1 Anajwan ut laa’in, aj Moroni, kintz’iib’a li aatin li taqlanb’ilin wi’, jo’ chanru naq jultik we; ut kinye eere li k’a’aq re ru kink’e xtz’apb’al; jo’kan ut, meech’e’ re taaruuq teejaltesi ru; xb’aan naq a’an taqlanb’il naq ink’a’ teeb’aanu, ka’ajwi’ wi moqon a’anaq xchaab’ilal xna’leb’ li Dios.

2 Ut k’ehomaq reetal, taaruuq naq taak’eemanq eere naq teek’uteb’ li perel ch’iich’ chiruheb’ li te’tenq’anq chixk’eeb’al chi k’utmank li k’anjel a’in;

3 Ut chiruheb’ oxib’ te’k’utmanq rik’in lix wankil li Dios; jo’kan naq te’xnaw chi ch’olch’o naq yaal li k’a’aq re ru a’in.

4 Ut sa’ xtz’uumaleb’ re oxib’ chi aj yehol nawom taaxaqab’amanq xwankil li k’a’aq re ru a’in, ut li yaal ch’olob’anb’il xb’aan li oxib’, ut li k’anjel a’in, li taak’utmanq wi’ lix wankil li Dios ut jo’kan ajwi’ li raatin, li ch’olob’anb’il xyaalal xb’aan li Yuwa’b’ej, ut li K’ajolb’ej, ut li Santil Musiq’ej—ut chixjunil a’in taawanq chixch’olob’ankil li yaal chirix li ruchich’och’ sa’ roso’jik li kutan.

5 Ut wi taa’uxq naq te’xjal xk’a’uxl ut te’chalq rik’in li Yuwa’b’ej sa’ lix k’ab’a’ li Jesus, te’k’ule’q sa’ li rawa’b’ejihom li Dios.

6 Ut anajwan, wi moko k’eeb’il ta inwankil choq’ re li k’a’aq re ru a’in, tz’ilomaq rix laa’ex; xb’aan naq teenaw naq k’eeb’il inwankil naq tineeril, ut tooxaqliiq chiru li Dios sa’ roso’jik li kutan. Amen.