1 Ma sa oo ina faia e Oraea faamasinoga ma le amiotonu i luga o le laueleele i ona aso uma, o ona aso sa matuā tele lava.

2 Ma sa fanaua e ia atalii ma afafine; ioe, sa ia fanauina le tolu sefulu ma le tasi, sa i ai i totonu o i latou ni atalii e lua sefulu ma le tolu.

3 Ma sa oo ina fanauina foi e ia Kipi i tausaga o lona toeaina. Ma sa oo ina nofotupu Kipi e suitulaga ia te ia; ma sa fanauina e Kipi Kori’oa.

4 Ma ina ua tolusefulu ma le lua tausaga o Kori’oa, sa fouvale o ia i lona tamā, ma sa alu atu o ia ma nofo i le laueleele o Ne’oa; ma sa fanauina e ia atalii ma afafine, ma sa oo ina lalelei lava i latou; o le mea lea na faatosina atu ai e Kori’oa tagata e toatele ia mulimuli atu ia te ia.

5 Ma ina ua uma ona ia faapotopotoina faatasi o se autau, sa alu a’e o ia i le laueleele o Morona lea sa nofo ai le tupu, ma ave o ia faatagataotaua, lea na taunuu ai le upu a le uso o Iareto o le a aumai i latou e faatagataotauaina.

6 O lenei o le laueleele o Morona, lea sa nofo ai le tupu, sa latalata i le laueleele lea sa ta’ua o Tuufua e sa Nifaē.

7 Ma sa oo ina nofo faatagataotaua ia Kipi ma lona nuu, i lalo o le pule a Kori’oa, lona atalii, seia oo ina toeaina lava o ia; ae ui i lea sa fanauina e Kipi ia Sulē i tausaga o lona toeaina lava, a’o faatagataotauaina pea o ia.

8 Ma sa oo ina ita Sulē i lona uso; ma sa faasolo ina malosi Sulē, ma sa oo ina malosi tele e tusa ma le malosi o le tagata matua; ma sa malosi tele foi o ia i le faautauta.

9 O le mea lea, na alu atu ai o ia i le mauga o Efaraima, ma ia faaliusuavaia le oa mai le mauga, ma fai ai pelu mai le sila mo i latou o e na ia tosina ese faatasi ma ia; ma ina ua uma ona ia faaauupegaina o i latou i pelu, sa ia toe foi mai i le aai o Ne’oa, ma tau ma lona uso o Kori’oa, lea na ia maua ai le malo, ma toefuatai atu i lona tamā o Kipi.

10 Ma o lenei ona o le mea na faia e Sulē, sa faaee e lona tamā i luga o ia le malo; o lea na amata ai ona nofotupu o ia e suitulaga i lona tamā.

11 Ma sa oo ina faia e ia faamasinoga i le amiotonu; ma sa ia faalauteleina lona malo i luga o le laueleele, ona ua matuā toatele lava tagata.

12 Ma sa oo ina fanauina foi e Sulē atalii ma afafine e toatele.

13 Ma sa oo ina salamo Kori’oa i le tele o mea leaga na ia faia; o le mea lea na tuu atu ai e Sulē ia te ia se pule i lona malo.

14 Ma sa oo ina i ai ia Kori’oa atalii ma afafine e toatele. Ma sa i ai i totonu o atalii o Kori’oa se tasi na igoa ia Noa.

15 Ma sa oo ina fouvale Noa ia Sulē, le tupu, ma lona tamā foi o Kori’oa, ma ia faatosina ese Ko’oro, lona uso, ma ona uso uma ma le toatele o le nuu.

16 Ma sa tau o ia ma Sulē, le tupu, lea na ia maua ai le laueleele ua fai ma o latou tofi muamua; ma sa avea o ia ma tupu i luga o le vaega lena o le laueleele.

17 Ma sa oo ina toe fetaua’i o ia ma Sulē, le tupu; ma sa ia ave Sulē, le tupu, ma ave faatagataotauaina i Morona.

18 Ma sa oo ina o le a ia fasioti ia te ia, sa tolotolo atu atalii o Sulē i le fale o Noa i le po ma fasioti o ia, ma talepe i lalo le faitotoa o le falepuipui ma aumai i fafo lo latou tamā, ma tuu o ia i luga o lona nofoalii i lona lava malo.

19 O le mea lea, na atia’e ai e le atalii o Noa lona malo e sui ia te ia; ae ui i lea sa latou le toe maua se malosiaga i luga o Sulē le tupu, ma sa oo ina manuia ma faasolo malolosi tagata o ē sa i lalo o le nofoaiga a Sulē le tupu.

20 Ma sa vaeluaina le atunuu; ma sa i ai ni malo se lua, o le malo o Sulē, ma le malo o Ko’oro, le atalii o Noa.

21 Ma sa faatonu e Ko’oro, le atalii o Noa, lona nuu, ia tau ma Sulē, i le taua lea na manumalo ai Sulē ia te i latou ma fasiotia ai Ko’oro.

22 Ma o lenei sa i ai se atalii o Ko’oro na igoa ia Nimarota; ma sa tuu mai e Nimarota le malo o Ko’oro ia Sulē, ma sa fiafia Sulē ia te ia; o le mea lea na faaee ai e Sulē le agalelei tele i ona luga, ma sa ia faia i le malo o Sulē e tusa ma ona manao.

23 Ma o le nofoaiga foi a Sulē na o mai ai perofeta i totonu o le nuu, o ē na auina mai e le Alii, ma vavalo mai o le amioleaga ma le ifo i tupua o tagata ua aumai ai se fetuu i luga o le laueleele, ma o le a faaumatia i latou pe afai latou te lē salamo.

24 Ma sa oo ina faifai tagata e faasaga i perofeta, ma faatauemu ia te i latou. Ma sa oo ina faia e le tupu o Sulē faamasinoga e faasaga ia te i latou o ē na faifai e faasaga i perofeta.

25 Ma sa ia faia se tulafono i le laueleele atoa, lea na tuu atu ai le pule i perofeta latou te o atu ai i soo se mea latou te loto i ai; ma o lenei mea na aumai ai tagata i le salamo.

26 Ma ona sa salamo tagata i a latou amioletonu ma le ifo i tupua o lea na faasaoina ai i latou e le Alii, ma sa amata ona latou toe manuia i le laueleele. Ma sa oo ina fanauina e Sulē atalii ma afafine i tausaga o lona toeaina.

27 Ma sa le toe i ai ni taua i aso o Sulē; ma sa ia manatua mea sili na faia e le Alii mo ona tamā i le aumaia o i latou e folau mai i le moana tele i le laueleele na folafolaina; o le mea lea na ia faia ai faamasinoga i le amiotonu i ona aso uma.