1 Im kiiō ālikin men kein iaar bōk juon lōta jān Ammoron, kiin̄ eo, ej ba bwe eļan̄n̄e inaaj kar kōtļo̧k rikalbuuj ro in tariņae ro kōm ar bōk er enaaj kar kōtļo̧k jikin kwelo̧k in Antipara n̄an kōm.

2 A iaar jilkinļo̧k juon lōta n̄an kiin̄ eo, bwe kōm ar jeļā ke ritariņae ro am raar bwe n̄an bōk jikin kwelo̧k in Antipara jān am kajoor; im jān kōtļo̧k rikalbuuj ro n̄an bōk jikin kwelo̧k eo kōmin kōtmāne bwe kōmij jajeļo̧kijeņ, im bwe kōm naaj kar kōtļo̧k wōt rikalbuuj ro n̄e ewōr oktaer.

3 Im Ammoron eaar dike lōta eo aō, bwe en kar jab kōtļo̧k rikalbuuj ro; kōn menin kōm ar jino kōm̧m̧ani m̧aanjāppopo ko n̄an kōm̧m̧alijar ņae jikin kwelo̧k in Antipara.

4 A armej in Antipara raar ilo̧k jān jikin kwelo̧k eo, im ko n̄an jikin kwelo̧k ko aer jet, ko raar aer, n̄an kapeniļo̧k; im āindein jikin kwelo̧k in Antipara eaar wōtlo̧k ilo peim.

5 Im āindein eaar jem̧ļo̧k ron̄oul im ruwalitōk iiō in tōl an riekajet ro.

6 Im ālikin men kein, ilo jino in iiō eo kein karon̄oul im ruwatimjuon, kōm ar bōk kakke in mennin aikuj ko, im barāinwōt ļapļo̧k eo n̄an jarin tariņae eo am, jān āneen Zaraemla, im jān jikin ko ipeļaakin ijo, n̄an oran eo jiljino to̧ujin em̧m̧aan, ijello̧kun jiljinon̄oul in ļōm̧aro nejin riAmmōn ro raar itok im kobatok ippān ro jeir im jatier, kumi jidikdik eo aō ruo to̧ujin. Im kiiō lo, kōm ar kajoor, aaet, im eaar wōr ippān barāinwōt eļap mennin aikuj ko kar būkitok n̄an kōm.

7 Im ālikin men kein eaar am kōņaan n̄an kōm̧m̧ane juon tariņae ippān jarin tariņae eo kar likūti n̄an oņaake jikin kwelo̧k Kumenai.

8 Im kiiō lo, inaaj kwaļo̧k n̄an eok bwe kōm ar m̧ōkaj im kōtōprak kōņaan in am; aaet, kōn jarin tariņae eo ekajoor am, ak kōn juon m̧ōttan jarin tariņae eo ekajoor am, kōm ar jepooļe, ilo bon̄, jikin kwelo̧k Kumenai, jidik iien m̧okta jān aer kar itōn bōk kakke in mennin aikuj ko.

9 Im ālikin men kein kōm ar kāām ipeļaakin jikin kwelo̧k eo ium̧win elōn̄ bon̄; a kōm ar kiki ioon jāje ko am, im likūt wōt ribaar ro, bwe riLeman ro ren jab maron̄ itok ioom̧ ilo bon̄ im m̧an kōm, eo raar kajjion̄ elōn̄ iien; a jon̄an wōt an lōn̄ iien raar kajjion̄ men in bōtōktōkier eaar to̧o̧rļo̧k.

10 Ālikin jidik iien mennin aikuj ko aer raar tōprakļo̧k, im rekar nan̄in deļo̧n̄ļo̧k ilo jikin kwelo̧k eo ilo bon̄. Im kōm, ijello̧kun riLeman ro, kar riNipai; kōn menin kōm ar bōk er im mennin aikuj ko.

11 Im mekarta n̄e riLeman ro kar m̧wijkōk jān jipan̄ ko aer ālikin wāween in, raar pen burueer wōt n̄an dāpij jikin kwelo̧k eo; kōn menin eaar erom mennin aikuj bwe kōmin bōk mennin aikuj kein im jilkinļo̧k n̄an Judia, im rikalbuuj ro am n̄an āneen Zaraemla.

12 Im ālikin men kein ejjab lōn̄ raan ko raar eļļā m̧okta jān an riLeman ro kar jino jako aolep kōjatdikdik n̄an jipan̄; kōn menin raar kōtļo̧k jikin kwelo̧k eo tok ilo peim; im āindein kōm ar kōtōpraki kōttōbalbal ko am ilo bōke jikin kwelo̧k Kumenai.

13 Ak ālikin men kein rikalbuuj ro am raar kanooj lōn̄ bwe, mekarta lōn̄ in kar oram, kōm ar aikuj in kōjerbal aolep jarin tariņae eo am n̄an lale er, ak n̄an leļo̧k er n̄an mej.

14 Bwe lo, ren kar rupe im ko ilo oran ko reļļap, im naaj kar ire kōn dekā ko, im kōn aļaļ in den̄den̄ ko, a jabdewōt men eo remaron̄ bōk ilo peier, jon̄an kōm an m̧an elōn̄ļo̧k jān ruo to̧ujin iaer ālikin aer kar ajetok er rikalbuuj in tariņae.

15 Kōn menin eaar erom mennin aikuj n̄an kōm, bwe kōmin kōjjem̧ļo̧k mour ko aer, ak baare er, jāje ilo pā, laļļo̧k n̄an āneen Zaraemla; im barāinwōt mennin aikuj ko am raar jab bwe wōt n̄an armej ro am make, mekarta eo kōm ar bōke jān riLeman ro.

16 Im kiiō, ilo wāween kein rekauwōtata, eaar erom juon wāween epen n̄an ļōmņak kōn rikalbuuj in tariņae rein; mekarta, kōm ar jek n̄an jilkinlaļļo̧k er n̄an āneen Zaraemla; kōn menin kōm ar kāālet juon m̧ōttan em̧m̧aan ro am, im leļo̧k n̄an er eddo ioon rikalbuuj ro am n̄an wanlaļļo̧k n̄an āneen Zaraemla.

17 Ak ālikin men kein ilo raan eo ilju raar ro̧o̧ltok. Im kiiō lo, kōm ar jab kajitūkin er kōn rikalbuuj ro; bwe ro, riLeman ro raar itok ioom̧, im raar ro̧o̧ltok ilo iien n̄an lo̧mo̧o̧ren kōm jān wōtlo̧k ilo peier. Bwe lo, Ammoron eaar jilkinļo̧k n̄an aer jipan̄ juon kakke in mennin aikuj ko rekāāl im barāinwōt jarin tariņae ko rellōn̄ in em̧m̧aan ro.

18 Im ālikin men kein em̧m̧aan ro kōm ar jilkinļo̧k ippān rikalbuuj ro raar tōpraktok ilo iien n̄an iuunļo̧k er, āinwōt ke raar nan̄in anjo̧ ioom̧.

19 A lo, kumi jidikdik in ruo to̧ujin im jiljinon̄oul eo aō raar tariņae ilo kate eļap; aaet, raar dim im̧aan riLeman ro, im raar m̧anļo̧k aolep ro raar jum̧ae er.

20 Im ke bwe in jarin tariņae eo eaar nan̄in kōtļo̧k iaļ im̧aan riLeman ro, lo, ro ruo to̧ujin im jiljinon̄oul raar pen im dim.

21 Aaet, im raar pokake im kōjparok n̄an kōm̧m̧an naan in jiron̄ otemjeļo̧k ilo jejjet; aaet, im em̧ool ekkar n̄an tōmak eo aer eaar waļo̧k n̄an er; im iaar keememej naan ko raar ba n̄an eō bwe ro jineer raar katakin er.

22 Im kiiō lo, eaar rein nejū m̧aan, im em̧m̧aan ro kar kāālet er n̄an bōkļo̧k rikalbuuj ro, n̄an er jej m̧uri kōn anjo̧ in eļap; bwe eaar er ro raar m̧an riLeman ro; kōn menin kar lukwarkware er likļo̧k n̄an jikin kwelo̧k in Mantai.

23 Im kōm ar bar bōk jikin kwelo̧k eo am Kumenai, im kar jab aolep mej jān jāje eo; mekarta, kōm ar en̄taan kōn eļap jorrāān.

24 Im ālikin men kein ke riLeman ro raar ko, iaar m̧ōkaj im leļo̧k naan in jiron̄ ko bwe em̧m̧aan ro aō raar kinejnej ren em̧m̧akūt jān ilubwiljin ro rimej, im kōm̧m̧an bwe kinej ko aer ren korak.

25 Im ālikin men kein eaar wōr rūbukwi, jān ro aō ruo to̧ujin im jiljinon̄oul, ro raar ļotļo̧k kōnke jako im bōtōktōk; mekarta, ekkar n̄an em̧m̧an an Anij, im n̄an am bwilōn̄ eļap, im barāinwōt m̧ōņōņō eo an aolepān jarin tariņae eo am, eaar ejjeļo̧k juon iaer eaar jako; aaet, im barāinwōt ejjeļo̧k juon iaer eaar jab bōk elōn̄ kinej ko.

26 Im kiiō, aer kijenmej eaar kōļo̧kjānan aolepān jarin tariņae eo am, aaet, bwe ren kar rōļo̧k ak eaar wōr juon to̧ujin in ro jeiūm̧ im jatūm̧ raar mej. Im kōmij leļo̧k nebar in n̄an kajoor in Anij ekabwilōn̄lōn̄, kōnke aer tōmak otem tōmak ilo men ko kar katakin er n̄an tōmaki—bwe eaar wōr juon Anij ejim̧we, im jabdewōt eo ej jab pere, bwe renaaj rōļo̧k kōn kajoor eo eaiboojoj An.

27 Kiiō en̄in ej tōmak eo an rein ro iaar kōnono kake er; rej inono, im ļōmņak ko aer reppen, im rej likūt aer lōke ilo Anij iien otemjej.

28 Im kiiō ālikin men kein ke em̧ōj am kar āindein lale em̧m̧aan ro am raar kinejnej, im kar kalbwin rimej ro am im barāinwōt rimej ro an riLeman ro, ro raar lōn̄, lo, kōm ar kajitūkin Gid kōn rikalbuuj ro rekar jino n̄an wanlaļļo̧k n̄an āneen Zaraemla deļo̧n̄.

29 Kiiō Gid eaar kapen utiej eo ioon jar eo kar jitōn̄ n̄an baare er laļļo̧k n̄an āneo.

30 Im kiiō ālikin men kein, erkein naan ko Gid eaar ba n̄an eō: Lo, kōm ar jino wanlaļļo̧k n̄an āneen Zaraemla ippān rikalbuuj ro am. Im ālikin men kein kōm ar iioon riiaron̄ron̄ ro jān jarin tariņae ko ad ro kar jilkinļo̧k er n̄an waate kāām eo an riLeman ro.

31 Im raar kūr n̄an kōm, im ba—Lo, jarin tariņae ko an riLeman rej m̧aajļo̧k n̄an jikin kwelo̧k in Kumenai; im lo, renaaj wōtlo̧k ioer, aaet, im naaj ko̧kkure armej ro ad.

32 Im ālikin men kein rikalbuuj ro ad raar ron̄ kūr ko aer, ko raar kōperan er; im raar jutak lōn̄tak ilo jum̧ae kōm.

33 Im ālikin men kein kōnke jum̧ae eo aer, kōm ar kōm̧m̧an bwe jāje ko am ren itok ioer. Im ālikin men kein raar ilo juon wōt ānbwin ettōrtok ioon jāje ko am, im ilo iien eo, eļapļo̧k oran eo aer eaar mej; im bweier raar ļe im ko jān kōm.

34 Im lo, ke raar ko im kōm ar jab maron̄ jibwe er, kōm aer jarōbļo̧k n̄an jikin kwelo̧k Kumenai; im lo, kōm ar tōpraktok ilo iien bwe kōmin maron̄ jipan̄ ro jeiūm̧ im jatūm̧ ilo kōjparok jikin kwelo̧k eo.

35 Im lo, kōmij bar jo̧o̧r jān pein ro am rikōjdat. Im ejeraam̧m̧an etan ad Anij; bwe lo, ej E eo eaar kōjo̧o̧r kōm; aaet, eo Eaar kōm̧m̧ane men in eļap n̄an kōj.

36 Kiiō ālikin men kein ke n̄a, Hilamōn, iaar ron̄ naan kein an Gid, iaar obrak kōn m̧ōņōņō otem m̧ōņōņō kōnke em̧m̧an an Anij ilo kōjparok kōm, bwe kōmin maron̄ jab aolep jako; aaet, ij lōke bwe jetōb ko an ro raar jako raar deļo̧n̄ļo̧k ilo kakkije an aer Anij.