aawe chirix li xuwajel xb’alb’a li oyb’en wan chixk’ulb’al xkomoneb’ aj kamsinel jo’ laa’at ut laa was, wi ink’a’ nekejal eek’a’uxl ut nekerisi lee na’leb’ aj kamsinel, ut nekexsutq’i sa’ tz’aqal eech’och’ rochb’een lee teep aj pleet.

8 A’b’anan jo’ ketz’eqtaana jun sut li k’a’aq re ru a’in, ut kepleeti lix tenamit li Qaawa’, chi jo’kan naru nink’oxla naq toj teeb’aanu wi’chik.

9 Ut anajwan k’ehomaq reetal, kawresinb’ilo chek’ulb’al; relik chi yaal, ut wi ink’a’ nekerisi lee k’oxlahom, k’ehomaq reetal, teek’am chaq sa’ eeb’een lix josq’il li Dios a’an li ketz’eqtaana, toj reetal ajwi’ naq texsache’q chi junajwa.

10 A’b’anan, jo’ naq yo’yo li Qaawa’, te’chalq li qateep aj pleet sa’ eeb’een wi ink’a’ nekerisi eerib’, ut sa’ junpaat tex’ula’aniiq rik’in li kamk, xb’aan naq laa’o taqak’uulaheb’ li qatenamit ut li qach’och’; relik chi yaal, ut taqak’uula xwankil li qapaab’aal ut lix na’leb’ li qaDios.

11 A’b’an k’e reetal, nak’utun chiwu naq nakatwaatina chirix li k’a’aq re ru a’in chi maak’a’ xyaalal, malaj ut nak’utun chiwu naq laa’at ralalat xb’alb’a; jo’kan naq tinchoy lin hu rik’in xyeeb’al aawe naq moko tinq’ajsiheb’ ta li preex, ka’ajwi’ b’an wi nanawman naq laa’at taaq’axtesi jun winq rochb’een li rixaqil ut eb’ lix kok’al, choq’ reeqaj jun preex; wi ut taa’uxmanq a’in naq teeb’aanu, laa’in tinq’ajsinq.

12 Ut k’e reetal, wi ink’a’ teeb’aanu a’in, laa’in tinchalq sa’ eeb’een wochb’eeneb’ inteep aj pleet; relik chi yaal, tink’e ajwi’ k’anjeleb’aal re pleet reheb’ li ixqilal ut li kok’al, ut tinchalq sa’ eeb’een, ut texintaaqe toj sa’ ajwi’ lee ch’och’ laa’ex, a’an xch’och’il li xb’een qeechanihom; relik chi yaal, ut taawanq li kik’ choq’ reeqaj li kik’, relik chi yaal, li yu’am reeqaj li yu’am, ut laa’in texinpleeti toj reetal naq texsache’q chaq sa’ xb’een li ruchich’och’.

13 K’e reetal, wankin sa’ injosq’il, ut jo’kan ajwi’ intenamit; laa’ex kesik’ qakamsinkil, ut laa’o yal xqasik’ xkolb’al qib’. A’b’an k’e reetal, wi nekesik’ chik qasachb’al, laa’o taqasik’ eesachb’al laa’ex; relik chi yaal, ut taqasik’ li qach’och’, lix ch’och’il li xb’een qeechanihom.

14 Anajwan ninchoy lin hu. Laa’in aj Moroni; laa’in jun aj jolominel reheb’ lix tenamiteb’ laj Nefita.

15 Anajwan kik’ulman naq laj Ammoron, naq kixk’ul li hu a’in, kijosq’o’, ut kixtz’iib’a jun chik li hu rik’in laj Moroni, ut a’in li aatin kixtz’iib’a, kixye:

16 Laa’in aj Ammoron, xreyeb’ laj Lamanita; laa’in riitz’in laj Amalikiah li kamsinb’il eeb’aan. K’e reetal, laa’in tin’eeqaju lix kik’el sa’ eeb’een, relik chi yaal, ut tinchalq sa’ eeb’een wochb’een inteep aj pleet, xb’aan naq ink’a’ ninxuwa li rahilal nekeyeechi’i.

17 Xb’aan naq k’ehomaq reetal, eb’ lee yuwa’ ke’xb’aanu li ink’a’ us reheb’ li ras riitz’in, jo’kan naq ke’relq’a chiruheb’ li wankilal re jolomink tenamit naq ak reheb’ raj tz’aqal a’an.

18 Anajwan ut k’ehomaq reetal, wi teekanab’ lee k’anjeleb’aal re pleet, ut teekanab’ eerib’ chi jolomiik xb’aan li ani tz’aqal re raj li jolomink tenamit, chirix a’an tintaqla naq eb’ lin tenamit te’xkanab’ lix k’anjeleb’aal re pleet ut moko te’wanq ta chik chi pleetik.

19 K’e reetal, kayeechi’i k’iila rahilal choq’ we laa’in ut re intenamit; a’b’anan k’e reetal, ink’a’ naqaxuwa ru li rahilal nakayeechi’i.

20 A’b’anan, tinkanab’ chi uxk li q’ajsink preex chiqib’il qib’ jo’ chanru aatz’aamahom, chi sa sa’ inch’ool, re taaruuq tink’uula intzakemq choq’ reheb’ lin winq aj pleet, ut laa’o taqapleeti jun li pleet li taawanq chi junelik, toj reetal te’k’ehe’q laj Nefita rub’el qawankil, malaj te’oso’q chi junelik.

21 Chirix ut li Dios a’an li nakaye naq xqatz’eqtaana, k’e reetal, ink’a’ naqanaw ru xkomon a’ winq a’an, chi moko nekenaw laa’ex; a’b’anan wi na’ux naq wan a’ winq a’an, ink’a’ naqanaw ma ink’a’ kooxyo’ob’tesi ta laa’o jo’ chanru laa’ex.

22 Ut wi na’ux naq wan jun aj tza ut jun xb’alb’a, k’e reetal, ma ink’a’ tatxtaqla aran re tatwanq rik’in li was li kekamsi, li xak’e chi k’oxlamank naq xikenaq sa’ xkomon a’ na’ajej a’an? A’b’an k’e reetal, maak’a’ na’ok wi’ a’ k’a’aq re ru a’in.

23 Laa’in laj Ammoron, ut ralal xk’ajolin laj Tzoram, li kimine’ ru ut ki’isiik chaq Jerusalen xb’aaneb’ lee yuwa’.

24 K’e ut reetal anajwan, laa’in jun aj Lamanita kaw xch’ool; k’e reetal, xpleetiman li pleet a’in re reeqajunkil li ink’a’ us xe’xk’ul, ut re xk’uulankil ut xtawb’al lix k’ulub’eb’ sa’ xjolomil li tenamit; ut ninchoy lin hu rik’in laj Moroni.