1 Faauta, o lenei sa oo ina sa le’i umi ona auina atu e Moronae lana tusi i le kovana sili, ae ia maua se tusi mai ia Paorana, le kovana sili. Ma o upu nei na ia maua mai:

2 O a’u, o Paorana, o le kovana sili o lenei laueleele, ou te auina atu nei upu ia Moronae, le kapeteni sili o le autau. Faauta, ou te fai atu ia te oe, Moronae, ou te le olioli i o outou puapuaga tele, ioe, ua faanoanoa ai lo’u agaga.

3 Ae faauta, o loo i ai i latou o e ua olioli i o outou puapuaga, ioe, ua oo ina latou tutū a’e e fouvale faasaga mai ia te a’u, ioe, ma i latou uma foi o o’u tagata o ē o tagata-saoloto, ioe, ma o i latou o ē ua tutū a’e e fouvale mai ua matuā toatele lava.

4 Ma o i latou o e na saili e aveese le nofoa-faamasino mai ia te a’u, o i latou ia o le pogai o lenei amioletonu tele; ona ua latou faaaoga le faaviivii tele, ma ua latou ta’ita’i ese loto o le toatele o tagata, lea o le a a avea ma pogai o puapuaga tiga i totonu o i tatou; ua latou taofi a matou meaai, ma ua latou faamata’u o tatou tagata saoloto ua latou le o atu ai ia te outou.

5 Ma faauta, ua latou tuli a’u i fafo mai o latou luma, ma ua ou sola atu i le laueleele o Kitiona, faatasi ma le toatele o tagata sa mafai ona ou maua.

6 Ma faauta, ua ou auina atu se folafolaga i le vaega atoa lenei o le laueleele; ma faauta, ua latou lolofi mai ia te i matou i aso taitasi, ma a latou auupega, i le puipuiga o lo latou atunuu ma lo latou saolotoga, ma taui masui ai sese ua matou fai.

7 Ma ua latou o mai ia te i matou, ua oo lava ia i latou ua tulai e tetee faasaga mai ia te i matou ua tutulai e fouvale, ioe, sa oo ina latou matata’u ia te i matou ma fefefe e o mai matou te tau.

8 Ua latou maua le laueleele, po o le aai, o Sara’emila; ua latou tofia se tupu i luga o i latou, ma ua tusi atu o ia i le tupu o sa Lamanā, lea na ia faia ai se soo ma ia; le soo lea na ia ioe ai na te taofia le aai o Sara’emila, le taofiga lea na ia manatu o le a mafai ai e sa Lamanā ona manumalo i le vaega o totoe o le laueleele, ma o le a faanofo ai o ia o le tupu i luga o lenei nuu pe a pulea i latou i lalo o sa Lamanā.

9 Ma o lenei, ua e aoaiina a’u i lau tusi, ae ua le afaina lea; ou te le o ita, a ua ou olioli i le telē o lou loto. O a’u, o Paorana, ou te le saili mo le pule, na’o lo’u fia tausi i lo’u nofoa-faamasino ina ia mafai ona ou faasaoina aia ma le saolotoga o o’u tagata. Ua tumau mausali pea lo’u agaga i lena saolotoga ua faasaolotoina ai i tatou e le Atua.

10 Ma o lenei, faauta, o le a matou tetee atu i le amioleaga e oo lava i le faamasaa toto. Matou te le faamasaaina toto o sa Lamanā pe afai latou te nonofo pea i o latou lava laueleele.

11 Matou te le faamasaaina toto o o tatou uso pe afai latou te le tutū a’e i le fouvale ma ave le pelu e faasaga mai ia te i matou.

12 Matou te tuu atu i matou lava i lalo o le amo o le pologa pe afai e tusa ai lea mea ma le faamasinotonu o le Atua, pe afai foi na te poloaiina ai i matou ia faapea ona matou faia.

13 Ae faauta ua le poloaiina e ia i tatou ia tatou tuu atu i tatou lava ia pulea e o tatou fili, ae e tatau ona tatou tuu atu lo tatou faalagolago ia te ia, ma o le a ia laveaiina i tatou.

14 O lea, lo’u uso pele e, Moronae, ia tatou tetee atu i le leaga, ma o soo se mea leaga e le mafai ona tatou teena ia tatou upu, ioe, e pei o fouvalega ma faatuiesega, ia tatou teena i latou ia tatou pelu, ina ia mafai ona tatou taofimau i lo tatou saolotoga, ina ia mafai ona tatou olioli i faamanuiaga e tele o la tatou ekalesia, ma i le faamoemoe o lo tatou Togiola ma lo tatou Atua.

15 O lea, ia e sau vave ia te a’u faatasi ma ni ou tagata toaitiiti, ae tuu le vaega e totoe i le vaaiga a Liae ma Teanekuma; tuu atu ia i la’ua le pule e ta’ita’i ai le taua i le vaega lena o le laueleele, e tusa ma le Agaga o le Atua, o le agaga foi lea o le saolotoga lea o loo ia te i la’ua.

16 Faauta ua ou auina atu ni meaai itiiti ia te i latou, ina ia latou le fano, seia mafai ona e sau ia te a’u.

17 Faapotopoto faatasi se autau e mafai ona e faapotopoto i lau savaliga mai iinei, ma o le a tatou o atu vave e faasagatau i ia tagata faatuiese, i le malosi o lo tatou Atua, e tusa ma le faatuatua ua ia te i tatou.

18 Ma o le a tatou ave le aai o Sara’emila, ina ia mafai ona tatou maua o ni meaai e tele e auina atu ia Liae ma Teanekuma; ioe, o le a tatou o atu e faasagatau ia te i latou i le malosi o le Alii, ma o le a tatou faaiuina lenei amioletonu tele.

19 Ma o lenei, Moronae e, ua ou olioli lava i lo’u maua mai o lau tusi, ona sa ou popole lava e uiga i se mea e tatau ona tatou faia, pe ua tonu ia i tatou ona tatou o atu e faasagatau atu i o tatou uso.

20 Peitai na e saunoa mai, vagana ai ua latou salamo, ua fetalai mai le Alii ia te oe, e tatau ona e alu atu e faasagatau ia te i latou.

21 Tagai ia e faamalosi ia Liae ma Teanekuma i la le Alii; fai atu ia te i la’ua e aua nei fefefe, ona o le a laveaiina i latou e le Alii, ioe, ma i latou uma foi o e e tutumau mausali i le saolotoga lena ua faasaolotoina ai i latou e le Atua. Ma o lenei ua ou faai’u la’u tusi i lo’u uso pele, o Moronae.