ບົດທີ 4
ໂມໂຣໄນຖືກບັນຊາໃຫ້ຜະນຶກການຂຽນຂອງນ້ອງຊາຍຂອງຢາເຣັດໄວ້—ມັນຈະບໍ່ໄດ້ຖືກເປີດເຜີຍຈົນກວ່າມະນຸດຈະມີສັດທາຄືກັນກັບນ້ອງຊາຍຂອງຢາເຣັດ—ພຣະຄຣິດບັນຊາໃຫ້ມະນຸດເຊື່ອຖືໃນຄຳຂອງພຣະອົງ ແລະ ຄຳຂອງສານຸສິດຂອງພຣະອົງ—ມະນຸດຖືກບັນຊາໃຫ້ກັບໃຈ, ເຊື່ອຟັງພຣະກິດຕິຄຸນ, ແລະ ຮັບຄວາມລອດ.
1 ແລະ ພຣະຜູ້ເປັນເຈົ້າໄດ້ບັນຊານ້ອງຊາຍຂອງຢາເຣັດໃຫ້ລົງໄປຈາກພູເຂົາຈາກທີ່ປະທັບຂອງພຣະຜູ້ເປັນເຈົ້າ, ແລະ ໃຫ້ ຂຽນເລື່ອງທີ່ລາວໄດ້ເຫັນໄວ້, ແລະ ເລື່ອງເຫລົ່ານີ້ຖືກຫ້າມບໍ່ໃຫ້ເອົາອອກມາຫາລູກຫລານມະນຸດ ຈົນກວ່າຫລັງຈາກພຣະອົງຈະຖືກຍົກຂຶ້ນເທິງໄມ້ກາງແຂນ; ແລະ ດ້ວຍເຫດນີ້ກະສັດໂມໄຊຢາຈຶ່ງໄດ້ເກັບມັນໄວ້, ເພື່ອມັນຈະບໍ່ໄດ້ອອກມາຫາໂລກນີ້ ຈົນກວ່າຫລັງຈາກພຣະຄຣິດໄດ້ມາປະກົດຕົວຕໍ່ຜູ້ຄົນຂອງພຣະອົງ.
2 ແລະ ຫລັງຈາກພຣະຄຣິດໄດ້ມາປະກົດຕົວຢ່າງແທ້ຈິງຕໍ່ຜູ້ຄົນຂອງພຣະອົງແລ້ວ ພຣະອົງໄດ້ບັນຊາວ່າ ສິ່ງເຫລົ່ານັ້ນຄວນຖືກສະແດງໃຫ້ປະຈັກ.
3 ແລະ ບັດນີ້, ຫລັງຈາກນັ້ນພວກເຂົາທັງໝົດໄດ້ເສື່ອມໂຊມຢູ່ໃນຄວາມບໍ່ເຊື່ອຖື; ແລະ ບໍ່ມີຜູ້ໃດເລີຍນອກຈາກຊາວເລມັນເທົ່ານັ້ນ, ແລະ ພວກເຂົາປະຕິເສດພຣະກິດຕິຄຸນຂອງພຣະຄຣິດ; ສະນັ້ນຂ້າພະເຈົ້າຈຶ່ງໄດ້ຮັບບັນຊາໃຫ້ ເຊື່ອງມັນໄວ້ໃນດິນອີກ.
4 ຈົ່ງເບິ່ງ, ຂ້າພະເຈົ້າໄດ້ຂຽນເລື່ອງຊຶ່ງນ້ອງຊາຍຂອງຢາເຣັດໄດ້ເຫັນນັ້ນໄວ້ໃນແຜ່ນຈາລຶກເຫລົ່ານີ້; ແລະ ບໍ່ເຄີຍມີເລື່ອງໃດທີ່ສະແດງອອກໃຫ້ເປັນເລື່ອງທີ່ຍິ່ງໃຫຍ່ໄປກວ່າເລື່ອງທີ່ສະແດງໃຫ້ປະຈັກແກ່ນ້ອງຊາຍຂອງຢາເຣັດ.
5 ດັ່ງນັ້ນ ພຣະຜູ້ເປັນເຈົ້າຈຶ່ງບັນຊາຂ້າພະເຈົ້າໃຫ້ຂຽນເລື່ອງນີ້ໄວ້; ແລະ ຂ້າພະເຈົ້າກໍໄດ້ຂຽນມັນໄວ້. ແລະ ພຣະອົງໄດ້ບັນຊາໃຫ້ຂ້າພະເຈົ້າ ຜະນຶກມັນໄວ້; ແລະ ພຣະອົງໄດ້ບັນຊາໃຫ້ຂ້າພະເຈົ້າຜະນຶກການແປຂອງມັນໄວ້ນຳອີກ; ດັ່ງນັ້ນ ຂ້າພະເຈົ້າຈຶ່ງໄດ້ຜະນຶກ ສິ່ງແປຄວາມໝາຍໄວ້ຕາມພຣະບັນຊາຂອງພຣະຜູ້ເປັນເຈົ້າ.
6 ເພາະພຣະຜູ້ເປັນເຈົ້າໄດ້ກ່າວກັບຂ້າພະເຈົ້າວ່າ: ເລື່ອງເຫລົ່ານີ້ຈະບໍ່ອອກໄປຫາຄົນຕ່າງຊາດຈົນກວ່າຈະຮອດມື້ທີ່ພວກເຂົາຈະກັບໃຈຈາກຄວາມຊົ່ວຮ້າຍຂອງພວກເຂົາ, ແລະ ກັບມາເປັນຄົນສະອາດຕໍ່ພຣະພັກຂອງພຣະຜູ້ເປັນເຈົ້າ.
7 ແລະ ໃນມື້ນັ້ນ ພວກເຂົາຈະໃຊ້ສັດທາໃນເຮົາ, ພຣະຜູ້ເປັນເຈົ້າໄດ້ກ່າວ, ຄືກັນກັບນ້ອງຊາຍຂອງຢາເຣັດເຮັດໄປນັ້ນ, ເພື່ອພວກເຂົາຈະໄດ້ຮັບ ການຊຳລະໃຫ້ບໍລິສຸດໃນເຮົາ, ເວລານັ້ນເຮົາຈະສະແດງສິ່ງທີ່ນ້ອງຊາຍຂອງຢາເຣັດໄດ້ເຫັນ ໃຫ້ປະຈັກແກ່ພວກເຂົາ, ຈົນກະທັ້ງການເປີດເຜີຍທັງໝົດຂອງເຮົາແກ່ພວກເຂົາ, ພຣະເຢຊູຄຣິດ, ພຣະບຸດຂອງພຣະເຈົ້າ, ພຣະບິດາແຫ່ງຟ້າສະຫວັນ ແລະ ແຜ່ນດິນໂລກລວມທັງທຸກສິ່ງທຸກຢ່າງໃນນັ້ນກ່າວໄວ້.
8 ແລະ ຄົນທີ່ ຂັດຄ້ານພຣະຄຳຂອງພຣະຜູ້ເປັນເຈົ້າກໍຂໍໃຫ້ເຂົາຖືກສາບແຊ່ງ; ແລະ ຄົນທີ່ ປະຕິເສດສິ່ງເຫລົ່ານີ້ກໍຂໍໃຫ້ເຂົາຖືກສາບແຊ່ງ; ເພາະວ່າເຮົາຈະ ບໍ່ສະແດງສິ່ງທີ່ຍິ່ງໃຫຍ່ກວ່ານີ້ແກ່ພວກເຂົາ, ພຣະເຢຊູຄຣິດໄດ້ກ່າວ; ເພາະເຮົາຄືຜູ້ທີ່ກ່າວ.
9 ແລະ ດ້ວຍຄຳບັນຊາຂອງເຮົາ ຟ້າສະຫວັນຈຶ່ງເປີດອອກ ແລະ ປິດ; ແລະ ດ້ວຍຄຳຂອງເຮົາ ແຜ່ນດິນໂລກຈຶ່ງສັ່ນສະເທືອນ; ແລະ ດ້ວຍຄຳບັນຊາຂອງເຮົາ ຜູ້ອາໄສຢູ່ໃນນັ້ນຈຶ່ງຕາຍໄປເຖິງແມ່ນດ້ວຍໄຟເຜົາ.
10 ແລະ ຄົນທີ່ບໍ່ເຊື່ອໃນຄຳຂອງເຮົາຍ່ອມບໍ່ເຊື່ອໃນຄຳຂອງສານຸສິດຂອງເຮົາຄືກັນ; ແລະ ຖ້າຫາກເປັນໄປວ່າເຮົາບໍ່ໄດ້ກ່າວ ກໍໃຫ້ເຈົ້າຕັດສິນເອງ; ເພາະວ່າເຈົ້າຈະຮູ້ຈັກວ່າ ແມ່ນເຮົານີ້ແຫລະຄືຜູ້ກ່າວໃນ ວັນສຸດທ້າຍນັ້ນ.
11 ແຕ່ວ່າຄົນທີ່ ເຊື່ອໃນສິ່ງທີ່ເຮົາໄດ້ກ່າວມານີ້, ເຮົາຈະໄປຢ້ຽມຢາມເຂົາດ້ວຍການສະແດງວິນຍານຂອງເຮົາໃຫ້ປະຈັກ, ແລ້ວເຂົາຈະຮູ້ຈັກ ແລະ ເປັນພະຍານ. ເປັນຍ້ອນວິນຍານຂອງເຮົາ ເຂົາຈຶ່ງຈະ ຮູ້ຈັກສິ່ງເຫລົ່ານີ້ວ່າເປັນ ຄວາມຈິງ; ເພາະວ່າມັນຈະຊັກຊວນໃຫ້ມະນຸດສ້າງຄວາມດີ.
12 ແລະ ສິ່ງໃດກໍຕາມທີ່ຊັກຊວນມະນຸດໃຫ້ສ້າງຄວາມດີນັ້ນມາຈາກເຮົາ; ເພາະວ່າ ຄວາມດີບໍ່ໄດ້ມາຈາກຜູ້ໃດນອກຈາກມາຈາກເຮົາເທົ່ານັ້ນ. ເຮົາຄືຜູ້ດຽວກັນກັບຜູ້ທີ່ນຳພາມະນຸດໄປຫາຄວາມດີທັງໝົດ; ຄົນທີ່ ບໍ່ເຊື່ອໃນຄຳຂອງເຮົາຈະບໍ່ເຊື່ອໃນເຮົາ ວ່າເຮົາຊົງພຣະຊົນຢູ່; ແລະ ຄົນທີ່ບໍ່ເຊື່ອໃນເຮົາກໍຈະບໍ່ເຊື່ອໃນພຣະບິດາຜູ້ສົ່ງເຮົາມາ. ເພາະຈົ່ງເບິ່ງ, ເຮົາຄືພຣະບິດາ, ເຮົາຄື ຄວາມສະຫວ່າງ, ແລະ ຊີວິດ ແລະ ຄວາມຈິງຂອງໂລກ.
13 ຈົ່ງ ມາຫາເຮົາ, ໂອ້ ເຈົ້າຄົນຕ່າງຊາດເອີຍ, ແລະ ເຮົາຈະສະແດງສິ່ງທີ່ຍິ່ງໃຫຍ່ກວ່ານີ້ແກ່ເຈົ້າຄື, ຄວາມຮູ້ທີ່ຖືກເຊື່ອງໄວ້ຍ້ອນວ່າຄວາມບໍ່ເຊື່ອຖື.
14 ຈົ່ງມາຫາເຮົາ, ໂອ້ ເຈົ້າເຊື້ອສາຍອິດສະຣາເອນເອີຍ, ແລະ ສິ່ງທີ່ຍິ່ງໃຫຍ່ຊຶ່ງພຣະບິດາໄດ້ເກັບກຳໄວ້ໃຫ້ເຈົ້ານັບຕັ້ງແຕ່ການວາງຮາກຖານຂອງໂລກ ຈະຖືກ ສະແດງໃຫ້ປະຈັກແກ່ເຈົ້າ, ແລະ ມັນຍັງບໍ່ໄດ້ມາຫາເຈົ້າເທື່ອຍ້ອນວ່າຄວາມບໍ່ເຊື່ອຖື.
15 ຈົ່ງເບິ່ງ, ເວລາເຈົ້າເປີດມ່ານຂອງຄວາມບໍ່ເຊື່ອຖືນັ້ນອອກ ຊຶ່ງເຮັດໃຫ້ເຈົ້າຄົງຢູ່ໃນສະພາບອັນເປັນຕາຢ້ານຂອງຄວາມຊົ່ວຮ້າຍ ແລະ ຄວາມແຂງກະດ້າງຂອງໃຈ, ແລະ ຄວາມມືດມົວຂອງຈິດໃຈ ເວລານັ້ນສິ່ງທີ່ຍິ່ງໃຫຍ່ ແລະ ໜ້າອັດສະຈັນ ຊຶ່ງຖືກ ເຊື່ອງໄວ້ບໍ່ໃຫ້ເຈົ້າເຫັນຕັ້ງແຕ່ການວາງຮາກຖານຂອງໂລກ—ແທ້ຈິງແລ້ວ, ເວລາເຈົ້າເອີ້ນຫາພຣະບິດາໃນນາມຂອງເຮົາດ້ວຍໃຈທີ່ຊອກຊ້ຳ, ແລະ ວິນຍານທີ່ສຳນຶກຜິດ, ເວລານັ້ນເຈົ້າຈະຮູ້ຈັກວ່າ ພຣະບິດາໄດ້ນຶກເຖິງພັນທະສັນຍາຊຶ່ງພຣະອົງເຮັດໄວ້ກັບບັນພະບຸລຸດຂອງເຈົ້າ, ໂອ້ ເຊື້ອສາຍອິດສະຣາເອນ.
16 ແລະ ເວລານັ້ນ ການເປີດເຜີຍຂອງເຮົາຊຶ່ງເຮົາໃຫ້ໂຢຮັນຜູ້ຮັບໃຊ້ຂອງເຮົາຂຽນໄວ້ຈະຖືກເປີດອອກຕໍ່ສາຍຕາຂອງຜູ້ຄົນທັງໝົດ. ຈົ່ງຈື່ຈຳໄວ້ວ່າ ເວລາເຈົ້າຈະເຫັນສິ່ງເຫລົ່ານີ້ແລ້ວ ເຈົ້າຈະຮູ້ຈັກວ່າ ເວລາໃກ້ເຂົ້າມາເຖິງແລ້ວທີ່ມັນຈະຖືກສະແດງໃຫ້ປະຈັກໂດຍຢ່າງແທ້ຈິງ.
17 ສະນັ້ນ, ເວລາເຈົ້າຈະໄດ້ຮັບບັນທຶກນີ້ ເຈົ້າຈະຮູ້ຈັກວ່າ ວຽກງານຂອງພຣະບິດາໄດ້ເລີ່ມຕົ້ນທົ່ວຜືນແຜ່ນດິນແລ້ວ.
18 ສະນັ້ນ, ຈົ່ງ ກັບໃຈ ເຈົ້າທັງຫລາຍທີ່ສຸດຂອງແຜ່ນດິນໂລກ, ແລະ ຈົ່ງມາຫາເຮົາ, ແລະ ເຊື່ອໃນພຣະກິດຕິຄຸນຂອງເຮົາ, ແລະ ຮັບ ບັບຕິສະມາໃນນາມຂອງເຮົາ; ເພາະວ່າຄົນທີ່ເຊື່ອ ແລະ ຮັບບັບຕິສະມາ ຈະລອດ, ແຕ່ຄົນທີ່ບໍ່ເຊື່ອຈະອັບປະໂຫຍດ; ແລະ ເຄື່ອງໝາຍຈະຕິດຕາມຄົນທີ່ເຊື່ອໃນນາມຂອງເຮົາ.
19 ແລະ ຄົນທີ່ຖືກພົບວ່າ ຊື່ສັດຕໍ່ນາມຂອງເຮົາຍ່ອມເປັນສຸກໃນວັນສຸດທ້າຍ, ເພາະວ່າເຂົາຈະຖືກຍົກຂຶ້ນໃຫ້ຢູ່ໃນອານາຈັກ ຊຶ່ງໄດ້ຕຽມໄວ້ແລ້ວໃຫ້ເຂົາ ນັບຕັ້ງແຕ່ການວາງຮາກຖານຂອງໂລກ. ແລະ ຈົ່ງເບິ່ງ ເຮົາຄືຜູ້ທີ່ກ່າວມັນ. ອາແມນ.