1 K’ehomaq reetal, kik’ulman anajwan naq moko najt ta chik chirix naq laj Moroni kixtaqla lix hu rik’in li xb’eenil aj jolominel, kixk’ul jun xhu laj Pahoran, li xb’eenil aj jolominel. A’in ut li aatin kixk’ul:

2 Laa’in, aj Pahoran, xb’eenilin aj jolominel re li ch’och’ a’in, nintaqla li aatin a’in re laj Moroni, li xb’eenil aj taqlanel sa’ xb’een li teep aj pleet. K’e reetal, ninye aawe, at Moroni, naq moko nasaho’ ta inch’ool rik’in xnimal aach’a’ajkilal, relik chi yaal, naraho’ inch’ool rik’in.

3 A’b’an k’e reetal, wankeb’ li neke’saho’ xch’ool rik’in lee ch’a’ajkilal, relik chi yaal, toj reetal naq ke’wakli sa’ po’resink ch’oolej wik’in laa’in, jo’ ajwi’ xkomoneb’ lin tenamit li ach’ab’anb’il winqeb’, relik chi yaal, ut q’axal k’iheb’ li ke’wakli chaq.

4 Ut a’aneb’ li ke’sik’ok chaq xmaq’b’al chiwu li raqleb’aal aatin li ke’tikib’ank re li nimla maa’usilal a’in; xb’aan naq maak’a’jo’ li sahil aatin ke’roksi, ut ke’xjalb’ehi xch’ooleb’ naab’al li tenamit, xb’aan wi’ taachalq rahil ch’a’ajkilal sa’ qayanq; ut ke’xram li k’a’ru kiqataqla raj, ut ke’xka’ch’inob’resiheb’ xch’ool li qa-ach’ab’anb’il winq, re naq ink’a’ ke’chal eerik’in.

5 Ut k’e reetal, kine’ralinasi chaq chiruheb’, ut kin’eelelik sa’ li ch’och’ Gideon, wochb’een jo’ k’ihaleb’ li winq li kinru chixk’amb’al chiwix.

6 Ut k’e reetal, kintaqla xjek’inkil jun aatin chiru li jun raqal chi ch’och’ a’in, ut k’e reetal, wulaj wulaj yookeb’ chixmolk’ankil rib’ qik’in, chixchapb’al xk’anjeleb’aal re pleet, re xkolb’al lix tenamiteb’ ut li ach’ab’aak wankeb’ wi’, ut re reeqajunkil li ra kiqak’ul.

7 Ut chalenaqeb’ qik’in, jo’kan naq eb’ li xe’wakli sa’ po’resink ch’oolej qik’in wankeb’ chi ramb’il, jo’kan naq nokohe’xxuwa ut maak’a’eb’ xch’ool chi elk re qapleetinkil.

8 Eb’ a’an ak reechanihomeb’ li ch’och’, malaj li tenamit, Tzarahemla; ke’xxaqab’ jun rey sa’ xb’eeneb’, ut a’an xtz’iib’ak re lix reyeb’ laj Lamanita, sa’ li ki’ok wi’ sa’ aatin rik’in; ut sa’ li sum-aatin a’an, xye naq a’an tixk’uula xwankil sa’ xb’een li tenamit Tzarahemla, ut rik’in li k’uulank wankil a’an, naxk’oxla naq te’ruuq laj Lamanita chi numtaak sa’ xb’een rela’ li ch’och’, ut a’an taak’ojob’aaq choq’ rey sa’ xb’een li tenamit a’in naq te’numtaaq laj Lamanita sa’ xb’eeneb’.

9 Ut anajwan, sa’ laa hu kinaajit, a’b’an maak’a’ naxye a’an; moko yoo ta injosq’il, nasaho’ b’an inch’ool rik’in xnimal ru aach’ool. Laa’in, aj Pahoran, moko ninsik’ ta wankilal, ka’ajwi’ re kanaak sa’ inraqleb’aal aatin re naq tinruuq chixk’uulankil li k’a’ru xk’ulub’eb’ ut li ach’ab’aak wankeb’ wi’ lin tenamit. Li waam xaqxo chi kaw sa’ li ach’ab’aak a’an li koorach’ab’ wi’ li Dios.

10 Anajwan ut k’e reetal, taqaram li maa’usilal toj reetal ajwi’ li hoyok kik’. Ink’a’ raj taqahoy xkik’eleb’ laj Lamanita wi ta te’kanaaq sa’ tz’aqal xch’och’eb’ a’an.

11 Ink’a’ raj taqahoy xkik’eleb’ li qas qiitz’in wi ta ink’a’ te’wakliiq sa’ po’resink ch’oolej ut te’xtaqsi li yok’leb’ ch’iich’ chiqu.

12 Taqak’e raj qib’ rub’el li iiqleb’ re moosil wi ta jo’kan ajb’il ru rik’in xtiikal ru lix na’leb’ li Dios, malaj ut wi ta a’an tooxtaqla chixb’aanunkil chi jo’kan.

13 A’b’an k’e reetal, moko nokoxtaqla ta naq taqak’e qib’ rub’el xwankil li xik’ neke’ilok qe, naq taqakanab’ b’an qib’ chiru a’an, ut a’an tooxkol.

14 Jo’kan ut, at was wiitz’in Moroni raarookat inb’aan, chiqaram li ink’a’ us, ut k’a’ruhaq li ink’a’ us li moko naru ta chiqu xramb’al rik’in li qaatin, relik chi yaal, jo’ li po’resink ch’oolej ut li jachok-ib’, chiqaram rik’in li qayok’leb’ ch’iich’, re taaruuq taakanaaq qik’in li ach’ab’aak wanko wi’, re taaruuq taasaho’q qach’ool sa’ li nimla usilal naq wan li qa-iglees, ut sa’ lix na’leb’ laj Tojol qix ut li qaDios.

15 Jo’kan ut, seeb’a aawib’ chi chalk wik’in aawochb’een junjunq reheb’ laa winq, ut kanab’ li jun ch’ol chik chi taqlanb’il xb’aan laj Lehi ut laj Teankum; k’e reheb’ a’an wankilal re xb’eresinkil li pleet sa’ li jun raqal chi ch’och’ a’an, jo’ chanru lix Musiq’ li Dios, a’an ajwi’ li musiq’ej re ach’ab’aak li wank rik’ineb’.

16 K’e reetal, kintaqla reheb’ b’ayaq li k’a’ru taak’anjelaq reheb’, re naq ink’a’ te’oso’q toj reetal naq texruuq chi chalk wik’in.

17 Ch’utub’ jo’ nimal xkawil li teep li naru chawu sa’ laa b’eenik toj arin, ut taqaseeb’a qib’ chi xik chixpleetinkileb’ li ke’risi chaq rib’, rik’in lix metz’ew li qaDios jo’ chanru li paab’aal li wan qik’in.

18 Ut laa’o taqeechani li tenamit Tzarahemla, re taqataw chik li tzakemq re xtaqlankil re laj Lehi ut laj Teankum; relik chi yaal, tooxik chixpleetinkileb’ rik’in xmetz’ew li Qaawa’, ut taqak’e xraqik li nimla maa’usilal a’in.

19 Ut anajwan, at Moroni, nasaho’ inch’ool rik’in xk’ulb’al aahu, xb’aan naq kiwan ka’ch’inaq ink’a’uxl chirix k’a’ru tento taqab’aanu, ma tiik ta choq’ qe xik chixpleetinkileb’ li qas qiitz’in.

20 A’b’an laa’at xaye, wi ink’a’ neke’xjal xk’a’uxl li Qaawa’ katxtaqla naq tatxik chixpleetinkileb’.

21 Chawil naq taak’e xkawileb’ laj Lehi ut laj Teankum sa’ li Qaawa’; ye reheb’ naq me’xuwak, xb’aan naq li Dios tixkoleb’, relik chi yaal, ut jo’kaneb’ ajwi’ chixjunileb’ li neke’xxaqab’ rib’ chi kaw sa’ li ach’ab’aak a’an li kirach’ab’eb’ wi’ li Dios. Ut anajwan ninchoy lin hu rik’in li was wiitz’in raaro inb’aan, aj Moroni.