1 Ma o lenei, o a’u, o Moronae, ou te faasolo pea e tuu atu le talafaamaumau o Iareto ma lona uso.

2 Auā sa oo ina ua uma ona saunia e le Alii maa ia na ave e le uso o Iareto i le mauga, sa alu ifo le uso o Iareto mai le mauga, ma sa ia tuu i totonu o vaa maa ia na saunia, e tasi i o latou pito taitasi; faauta foi, sa latou tuuina atu le malamalama i vaa.

3 Ma sa faapea ona faia e le Alii maa ia susulu atu i le pouliuli, e tuu atu ai le malamalama i tane, fafine, ma tamaiti, ina ia latou lē folau atu i le moana tele i le pogisa.

4 Ma sa oo ina ua uma ona latou saunia o ituaiga o meaai eseese uma, ina ia mafai ona latou ola ai i luga o le vai, ma meaai foi mo a latou lafu ma fagaga, ma soo se meaola po o se manu po o se manu lele sa tatau ona latou ave faatasi ma i latou—ma sa oo ina ua uma ona latou faia o nei mea uma sa latou ulufale i o latou auala po o vaa, ma tuuvaa atu i le sami, ma tuuina atu i latou lava i le Alii lo latou Atua.

5 Ma sa oo ina faia e le Alii le Atua ia i ai se matagi malosi e agi mai i luga o le fogavai, e agai atu i le laueleele na folafolaina; ma sa faapea ona felafoa’iina ai i latou i luga o galu o le sami e muamua atu i le matagi.

6 Ma sa oo ina tele taimi sa tanumia ai i latou i le loloto o le sami, ona o galu mauga sa fati i o latou luga, ma afā tetele foi ma matautia na pogai mai i le malosi tele o le matagi.

7 Ma sa oo ina a o tanumia i latou i le moana sa leai se vai sa afāina ai latou, ona sa maopo lelei o latou vaa e pei o se ipu, ma sa maopo lelei foi i latou e pei o le vaa o Noa; o lea pe a siomia faataamilo i latou i vai e tele sa latou tagi atu i le Alii, ma sa ia toe aumaia i latou i luga o vai.

8 Ma sa oo ina sa le’i pe lava le agi o le matagi agai atu i le laueleele na folafolaina a’o latou i ai i luga o vai; ma sa faapea ona uunaia i latou i luma atu o le matagi.

9 Ma sa latou pepese atu viiga i le Alii; ioe, sa usuina e le uso o Iareto viiga i le Alii, ma sa ia faafetai ma vivii atu i le Alii i le aso atoa; ma ina ua oo mai le po, sa latou le taofia le vivii atu i le Alii.

10 Ma sa faapea ona latou lelea atu i luma; ma sa leai se sauai o le sami sa mafai ona faamalepeina vaa, pe o se tafola e mafai ona faaleagaina i latou; ma sa latou maua pea le malamalama e lē aunoa, pe o luga o le vai po o lalo o le vai.

11 Ma sa faapea ona latou lelea atu i luma, i le tolu selau fasefulu ma le fa aso i luga o le vai.

12 Ma sa latou taunuu i luga o le matafaga o le laueleele na folafolaina. Ma ina ua latou tuvae i luga o le matafaga o le laueleele na folafolaina sa latou punonou ifo i luga o le laueleele, ma faamaualalalo i latou lava i luma o le Alii, ma tutulu i loimata o le olioli i luma o le Alii, ona o le tele o lona alofa mutimutivale agamalu ia te i latou.

13 Ma sa oo ina latou o atu i luga o le laueleele, ma amata ona galuea’iina le eleele.

14 Ma sa i ai ia Iareto ni atalii e toafa; ma sa faaigoa i latou ia Iakoma, ma Kilikā, ma Mi’a, ma Oraea.

15 Ma sa fanaua foi e le uso o Iareto ni atalii ma afafine.

16 Ma o le aofai o uo a Iareto ma lona uso pe tusa ma le luasefulu ma le lua tagata; ma sa latou fanauina foi atalii ma afafine ae latou te le’i o mai i le laueleele na folafolaina; o lea sa amata ona toatele i latou.

17 Ma sa a’oa’oina i latou ia savavali faamaualalalo i luma o le Alii; ma sa a’oa’oina foi i latou mai luga.

18 Ma sa oo ina amata ona latou taapeape i luga o le laueleele, ma uluuluola ma galuea’iina le eleele; ma sa faasolo ina latou malolosi i le laueleele.

19 Ma sa amata ona toeaina le uso o Iareto, ma vaai ua lata ona alu ifo o ia i lalo i le tuugamau; o le mea lea na ia fai atu ai ia Iareto: Ta faapotopoto faatasi lo ta nuu ina ia ta faitauina i latou, ina ia ta iloa mai ia te i latou le mea latou te mananao i ai mai ia i ta’ua ae ta te le’i o ifo i lalo i o ta’ua tuugamau.

20 Ma sa faapea lava ona faapotopoto faatasi o le nuu. O lenei o le aofai o atalii ma afafine o le uso o Iareto e toaluasefulu ma le lua tagata; ma o le aofai o atalii ma afafine o Iareto e toasefulu ma le lua, e toafa ona atalii.

21 Ma sa oo ina la faitauina o la’ua tagata; ma ina ua uma ona la faitauina i latou, sa la’ua mananaomia mai ia te i latou mea latou te mananao ia la faia ae la te lei o ifo i lalo i o la’ua tuugamau.

22 Ma sa oo ina mananao mai le nuu ia te i la’ua ia la faauuina se tasi o o la’ua atalii e avea ma tupu i luga o i latou.

23 Ma o lenei faauta, sa faanoanoa tele i la’ua ona o lenei mea. Ma sa fai atu le uso o Iareto ia te i latou: E moni lava o lenei mea e ta’ita’i atu ai i le faatagataotauaina.

24 Peitai sa fai atu Iareto i lona uso: Tuu atu ia te i latou e fai so latou tupu. Ma o lea na ia fai atu ai ia te i latou: Ia outou filifili mai totonu o o ma’ua atalii, lē ua outou loto i ai.

25 Ma sa oo ina latou filifilia le atalii ulumatua lava o le uso o Iareto, o lona igoa o Pakaka. Ma sa oo ina musu o ia ma sa le’i manao e avea ma o latou tupu. Ma sa mananao le nuu ia faamalosia o ia e lona tamā, ae sa le loto i ai lona tamā; ma sa ia poloaiina i latou e le tatau ona latou faamalosia se tagata e avea ma o latou tupu.

26 Ma sa oo ina latou filifilia uso uma o Pakaka, ma sa latou le mananao i ai.

27 Ma sa oo ina sa le mananao foi i ai atalii o Iareto, i latou uma lava, vagana ai le toatasi; ma sa faauuina Oraea e avea ma tupu i luga o le nuu.

28 Ma sa amata ona nofotupu o ia, ma sa amata ona manuia o le nuu; ma sa oo ina latou mauoa tele lava.

29 Ma sa oo ina maliu Iareto, ma sa faapea foi lona uso.

30 Ma sa oo ina savali Oraea ma le faamaualalo i luma o le Alii, ma sa ia manatua mea sili na faia e le Alii mo lona tamā, ma sa ia a’oa’oina foi lona nuu e uiga i mea sili na faia e le Alii mo o latou tamā.