1 Ut anajwan kik’ulman naq chirix naq laj Alma kixk’e xraqik raatinankileb’ li ani wankeb’ sa’ li iglees, li xaqab’anb’il sa’ li tenamit Tzarahemla, kixk’ojob’eb’ laj tij ut li xb’eenil, rik’in xk’eeb’al li ruq’ sa’ xb’eeneb’ jo’ chanru lix k’anjelil li Dios, re xjolominkil ut xk’aak’alenkil li iglees.

2 Ut kik’ulman naq eb’ li ani moko neke’wan ta sa’ li iglees li ke’jalok xk’a’uxl chirixeb’ lix maak ke’kub’e xha’ choq’ re li jalb’a-k’a’uxlej, ut ke’k’ule’ sa’ li iglees.

3 Ut kik’ulman ajwi’ naq eb’ li ani wankeb’ sa’ li iglees li ink’a’ ke’xjal xk’a’uxl chirix lix maa’usilaleb’ ut ink’a’ ke’xtuulanob’resi rib’ chiru li Dios—ninye eb’ li ani taqsinb’ileb’ sa’ xq’etq’etileb’ xch’ool—eb’ a’an ke’tz’eqtaanaak, ut ke’sache’ reetalil lix k’ab’a’eb’, jo’kan naq lix k’ab’a’eb’ moko ke’k’ehe’ ta sa’ ajl sa’ xyanqeb’ xk’ab’a’eb’ li tiikeb’ xch’ool.

4 Ut chi jo’kan ke’ok chixtuqub’ankil xk’anjelil li iglees sa’ li tenamit Tzarahemla.

5 Anajwan nawaj raj naq teetaw ru naq li raatin li Dios kiwan chi yeechi’inb’il re chixjunileb’, jo’kan naq maajun narame’ ru chixch’utub’ankil rib’ re rab’inkil li raatin li Dios.

6 A’b’anan eb’ li ralal xk’ajol li Dios ke’taqlaak naq te’xch’utub’ rib’ chi kok’ aj xsa’, ut te’xjunaji rib’ sa’ xkuyb’al xsa’ ut tijok rik’in nimla metz’ew choq’ re xchaab’ilal xch’ooleb’ li ink’a’ neke’xnaw ru li Dios.

7 Ut anajwan kik’ulman naq chirix naq laj Alma kixb’aanu li tuqub’ank a’in, ki’el chaq rik’ineb’, relik chi yaal, rik’in li iglees li wan sa’ li tenamit Tzarahemla, ut xko’o chixjunpak’al li nima’ Sidon sa’ releb’ saq’e, sa’ li ru taq’a Gideon, ut wan jun li tenamit kab’lanb’il, a’an li tenamit Gideon xk’ab’a’, li wan sa’ li ru taq’a Gideon yeeb’il re, k’eeb’il xk’ab’a’ jo’ chanru xk’ab’a’ li winq li kamsinb’il xb’aan ruq’ laj Nehor rik’in li yok’leb’ ch’iich’.

8 Ut laj Alma xko’o ut ki’ok chixch’olob’ankil li raatin li Dios chiru li iglees li xaqab’anb’il sa’ li ru taq’a Gideon, jo’ chanru naq k’utb’esinb’il li yaal chirix li aatin yeeb’il xb’aaneb’ lix yuwa’, ut jo’ chanru li musiq’ej re profeetil aatin li kiwan rik’in, jo’ chanru naq ch’olob’anb’il xyaalal li Jesukristo, li Ralal li Dios, li taachalq chixtojb’al rix lix tenamit chiruheb’ lix maak, ut li santil k’anjelil li b’oqb’il wi’. Ut chi jo’kan tz’iib’anb’il. Amen.