1 Im ālikin men kein eaar keotak Omer, im Omer eaar irooj ilo ijo jikin. Im Omer eaar keotak Jered; im Jered eaar keotak m̧aan ro im kōrā ro.

2 Im Jered eaar jum̧ae jemān, im ilo̧k im jokwe ilo āneen Het. Im ālikin men kein eaar m̧oņe elōn̄ armej, kōnke naan in m̧oņ ko an, m̧ae eaar bōk jimattan in aelōn̄ in kiin̄ eo.

3 Im ke eaar bōk jimattan in aelōn̄ in kiin̄ eo eaar leļo̧k pata n̄an jemān, im eaar bōkļo̧k jemān ilo jipo̧kwe, im eaar kōm̧m̧an bwe en jerbal ilo jipo̧kwe;

4 Im kiiō, ilo raan ko in irooj an Omer eaar pād ilo jipo̧kwe jimattan in raan ko an. Im ālikin men kein eaar keotak m̧aan ro im kōrā ro, ilubwiljier kar Esrom im Koriantumur;

5 Im rekar kanooj illu otem illu kōnke kōm̧m̧an ko an Jered ļeo jeir, jon̄an rekar kajutak juon jarin tariņae im kar kōpata ippān Jered. Im ālikin men kein rekar kōpata ippān ilo bon̄.

6 Im ālikin men kein ke rekar iabon̄e jarin tariņae eo an Jered renan̄in kar itōn iabon̄ e barāinwōt; im eaar akweļap ippāer bwe ren jab m̧ane, im eaar ajeļo̧k aelōn̄ eo n̄an jemān. Im ālikin men kein rekar kōtļo̧k n̄an e an mour.

7 Im kiiō Jered eaar būrom̧ōj otem būrom̧ōj kōnke jako in aelōn̄ eo, bwe eaar likūt būruōn ioon aelōn̄ eo im ioon aiboojoj an laļ.

8 Kiiō lio nejin Jered kōnke eaar tijem̧ļo̧k otem tijem̧ļo̧k, im ke ej lo būrom̧ōj ko an jemān, eaar ļōmņak n̄an ejaake juon karōk eo emaron̄ kar kōjepļaak aelōn̄ eo n̄an jemān.

9 Kiiō lio nejin Jered eaar kanooj deo̧. Im ālikin men kein eaar kōnono ippān jemān, im ba n̄an e: Kōn ta jema e kanooj ļap an būrom̧ōj? Eaar jab kōnono ilo ļo̧o̧k eo ro jemād raar bōktok ilo kijoone m̧wilaļ eļap ke? Lo, ejjeļo̧k ke juon bwebwenato kōn er etto, bwe er jān karōk ittino ko aer rekar bōk aelōn̄ in kiin̄ ko im bun̄bun̄ eļap?

10 Im kiiō, kōn menin, jema en ijilōkļo̧k n̄an Akis, ļeo nejin Kimnōr; im lo, n̄a ideo̧, im inaaj eb im̧aan ļeo, im inaaj kabun̄ būruōn, bwe en kōņaan bwe in pāleen; kōn menin eļan̄n̄e enaaj kōņaan jān eok bwe kwōn leļo̧k n̄an e n̄a bwe in lio pāleen, innām kwōnaaj ba: Inaaj lewōj liin eļan̄n̄e kwōnaaj bōktok n̄an eō bōran jemam̧, kiin̄ eo.

11 Im kiiō Omer eaar eo jeran Akis; kōn menin, ke Jered eaar ijilōkļo̧k n̄an Akis, lio nejin Jered eaar eb im̧aan ļeo bwe en kabun̄ būruōn, jon̄an eaar kōņaan lio bwe en pāleen. Im ālikin men kein ļeo eaar ba n̄an Jered: Kwōn letok liin n̄an eō bwe en pālleō.

12 Im Jered eba n̄an e: Inaaj lewōj liin n̄an eok, eļan̄n̄e kwōnaaj bōktok n̄an eō bōran jemam̧, kiin̄ eo.

13 Im ālikin men kein Akis eaar aintok n̄an m̧weo im̧ōn Jered aolep ro nukwin, im eba n̄an er: Kwōnaaj ke kanejnej n̄an eō bwe kwōnaaj tiljek n̄an eō ilo men in Inaaj kōņaan jān eok?

14 Im ālikin men kein rekar aolep kanejnej n̄an e, jān Anij in lan̄, im barāinwōt jān lan̄ ko, im barāinwōt jān laļ, im jān bōraer, bwe jabdewōt eo enaaj irļo̧k jān jipan̄ eo Akis eaar kōņaan enaaj jako bōran; im jabdewōt eo enaaj kwaļo̧k jabdewōt men Akis eaar kwaļo̧k n̄an er, ejja in wōt enaaj jako mour eo an.

15 Im ālikin men kein āindein rekar errā ippān Akis. Im Akis eaar leļo̧k n̄an er kallim̧ur ko kar leļo̧k n̄an er ro etto ro barāinwōt rekar kappukot maron̄, eo kar le laļļo̧k em̧ool jān Kein, eo eaar riuror jān jinoin.

16 Im er kar oņaake er jān kajoor an devil n̄an liļo̧k kallim̧ur kein n̄an armej ro, n̄an dāpij er ilo marok, n̄an jipan̄ rein rekar kappukot maron̄ n̄an bōk maron̄, im n̄an uror, im n̄an rakim, im n̄an riab, im n̄an kōm̧m̧an aolep wāween otemjeļo̧k in jero̧wiwi im ļōn̄.

17 Im eaar lio nejin Jered eo eaar likūt e ilo būruōn n̄an kūbwij mennin etto kein; im Jered eaar likūt e ilo būruōn Akis; kōn menin, Akis eaar leļo̧k e n̄an ro nukwin im ro jeran, tōlļo̧k er jān kallim̧ur karbōb ko n̄an kōm̧m̧an jabdewōt men eaar kōņaan.

18 Im ālikin men kein raar ejaake juon kumi ittino, em̧ool āinwōt er jān etto; kumi eo e kanooj kajjōjō im nana ioon aolep, ilo im̧aan mejān Anij;

19 Bwe Irooj ej jab jerbal ilo kumi ittino ko, im E jab jiron̄ bwe armej en kōto̧o̧rļo̧k bōtōktōk, a ilo men otemjeļo̧k E ej kōmo̧ik e, jān jinoin armej.

20 Im kiiō n̄a, Moronai, ij jab jeje kōn wāween kallim̧ur ko im kumi ittino ko aer, bwe ekar kwaļo̧k n̄an eō bwe ekar wōr ilubwiljin aolep armej ro, im eaar dedeļo̧k aer pād ilubwiljin riLeman ro.

21 Im rekar kōmour ko̧kkure eo an armej ro im ij kiiō kōnono, im barāinwōt ko̧kkure an armej in Nipai.

22 Im jabdewōt laļ enaaj rejetake kumi ittino ko āinwōt kein, n̄an bōk maron̄ im ļapļo̧k, m̧ae aer naaj ajeeded iaolepān laļ, lo, naaj ko̧kkure er; bwe Irooj E jamin kōtļo̧k bwe bōtōktōkin ro rekwōjarjar, ro naaj kōto̧o̧rļo̧k jān er, naaj iien otemjej kūr n̄an e jān bwidej kōn idenoņe ioer im mekarta E jab ņa wōņāer.

23 Kōn menin, O kom̧ ro riAelōn̄ ko, e ej ļoļātāt ilo Anij bwe men kein ren waļo̧k n̄an kom̧, bwe jāni kom̧in maron̄ ukeļo̧k jān jero̧wiwi ko ami, im jab kōtļo̧k bwe men kumi ittino uror kein renaaj eļļā ioomi, ko kar kalōki n̄an bōk maron̄ im ļapļo̧k—im jerbal eo, aaet, em̧ool jerbal in ko̧kkure ej itok ioomi, aaet, em̧ool jāje in ekajet an Anij Indeeo naaj wōtlo̧k ioomi, n̄an wōtlo̧k im ko̧kkure eo ami eļan̄n̄e kom̧ naaj kōtļo̧k men kein bwe ren waļo̧k.

24 Kōn menin, Irooj ej jiron̄ kom̧, n̄e kom̧ naaj lo men kein rej itok ilubwiljimi bwe kom̧ naaj ruj n̄an juon kile in tam̧m̧we nana eo ami, kōnke kumi ittino in eo enaaj pād ilubwiljimi; a wo n̄an e, kōnke bōtōktōkin ro rekar mej; bwe rej kūr jān bwidej kōn idenoņe ioon e, im barāinwōt ioon ro raar kalōke.

25 Bwe enaaj waļo̧k bwe jabdewōt ej kalōke lōn̄ļo̧k ej kappukot n̄an joļo̧k anemkwōj an aolep āne ko, aelōn̄ ko, im laļ ko; im ej bōktok ko̧kkure an aolep armej, bwe e ej ekkal in devil, eo ej jemān aolep riab otemjeļo̧k; em̧ool ejja ririab eo eaar kapo ro jemād im jined m̧oktata, aaet, em̧ool ejja ririab eo eaar kōm̧m̧an bwe armej en uror jān jinoin; eo eaar kapene būruōn armej bwe ren uror e rikanaan ro, im kade er, im kadiwōjļo̧k er jān jinoin.

26 Kōn menin, n̄a, Moronai, kar jiron̄ eō n̄an jeje men kein bwe naan ej maron̄ jako, im bwe iien eo en maron̄ itok bwe Setan en ejjeļo̧k an maron̄ ioon būruōn ro nejin armej, a bwe ren reel n̄an kōm̧m̧an em̧m̧an wōt, bwe ren maron̄ itok n̄an unin aolep jim̧we im bōk mour.