1 Ut anajwan laa’in, aj Moroni, nin’ok wi’chik chixchoyb’al li esil nintz’iib’a chirix lix sachlijik li tenamit li yookin wi’ chi tz’iib’ak.

2 Xb’aan naq k’ehomaq reetal, ke’xtz’eqtaana chixjunil li raatin laj Eter, xb’aan naq a’an kixye chi yaal reheb’ chirix chixjunil li k’a’aq re ru, chalen chaq xtiklajik li winq; ut naq chirix naq kikub’e chaq li b’uut’iha’ sa’ lix b’een li ch’och’ a’in, ki’ok choq’ jun ch’och’ sik’b’il ru sa’ xb’een chixjunil chik li ch’och’, jun ch’och’ sik’b’il ru xb’aan li Qaawa’; jo’kan naq li Qaawa’ taaraj naq chixjunileb’ li winq te’k’anjelaq chiru a’an, li te’wanq sa’ xb’een;

3 Ut naq a’an xna’aj li Ak’ Jerusalen, li taakub’eeq chaq sa’ choxa, ut lix santil muheb’aal li Qaawa’.

4 K’ehomaq reetal, laj Eter kiril lix kutankil li Kristo, ut ki’aatinak chirix jun li Ak’ Jerusalen sa’ xb’een li ch’och’ a’in.

5 Ut ki’aatinak ajwi’ chirix lix junkab’al laj Israel, ut li Jerusalen taachalq wi’ chaq laj Lehi—chirix naq taasachmanq taawaklesimanq wi’chik, jun santil tenamit choq’ re li Qaawa’; jo’kan ut, maawa’aq jun ak’ Jerusalen xb’aan naq ak wanjenaq chaq sa’ najter kutan; a’b’anan taawaklesimanq wi’chik, ut taa’ok choq’ santil tenamit re li Qaawa’; ut taawaklesimanq choq’ re lix junkab’al laj Israel—

6 Ut naq taawaklesimanq jun Ak’ Jerusalen sa’ xb’een li ch’och’ a’in, choq’ re li rela’ li riyajil laj Jose, ut wanjenaq reetalil li k’a’aq re ru a’in.

7 Xb’aan naq jo’ chanru naq laj Jose kixk’am lix yuwa’ taq’a sa’ li ch’och’ Egipto, chi jo’kan aran kikam; jo’kan ut, li Qaawa’ kixk’am chaq jun rela’ li riyajil laj Jose, sa’ li ch’och’ Jerusalen, re naq taaruxtaana ru li riyajil laj Jose re naq moko te’oso’q ta, jo’ chanru ajwi’ naq kiruxtaana ru lix yuwa’ laj Jose re naq ink’a’ taa’oso’q.

8 Jo’kan ut, li rela’ lix junkab’al laj Jose taawaklesimanq sa’ xb’een li ch’och’ a’in, ut a’anaq jun xch’och’il li reechanihomeb’; ut eb’ a’an te’xwaklesi jun santil tenamit choq’ re li Qaawa’, chanchan li Jerusalen re najter; ut moko te’sache’q ta chik xna’leb’eb’, toj taachalq li roso’jik naq taa’oso’q li ruchich’och’.

9 Ut taawanq jun ak’ choxa ut jun ak’ ruchich’och’; ut te’wanq chanchan li kiwan najter, ka’ajwi’ naq oso’jenaq li kiwan najter, ut ak’ob’resinb’il chixjunil li k’a’aq re ru.

10 Toja’ ut nachal li Ak’ Jerusalen; ut osob’tesinb’ileb’ li neke’wan chi sa’, xb’aan naq a’aneb’ a’an li saqeb’ li raq’ xb’aan lix kik’el li Karneer; ut a’aneb’ a’an li k’eeb’ileb’ sa’ ajl sa’ xyanq li rela’ li riyajil laj Jose, li xkomoneb’ chaq lix junkab’al laj Israel.

11 Toja’ ut naq nachal ajwi’ li Jerusalen re najter; ut li ani wankeb’ chi sa’, osob’tesinb’ileb’, xb’aan naq ch’ajb’ileb’ sa’ lix kik’el li Karneer; ut a’aneb’ a’an li ke’jek’iik ut ke’ch’utub’aak chaq sa’ xkaajachalil li ruchich’och’, ut sa’eb’ chaq li ch’och’ sa’ xnim li saq’e, ut neke’tz’aqon sa’ xtz’aqob’resinkil ru li sumwank kixk’uub’ li Dios rik’in laj Abraham, lix yuwa’eb’.

12 Ut naq taachalq li k’a’aq re ru a’in, nak’ehe’ chi uxmank li raqal sa’ li loq’laj hu li nayehok re: wankeb’ li ke’wan chaq choq’ xb’eenil, li te’wanq choq’ aj ch’otonel; ut wankeb’ li ke’wan chaq choq’ aj ch’otonel, li te’wanq choq’ xb’eenil.

13 Ut ok raj we chixtz’iib’ankil chik li aatin, a’b’an yeeb’il we naq ink’a’ tinb’aanu; a’ut nim ru ut sachol ch’oolej lix profeetil aatin laj Eter; a’b’anan ke’ril chanchan naq maak’a’ xloq’al, ut ke’risi chaq; ut a’an kixmuq rib’ sa’ xtehelal jun pek chi kutan, ut chi q’eq xko’o chirilb’al li k’a’aq re ru taachalq sa’ xb’een li tenamit.

14 Ut naq kiwan sa’ xtehelal jun li pek kixtz’iib’a li rela’ li hu a’in, ut chi q’eq kiril li sache’k li kichal sa’ xb’een li tenamit.

15 Ut kik’ulman naq sa’ li chihab’ ajwi’ a’an naq ki’isiik chaq sa’ xyanq li tenamit, ki’ok chi wank jun nimla pleet sa’ xyanq li tenamit, xb’aan naq ke’wan naab’al li ke’wakli, a’aneb’ winq ninqeb’ xmetz’ew, ut ke’xsik’ xsachb’al laj Koriantumr rik’in lix muqmuukil k’uub’anb’il na’leb’ re maa’usilal, li ak yeeb’il resil.

16 Ut anajwan laj Koriantumr, rik’in naq a’an ajwi’ ak tzolb’il sa’ chixjunil li na’leb’ chirix li pleetik ut chixjunil lix seeb’al li ruchich’och’, chi jo’kan kixpleetiheb’ li ke’sik’ok re xsachb’al.

17 A’b’an ink’a’ kixjal xk’a’uxl, chi moko eb’ lix chaq’al ru alal ut rab’in; chi moko eb’ lix chaq’al ru alal ut rab’in laj Kohor; chi moko eb’ lix chaq’al ru alal ut rab’in laj Korihor; jo’kan ut, maajun wan reheb’ li chaq’al ru alalb’ej ut rab’inb’ej chiru lix b’een chixjunil li ch’och’ li ke’jalok re xk’a’uxl chirixeb’ lix maak.

18 Jo’kan ut, kik’ulman naq sa’ li xb’een chihab’ kiwan wi’ laj Eter sa’ xtehelal jun pek, ke’wan naab’al li tenamit li ke’kamsiik xb’aan lix yok’leb’ ch’iich’eb’ li muqmuukil molam a’an, li ke’pleetink re laj Koriantumr re te’ruuq chixtawb’al li awa’b’ejihom.

19 Ut kik’ulman naq eb’ li ralal laj Koriantumr ke’pleetik chi naab’al ut ke’el xkik’el chi naab’al.

20 Ut sa’ li xkab’ chihab’ li raatin li Qaawa’ kichal rik’in laj Eter, naq taaxik ut tixch’olob’ jo’ profeet chiru laj Koriantumr naq wi tixjal xk’a’uxl, ut chixjunil lix junkab’al, li Qaawa’ tixk’e re a’an li rawa’b’ejihom ut tixkol xyu’ameb’ li tenamit—

21 Wi ut ink’a’, te’sache’q, ut chixjunil lix junkab’al, ka’ajwi’ a’an xjunes ink’a’. Ut a’an yal taakanaaq chi yo’yo re rilb’al lix tz’aqlojik ru li profeetil aatin li yeeb’il chirix jalan chik tenamit naq taak’uluq re li ch’och’ choq’ reechanihom; ut laj Koriantumr tixk’ul jun xmuqlajik xb’aaneb’; ut taasache’q li junjunq chi aamej, ka’ajwi’ laj Koriantumr ink’a’.

22 Ut kik’ulman naq laj Koriantumr ink’a’ kixjal xk’a’uxl, chi moko lix junkab’al, chi moko eb’ li tenamit; ut ink’a’ kich’ana li pleet; ut ke’xsik’ xkamsinkil laj Eter, a’b’an a’an ki’eelelik chaq chiruheb’ ut kixmuq wi’chik rib’ sa’ xtehelal li pek.

23 Ut kik’ulman naq kiwakli laj Xared, ut a’an kixpleeti ajwi’ laj Koriantumr; ut kixq’ax ru, jo’kan naq sa’ li rox chihab’ kixk’am chi preexil.

24 Ut eb’ li ralal laj Koriantumr, sa’ li xkaa chihab’, ke’xq’ax ru laj Xared, ut ke’xtaw wi’chik li awa’b’ejihom choq’ re lix yuwa’eb’.

25 Anajwan ki’ok chi wank jun pleet chiru chixjunil lix b’een li ch’och’, li junjunq chi winq rochb’een lix ch’uut yoo chi pleetik choq’ re li k’a’ru naraj.

26 Ut ke’wan laj elq’, ut chi jo’kan b’i’, li k’iila paay chi maa’usilal chiru chixjunil lix b’een li ch’och’.

27 Ut kik’ulman naq laj Koriantumr kijosq’o’ chi numtajenaq rik’in laj Xared, ut xko’o chixpleetinkil rochb’een lix teep aj pleet; ut ke’xk’ul rib’ sa’ xnimaleb’ xjosq’il, ut ke’xk’ul rib’eb’ sa’ li ru taq’a Gilgal; ut kiniman xrahil li pleet chi numtajenaq.

28 Ut kik’ulman naq laj Xared kixpleeti chiru xnumik oxib’ kutan. Ut kik’ulman naq laj Koriantumr kixq’ax ru, ut kixtaaqe toj reetal naq kiwulak sa’ li helhookil ch’och’ Hexlon.

29 Ut kik’ulman naq laj Xared kixpleeti wi’chik chiru li helhookil ch’och’; ut k’ehomaq reetal, kixq’ax ru laj Koriantumr, ut kixsutq’isi wi’chik chirix sa’ li ru taq’a Gilgal.

30 Ut laj Koriantumr kixpleeti wi’chik laj Xared sa’ li ru taq’a Gilgal, sa’ li kixq’ax wi’ ru laj Xared, ut kixkamsi.

31 Ut laj Xared kixtoch’ laj Koriantumr chiru li ra’, jo’kan naq ink’a’ xko’o wi’chik chi pleetik chiru xnumik wiib’ chihab’, ut chiru li chihab’ a’an chixjunileb’ li tenamit chiru chixjunil lix b’een li ch’och’ wankeb’ chi hoyok kik’, ut maajun wan re ramok ruheb’.