1 Ma o lenei sa oo i le amataga o le lona luasefulu ma le iva o tausaga o faamasino, na auina mai ai e Amorona se savali ia Moronae e manao mai ia te ia la te faafesuiai pagota.

2 Ma sa oo ina lagona e Moronae le olioli tele i lenei talosaga, ona sa ia naunau o mea e manaomia ia sa tuuina atu mo le tausiga o pagota sa Lamanā mo le tausiga o ona lava tagata; ma sa ia naunau foi i ona lava tagata mo le faamalosiga o lana autau.

3 O lenei sa toatele fafine ma tamaiti sa ave e sa Lamanā, ae sa leai se fafine po o se tamaitiiti i totonu o pagota uma a Moronae, po o pagota o e na ave e Moronae; o lea na mafaufau ai Moronae i se togafiti e maua mai ai le tele o pagota o sa Nifaē mai sa Lamanā, ona e mafai ona fai.

4 O lea na ia tusi atu ai se tusi, ma auina atu e ala atu i le auauna a Amorona, o ia lava lea na aumaia le tusi ia Moronae. O lea o upu nei na ia tusi atu ia Amorona, e faapea:

5 Faauta, Amorona, ua ou tusi atu lava ia te oe e uiga i lenei taua ua e sii mai e faasaga i lo’u nuu, po o lea na sii mai e lou uso e faasaga ia te i latou, ma lea ua e gauai ia faaauau pea ina ua mavae lona oti.

6 Faauta, ou te fia faamatala atu lava ia te oe e uiga i le faamasinotonu a le Atua, ma le pelu o lona toasa malosi aoao, lea ua tautau ifo i ou luga, vagana ai ua e salamo ma faafoi atu au autau i o outou lava laueleele, po o le laueleele ua outou maua, le laueleele lea o Nifae.

7 Ioe, ou te fia faamatala atu ia te oe nei mea pe a na fai e mafai ona e faalogo mai i ai; ioe, ou te fia faamatala atu ia te oe e uiga i le seoli mata’utia lena o loo faatalitali mai e tali tagata fasioti tagata faapena e pei ona i ai oe ma lou uso, vagana ai ua e salamo ma aveese ou faamoemoega fasioti tagata, ma fo’i atu ma au autau i o outou lava laueleele.

8 Ae ona sa e teteeina muamua nei mea, ma e tau e faasaga i tagata o le Alii, ua faapea lava ona ou manatu o le a e toe faia foi lenei mea.

9 Ma o lenei faauta, ua matou sauni e tali outou; ioe, ma vagana ai ua e aveese ou faamoemoega, faauta, o le a e to ifo i lalo le toasa o le Atua lena o le ua e teena, i o outou luga, e oo lava i le faaumatiaina atoa o outou.

10 Ae, e pei ona soifua le Alii, o le a o atu a matou autau i o outou luga, vagana ai ua outou o ese, ma o le a le pine ai ona asia o outou i le oti, ona o le a matou toe maua o matou aai ma o matou laueleele; ioe, ma o le a matou taofi mau la matou tapuaiga ma le savali a lo matou Atua.

11 Ae faauta, ou te manatu ua leai se aoga ou te tautala atu ai ia te oe e uiga i nei mea; po o i lo’u manatu o oe o se tama a seoli; o lea o le a ou faaiu ai la’u tusi i le ta’u atu ia te oe ou te le fia faafesuiai pagota, vagana ai ua faia i luga o tulaga o lou tatala mai o se tane ma lana ava ma lana fanau, mo se pagota e toatasi; afai o le tulaga lenei e te faia ai, o le a ou faafesuiai.

12 Ma faauta, afai e te le faia lenei mea, o le a ou alu atu faatasi ma a’u autau e faasaga ia te oe; ioe, o le a ou faaauupegaina foi o’u fafine ma o’u tamaiti, ma o le a ou alu atu e faasaga ia te oe, ma o le a ou mulimuli atu ia te outou e oo atu lava i lo outou lava laueleele, le laueleele lava lea o lo matou uluai tofi; ioe, ma o le toto mo le toto, ioe, ola mo le ola; ioe, ma o le a ou tau ma oe seia oo ina faaumatia ese oe mai luga o le fogaeleele.

13 Faauta, ua ou ita, ma lo’u nuu foi; ua outou saili e fasioti i matou, ae ua na’o na matou saili e puipui i matou lava. Ae faauta, afai tou te saili pea e faaumatia i matou, o le a matou saili e faaumatia outou; ioe, ma o le a matou saili lo matou laueleele, le laueleele lea o lo matou uluai tofi.

14 O lenei ua ou faai’u la’u tusi. O a’u o Moronae; o a’u o se taitai o tagata o sa Nifaē.

15 O lenei sa oo ina ua maua e Amorona lenei tusi, sa ita o ia; ma sa ia tusi mai se isi tusi ia Moronae, ma o upu nei sa ia tusia, fai mai:

16 O a’u o Amorona, o le tupu o sa Lamanā; o a’u o le uso o Amalekia o le na outou fasiotia. Faauta, o le a ou tauia lona toto i ou luga; ioe, ma o le a ou alu atu i o outou luga faatasi ma a’u autau, ona ou te le fefe i au taufaamatau.

17 Aua faauta, sa fai e o outou tamā le sesē i o latou uso, sa oo ina latou faoa mai ia i latou la latou aia i le malo, ae o se mea e aia tonu i ai i latou.

18 Ma o lenei faauta, afai tou te tuu i lalo a outou auupega o taua, ma tuu mai outou lava e pulea e i latou o e e ona moni lava le malo, ona ou faatonu lea o o’u tagata ia tuu i lalo a latou auupega o taua ma o le a le toe tau.

19 Faauta, ua e manava mai le taufaamatau e tele e faasaga ia te au ma o’u tagata; ae faauta, matou te le fefefe i au taufaamatau.

20 Ae ui i lea, o le a ou tuu atu e faafesuiai pagota e tusa ma lau talosaga, ma le fiafia, ina ia mafai ona ou faasaoina a’u meaai mo a’u tagata tau; ma o le a matou sii atu se taua o le a faavavau, a le pulea ai sa Nifaē i la matou pule o le a tineia ai i latou e faavavau.

21 Ma e faatatau i le Atua lena na e fai mai ua matou teena, faauta, ua matou le iloa se tagata faapena; pe o outou foi; peitai afai e i ai se tagata faapena, matou te le iloa ae pe na ia faia foi i matou e pei o outou.

22 Ma afai e faapea ua i ai se tiapolo ma se seoli, faauta, pe na te le auina atu ea oe iina e nonofo faatasi ai ma lo’u uso, o le na outou fasiotia, o le na e tau faaataata mai ua alu atu o ia i se nofoaga faapena? Ae faauta ua le afaina ia mea.

23 O a’u o Amorona, ma o se tupuga mai ia Sorama, o le na faamalosi e o outou tamā ma aveese mai i Ierusalema.

24 Ma faauta nei, o a’u o se sa Lamanā toa; faauta, ua sii le taua lenei e taui ai sesē na latou faia, ma taofi ma maua mai ai a latou aia i le malo; ma ua ou faai’u la’u tusi ia Moronae.