1 Ma o lenei sa oo i le amataga o le tausaga e tolusefulu o le nofoaiga a faamasino, i le aso lona lua o le masina muamua, na maua ai e Moronae se tusi mai ia Helamana, sa faamatala mai ai mataupu o le nuu i lena vaega o le laueleele.

2 Ma o upu nei na ia tusia, fai mai: Lo’u uso pele e, o Moronae, i la le Alii e faapea foi i puapuaga o o tatou taua; faauta, lo’u uso pele e, ua ia te au lava ni mea e faamatala atu ia te oe e uiga i la tatou taua i lenei vaega o le laueleele.

3 Faauta, o le lua afe o atalii o tagata ia o e na aumai e Amona mai le laueleele o Nifae—o lenei, ua e silafia o i latou ia o suli o Lamana, o lē o le atalii matua o lo tatou tamā o Liae;

4 O lenei e le manaomia ona ou toe faamatala atu ia te oe e uiga ia latou uputuu po o lo latou le talitonu, ona ua e silafia lelei e uiga i ia mea uma—

5 O lea ua lava ai ia te a’u ona ou faamatala atu ia te oe, o le lua afe o ia alii talavou ua latou ave ia latou auupega o taua, ma ua mananao ia avea a’u ma o latou ta’ita’i; ma ua matou o mai e puipui lo tatou atunuu.

6 Ma o lenei ua e silafia foi e uiga i le feagaiga lea na faia e o latou tamā, o le a latou le toe ave a’e lava ia latou auupega o taua e faasaga i o latou uso e faamasaa le toto.

7 Ae i le tausaga e luasefulu ma le ono, ina ua latou vaai i o tatou puapuaga ma o tatou fitā mo i latou, sa toetoe ina a latou solia le feagaiga lea sa latou faia ma ave a’e ia latou auupega o taua mo lo tatou puipuiga.

8 Peitai sa ou le tuu i latou ia latou solia lenei feagaiga ua latou faia, i le manatu o le a faamalosia i matou e le Atua, o le a matou le mafatia tele ai ona o le tausia o le tautoga lea na latou faia.

9 Ae faauta, o se tasi lenei o mea e mafai ona tatou maua ai le olioli tele. Auā faauta, i le tausaga e luasefulu ma le ono, o a’u, o Helamana, sa ou savali atu e ta’imua i nei alii talavou e lua afe, i le aai o Iutaia, e fesoasoani ia Anetipa, o le na e tofia e avea ma ta’ita’i i tagata o le vaega lena o le laueleele.

10 Ma sa ou faaopoopo atu i ai ou atalii e lua afe, (ona ua latou agavaa e ta’ua o atalii) i le autau a Anetipa, ma o se malosi lea sa olioli tele ai Anetipa; auā faauta, sa faaitiitia lana autau e sa Lamanā, ona sa fasiotia e a latou autau se aofai toatele o o tatou tagata, o se pogai lea tatou te faanoanoa ai.

11 Ae ui i lea, e mafai ona tatou faamafanafanaina i tatou lava i le mataupu lenei, ua feoti i latou ona o lo latou atunuu ma lo latou Atua, ioe, ma ua latou fiafia.

12 Ma ua taofia foi e sa Lamanā le toatele o pagota, o i latou uma o e o kapeteni sili, ona sa latou le faaolaina ni isi sa ese mai ai. Ma ua matou manatu o loo i ai nei i latou i le taimi nei i le laueleele o Nifae; o lea lava pe afai e lei fasiotia i latou.

13 Ma lenei foi, o aai nei ua maua e sa Lamanā e ala i le faamasaaina o le toto o le toatele o o tatou tagata totoa:

14 O le laueleele o Maneti, po o le aai o Maneti, ma le aai o Seseroma, ma le aai o Kumenae, ma le aai o Anetipara.

15 Ma o aai nei sa latou maua ina ua ou taunuu atu i le aai o Iutaia; ma sa ou maua atu Anetipa ma ona tagata o galulue ma lo latou malosi e tuiolo le aai.

16 Ioe, ma sa vaivai i latou i le tino faapea foi i le agaga, ona sa latou tau malolosi i le ao ma galulue i le po e taofimau o latou aai; ma sa faapea ona latou mafatia i puapuaga tetele uiga eseese.

17 Ma o lenei sa latou gauai ia latou manumalo i lenei nofoaga, pe feoti ai; o lea atonu e oo ifo i lou finagalo le manatu fiafia, o lenei autau toaitiiti na ou aumai faatasi ma a’u, ioe, o o’u atalii ia, na oo ifo ai ia te i latou le faamoemoe malosi ma le olioli tele.

18 Ma o lenei sa oo ina vaai mai sa Lamanā ua maua e Anetipa se faamalosiga tele i lana autau, sa taofi faamalosia i latou i ni faatonuga mai ia Amorona, ia aua nei o mai e faasaga i le aai o Iutaia, pe faasaga mai ia i matou, e tau.

19 Ma sa faapea ona faapitoa i matou e le Alii; auā a na latou o mai i luga o i matou i lo matou vaivai lea, atonu po ua mafai ona latou faaumatia si a matou autau toaitiiti; peitai sa faapea ona faasaoina o i matou.

20 Sa poloaiina i latou e Amorona ia latou taofimau aai ia ua latou ave. Ma sa faapea ona iu o le tausaga e luasefulu ma le ono. Ma i le amataga o le tausaga e luasefulu ma le fitu na matou saunia ai lo matou aai ma i matou lava mo le puipuiga.

21 O lenei sa matou mananao ia o mai sa Lamanā ia i matou; ona sa matou le mananao e fai se osofaiga i luga o i latou i o latou olo malolosi.

22 Ma sa oo ina matou tuu ni sipai faataamilo, e vaavaai gaoioiga a sa Lamanā, ina ia le mafai ona latou sopoia ane i matou i le po po o le ao e fai se osofaiga i luga o isi o tatou aai sa i le itu i matu.

23 Ona sa matou iloa, sa le lava le malosi sa i ai ia i latou sa i totonu o ia aai, e faafetaiai ai i latou; o lea na matou mananao ai, afai latou te pasi ane ia i matou, o le a matou pa’u’ū ifo i luga o i latou mai i o latou tua, ma faapea ona aveina ai i latou mai tua ma faafetaiai ai i latou i luma, i le taimi e tasi. Sa matou manatu e mafai ona matou faatoilaloina i latou; ae faauta, sa matou faanoanoa i lo matou mananao lea.

24 Sa latou fefefe e pasi ane ia i matou faatasi ma la latou autau atoa, pe sa latou totoa foi e o ane ma na’o se vaega, ne’i le lava lo latou malosi, ma latou pa’u’ū ai.

25 Pe sa latou totoa foi e savavali i lalo e faasaga i le aai o Sara’emila; pe sa latou totoa foi e sopo le mata o le vaitafe o Saitonu, i luga atu i le aai o Nifaea.

26 Ma sa faapea, faatasi ma a latou autau, ona latou gauai e taofimau aai ia ua latou ave.

27 Ma o lenei sa oo i le masina lona lua o le tausaga nei, na aumai ai ia te i matou ni meaai ma isi mea e tele mai tamā o o’u atalii na e lua afe.

28 Ma sa auina mai foi ia te i matou ni tagata e lua afe mai le laueleele o Sara’emila. Ma sa faapea ona matou saunia ai faatasi ma le sefulu afe o tagata, ma meaai mo i latou, ma mo a latou avā foi ma a latou fanau.

29 Ma o sa Lamanā, ina ua faapea ona vaai mai i le faatoateleina o a matou autau i aso taitasi, ma le taunuu mai o meaai mo lo matou tausiga, sa amata ona latou matatau, ma amata ona latou faataalise ane, e taofi lo matou mauaina o meaai ma le malosi, pe a mafai.

30 O lenei ina ua matou vaai atu ua amata ona tupu ae o le popole o sa Lamanā i lenei mea, sa matou mananao e aumai se togafiti e faaaoga ia te i latou; o lea na poloai mai ai Anetipa e tatau ia te au, faatasi ma ou atalii laiti, ona matou savavali atu i se aai tuaoi mai, e peiseai o lo o matou avatu ni meaai i se aai tuaoi.

31 Ma sa faatonu i matou ia savavali atu latalata ane i le aai o Anetipara, e peiseai o loo matou malaga atu i le aai i tala atu, i tuaoi i tafatafa o le matafaga.

32 Ma sa oo ina matou savavali atu, e peiseai ua faatasi ma mea matou te manaomia, e o atu ai i lena aai.

33 Ma sa oo ina savavali atu Anetipa ma se vaega o lana autau, ae tuu le vaega na totoe e tausi le aai. Peitai sa le savali atu o ia seia mavae ona ou alu atu faatasi ma lau autau toaitiiti, ma taunuu latalata atu i le aai o Anetipara.

34 Ma o lenei, o le aai o Anetipara sa faamautu ai le autau sili ona malosi a sa Lamanā; ioe, le autau sili ona toatele lea.

35 Ma sa oo ina ua ta’u atu ia te i latou e a latou sipai, sa latou o mai ma la latou autau ma savavali faasaga mai ia te i matou.

36 Ma sa oo ina matou sosola ese mai i o latou luma, e agai atu i matu. Ma sa faapea ona matou tata’i ese o le autau sili ona malosi a sa Lamanā;

37 Ioe, i se va mamao tele lava, sa oo ina ua latou vaai mai i le autau a Anetipa ua tuliloa atu i latou, ma lo latou malosi, sa latou le liliu i le itu taumatau po o le itu tauagavale, a ua tuli mai pea la latou savaliga i se ala sao e tuli mai i matou; ma sa matou manatu, o lo latou faamoemoe ia latou fasioti i matou ae lei maua mai i latou e Anetipa, ma o lo latou faamoemoe lea ina ia le mafai ona siomia i latou e o matou tagata.

38 Ma o lenei o Anetipa, ina ua vaai mai i lo matou tulaga mata’utia, sa faatelevave mai le savaliga a lana autau. Ae faauta, sa po; o lea na latou le maua mai ai i matou, pe na maua mai ai foi i latou e Anetipa; o lea na matou tolauapi ai mo le po.

39 Ma sa oo ina ae lei tafa mai ata o le taeao, faauta, ua tuliloa mai i matou e sa Lamanā. O lenei sa le lava lo matou malosi e tau ai ma i latou; ioe, sa ou le manao e tuu o’u atalii laiti ia pa’u’ū atu i o latou lima; o lea na alu ai pea la matou savaliga, ma sa alu la matou savaliga i le vao.

40 O lenei sa latou fefefe e liliu i le itu taumatau po o le itu tauagavale ina nei siomia i latou; pe sa ou manao foi e liliu i le itu taumatau po o le itu tauagavale ina nei o latou maua mai a’u, ona sa le mafai ona matou tutulai faasaga atu ia te i latou, e aunoa ma le fasiotia o i matou, ma latou sosola ai; ma sa faapea ona matou sosola ai i le aso atoa lena i le vao, sa oo lava ina ua pogisa.

41 Ma sa oo ina toe faapea foi, ina ua susulu mai le malamalama o le taeao sa matou vaai atu ua i o matou luga sa Lamanā, ma sa matou sosola ese mai i o latou luma.

42 Peitai sa oo ina sa lei mamao ona latou tuliloa mai o i matou ae ua latou taofi; ma o le taeao lea o le aso lona tolu o le masina lona fitu.

43 Ma o lenei, pe sa maua mai i latou e Anetipa sa matou le iloa, ae sa ou fai atu i ou tagata: Faauta, tatou le iloa ae pe ua latou taofi mo le faamoemoe ia tatou o atu e faasaga ia te i latou, ina ia latou maua ai i tatou i la latou mailei;

44 O lea ou atalii e, pe ni a fa outou, tou te fia o atu ea e faasaga ia te i latou i le taua?

45 Ma o lenei ou te fai atu ia te oe, lou uso pele e Moronae, ou te lei vaaia lava se lototetele tele faapea, leai, e lei vaaia lava i totonu o sa Nifaē atoa.

46 Ona talu mai le taimi na ou ta’ua ai i latou o ou atalii, (ona sa laiti lava i latou uma) sa faapea lava ona latou fai mai ia te au: Tamā e, faauta ua faatasi mai lo tatou Atua ma i tatou, ma o le a ia le tuua ia tatou pa’u’ū; o lea ia tatou o atu; tatou te le fasiotia o tatou uso pe afai latou te tuu pea i tatou; o lea ia tatou o atu ai, ina nei o latou faatoilaloina le autau a Anetipa.

47 O lenei latou te le’i tau lava, peitai sa latou le fefefe i le oti; ma sa sili atu ona latou mafaufau i le saolotoga o o latou tamā nai lo o latou ola; ioe, sa aoaoina i latou e o latou tinā, e faapea afai latou te le masalosalo, o le a laveaiina i latou e le Atua.

48 Ma sa latou faamatala mai ia te au upu a o latou tinā, e faapea: Matou te le masalosalo lava sa mautinoa lena mea e o matou tinā.

49 Ma sa oo ina ou toe liliu mai faatasi ma la’u lua afe e faasaga ia sa Lamanā o e sa tuli maia i matou. Ma o lenei faauta, sa maua mai i latou e autau a Anetipa, ma sa amata ai se taua matautia tele.

50 Ona o le vaivai o le autau a Anetipa, ona o la latou savaliga umi i le va o se taimi puupuu lava, sa tauau o le a pa’u’ū atu i lima o sa Lamanā; ma a na ou le toe liliu mai faatasi ma la’u lua afe po ua latou maua lo latou faamoemoe.

51 Ona ua pa’ū Anetipa i le pelu, ma le toatele o ona taitai, ona o lo latou vaivai, lea na pogai mai i le vave o la latou savaliga—o lea o tagata a Anetipa, ina ua fememeai ona o le pa’u’ū o o latou taitai, sa amata ona solomuli i luma o sa Lamanā.

52 Ma sa oo ina lototele sa Lamanā, ma amata ona tuliloa i latou; ma sa faapea ona tuliloa i latou e sa Lamanā ma le malosi tele ae oo mai loa Helamana i o latou tua faatasi ma lana lua afe, ma amata ona matua fasioti ia te i latou, sa oo ina ua taofi le autau atoa a sa Lamanā ma liliu ae ia Helamana.

53 O lenei ina ua vaai mai tagata a Anetipa ua toe liliu i tua sa Lamanā, sa latou faapotopoto faatasi o o latou tagata ma ua toe o mai i muliau o sa Lamanā.

54 Ma o lenei sa oo ina o i matou, o tagata a Nifae, o tagata a Anetipa, ma au faatasi ma la’u lua afe, sa matou siomia sa Lamanā, ma fasioti i latou; ioe, sa oo ina faamalosia i latou e tuu mai a latou auupega o taua ma i latou lava foi, o ni pagota o le taua.

55 Ma o lenei sa oo ina ua uma ona latou faaifo mai i latou lava ia te i matou, faauta, sa ou faitauina ia alii talavou o e na tau faatasi ma a’u, ma lo’u fefe nei toatele i latou ua fasiotia.

56 Ae faauta, i lo’u olioli tele, sa leai se tasi o i latou na pa’ū i le eleele; ioe, ma sa latou tau e peiseai ma le malosi o le Atua; ioe, e lei iloa ni tane ua tau ma le malosi faavavega faapea; ma sa latou pa’u’ū ifo i luga o sa Lamana faatasi ma le mana malosi faapea, sa latou faamatatauina i latou; ma o le pogai lea na tuu mai ai e sa Lamanā i latou lava o ni pagota o le taua.

57 Ma ona sa le i ai ia i matou se nofoaga mo a matou pagota, e mafai ona matou leoleoina ai i latou e taofi ai i latou mai autau a sa Lamanā, o lea na matou auina atu ai i latou i le laueleele o Sara’emila, ma se vaega o tagata na a Anetipa o e sa lei fasiotia, faatasi ma i latou; ae o le vaega na totoe sa ou avea ma faatasi mai i latou i au sa Amonā talavou, ma toe alu i tua la matou savaliga i le aai o Iutaia.