1 Im kiiō ālikin men kein ilo kajiljilimjuonn̄oul im ruo iiō in iien tōl an riekajet ro bwe aitwerōk ko raar ļapļo̧k, jon̄an eaar wōr tariņae ko iaolepān āneo ilubwiljin aolep armej in Nipai.

2 Im eaar kumi ittino in riko̧o̧t rein ro raar kawōnm̧aanļo̧k wōt jerbal in ko̧kkure im nana in. Im tariņae in eaar jon̄an wōt aolepān iiō eo; im ilo kajiljilimjuonn̄oul im jilu iiō eaar jon̄an wōt barāinwōt.

3 Im ālikin men kein ilo iiō in Nipai eaar kūr n̄an Irooj, im ba:

4 O Irooj, jab kōtļo̧k bwe armej rein ren jorrāān jān jāje eo; a O Irooj, ijello̧kun en wōr juon n̄ūta ilo āneo, n̄an kalim̧otak er ilo ememej Irooj aer Anij, im bōlen renaaj ukeļo̧k im oktakwaj n̄an Eok.

5 Im āindein eaar kōm̧m̧an, ekkar n̄an naan ko an Nipai. Im eaar wōr juon n̄ūta eļap ioon āneo, ilubwiljin aolep armej in Nipai. Im āindein ilo kajiljilimjuonn̄oul im emān iiō eo n̄ūta eo eaar wōnm̧aanļo̧k wōt, im jerbal in ko̧kkure kōn jāje eo eaar bōjrak ak eaar kanooj jorrāān jān n̄ūta.

6 Im jerbal in ko̧kkure in eaar barāinwōt wōnm̧aanļo̧k wōt ilo kajiljilimjuonn̄oul im ļalem iiō eo. Bwe laļ kar ko̧kkure bwe en m̧ōrā, im eaar jab kwaļo̧k grain ilo iien an grain; im aolepān laļ kar ko̧kkure, em̧ool ilubwiljin riLeman ro āinwōt kar ilubwiljin riNipai ro, āindein bwe ren kar jorrāān jon̄an raar jako kōn to̧ujin ko ilo m̧ōttan ko renanaļo̧k in āneo.

7 Im ālikin men kein armej ro raar lo bwe renan̄in kar itōn jako jān n̄ūta, im raar jino keememej Irooj aer Anij; im raar jino keememej naan ko an Nipai.

8 Im armej ro raar jino akweļap ippān riekajet utiej ro im ritōl ro aer, bwe ren ba n̄an Nipai: Lo, kōm jeļā bwe kwe armej in Anij, im kōn menin kūr n̄an Irooj ad Anij bwe En maron̄ ukōtļo̧k jān kōj n̄ūta in, n̄e ab kūrm̧ool aolep naan ko kwaar kōnono kōn ko̧kkure eo am̧.

9 Im ālikin men kein riekajet ro raar ba n̄an Nipai, ekkar n̄an naan ko kar kōņaan. Im ālikin men kein ke Nipai eaar lo bwe armej ro raar ukeļo̧k im kar kōttāik er ilo nuknuk kal, eaar bar kūr n̄an Irooj, im ba:

10 O Irooj, lo armej rein rej ukeļo̧k; im rekar pookļo̧k kumi in Kadiantōn jān ilubwiljin er jon̄an raar erom ļot, im raar ņooj karōk ittino ko aer ilo laļ in.

11 Kiiō, O Irooj, kōnke ettā eo aer Kwōn kajeorļo̧k Am̧ illu, im kōtļo̧k bwe Am̧ illu en med ilo ko̧kkure an armej ro renana ro em̧ōj Am̧ kar ko̧kkure er.

12 O Irooj, Kwōn kajeorļo̧k Am̧ illu, aaet, Am̧ illu ekajoor, im kōm̧m̧an bwe n̄ūta in en maron̄ jem̧ļo̧k ilo āniin.

13 O Irooj, Kwōn eo̧ron̄ eō, im kōm̧m̧an bwe en maron̄ kōm̧m̧an ekkar n̄an aō innaan, im jilkinļo̧k wōt ioon mejān laļ, bwe en maron̄ jebar kōn leen, im kōn an grain ilo iien an grain.

14 O Irooj, kwaar eo̧ron̄ naan ko aō ke iaar ba, En wōr juon n̄ūta, bwe ko̧kkure in jāje eo en jem̧ļo̧k; im i jeļā bwe kwōnaaj, em̧ool ilo iien in, eo̧ron̄ naan ko aō, bwe kwaar ba bwe: Eļan̄n̄e armej rein rej ukeļo̧k Inaaj kōtļo̧k er.

15 Aaet, O Irooj, im Kwōn lo bwe raar ukeļo̧k, kōnke n̄ūta eo im nan̄inmej im ko̧kkure eo eaar itok n̄an er.

16 Im kiiō, O Irooj, Kwōn kajeorļo̧k ke Am̧ illu, im bar kajjion̄ eļan̄n̄e renaaj jerbal Eok? Im eļan̄n̄e āindein, O Irooj, kwo maron̄ kōjeraam̧m̧an er ekkar n̄an naan ko Am̧ ko kwaar kōnono.

17 Im ālikin men kein ilo kajiljilimjuonn̄oul im jiljino iiō eo Irooj eaar kajeorļo̧k An illu jān armej ro, im kōm̧m̧an bwe wōt en wōtlo̧k ioon laļ, jon̄an eaar jebar leen ilo iien an jebar leen. Im ālikin men kein eaar jebar grain ilo iien an jebar grain.

18 Im lo, armej ro raar m̧ōņōņō im wūjtake Anij, im aolepān mejān āneo eaar obrak kōn m̧ōņōņō; im raar jab kappukotļo̧k wōt n̄an ko̧kkure Nipai, a raar watōk e āinwōt juon rikanaan eļap, im juon armej in Anij, eo ewōr an kajoor im maron̄ eļap kar leļo̧k n̄an e jān Anij.

19 Im lo, Liai, ļeo jatin, eaar jab irļo̧k n̄an jidik ilikin āinwōt kōn men ko rej uwaanļo̧k wōt weeppān.

20 Im āindein armej in Nipai raar jino in bar jeraam̧m̧an ilo āneo, im kar jino in jeraam̧m̧an ilo āneo, im kar jino in wōrļo̧k im ajeeded, em̧ool m̧ae aer kar kabwe aolepān mejān āneo, jim̧or ilo tuiōn̄ im ilo turōk, jān lo̧jet irilik n̄an lo̧jet irear.

21 Im ālikin men kein kajiljilimjuonn̄oul im jiljino iiō eo eaar jem̧ļo̧k ilo aenōm̧m̧an. Im kajiljilimjuonn̄oul iiō eo eaar ijjino ilo aenōm̧m̧an; im kabun̄ eo eaar ererakļo̧k ilo mejān aolepān āneo; im elōn̄ļo̧k in m̧ōttan armej ro, jim̧or riNipai ro im riLeman ro, raar pād ilo kabun̄ eo; im eaar wōr aer aenōm̧m̧an otem aenōm̧m̧an eļap ilo āneo, im āindein eaar jem̧ļo̧k jiljilimjuonn̄oul im jiljilimjuon iiō.

22 Im eaar wōr aer aenōm̧m̧an ilo kajiljilimjuonn̄oul im ruwalitōk iiō eo, ijello̧kun wōt jet aitwerōk ko kōn unin katak ko kar kajutak in rikanaan ro.

23 Im ilo kajiljilimjuonn̄oul im ruwatimjuon iiō eo eaar jino wōr eļap akwāālel. A ālikin men kein Nipai im Liai, im elōn̄ iaan ro jeir im jatier ro raar jeļā kōn unin katak ko rem̧ool, kōnke raar bōk elōn̄ revelesōn ko raan otemjej, kōn menin raar kwaļo̧k naan n̄an armej ro, jon̄an raar kōjjem̧ļo̧k e aer akwāālel ilo ejja iiō eo wōt.

24 Im ālikin men kein ilo karuwalitōkn̄oul iiō in iien tōl an riekajet ro ioon armej in Nipai, eaar wōr jet oran ribōrolōklōk ro jān armej in Nipai, ro raar jet iiō im̧aanļo̧k kar ilo̧k n̄an riLeman ro, im kar bōk ioer etan riLeman ro, im barāinwōt jet oraer ro raar lukkuun bwijjin riLeman ro, kōnke kar kalim̧otak er n̄an illu jān er, ak jān ribōrolōklōk ro, kōn menin raar jino juon tariņae ippān ro jeir im jatier.

25 Im raar uror im rakim, innām rekōn jenlikļo̧k ilo toļ ko, im ilo āne jem̧aden im jikin ko rettino, im tilekek make bwe ren jab lo er, im rekōn bōk kobaļo̧k ko n̄an oran ko aer, toun wōt an kar wōr ribōrolōklōk ro raar ilo̧k n̄an ippāer.

26 Im āindein ilo iien, aaet, em̧ool ilo tōrean in jab elōn̄ iiō ko, raar erom juon kumi eļap in riko̧o̧t ro; im raar pukpukoti aolep karōk ko rettino an Kadiantōn; im āindein raar erom riko̧o̧t ro an Kadiantōn.

27 Kiiō lo, riko̧o̧t rein raar kōm̧m̧an eļap kiojaļjaļ, aaet, em̧ool eļap ko̧kkure ilubwiljin armej in Nipai, im barāinwōt ilubwiljin armej in riLeman ro.

28 Im ālikin men kein eaar mennin aikuj bwe en wōr juon bōjrak n̄an jerbal in ko̧kkure in; kōn menin raar jilkinļo̧k juon jarin tariņae in em̧m̧aan ro rekajoor ilo āne jem̧aden im ioon toļ ko n̄an pukpukot kumi in riko̧o̧t ro, im n̄an ko̧kkure er.

29 A lo, ālikin men kein ilo ejja iiō eo wōt raar lukwarkwareļo̧k er em̧ool ilo āne ko āneer make. Im āindein eaar jem̧ļo̧k karuwalitōkn̄oul iiō eo in iien tōl an riekajet ro ioon armej in Nipai.

30 Im ālikin men kein ilo jinoin karuwalitōkn̄oul im juon iiō eo raar bar ilo̧k ņae kumi in riko̧o̧t rein, im kar ko̧kkure elōn̄; im er kar loļo̧k er barāinwōt kōn eļap ko̧kkure.

31 Im kar bar kipel er n̄an ro̧o̧lļo̧k jān āne jem̧aden im jān toļ ko n̄an āne ko āneer make, kōnke bwijlep otem bwijlep in oran ko an riko̧o̧t ro raar kobrak toļ ko im āne jem̧aden.

32 Im ālikin men kein āindein an kar jem̧ļo̧k iiō in. Im riko̧o̧t ro raar lōn̄ļo̧k wōt im kanooj kajoor, jon̄an raar kōjekdoon jarin tariņae ko an riNipai, im barāinwōt ko an riLeman, im raar kōm̧m̧an eļap lōļn̄o̧n̄ n̄an itok n̄an armej ro ioon aolepān mejān āneo.

33 Aaet, bwe raar loļo̧k elōn̄ m̧ōttan ko in āneo, im kar kōm̧m̧an eļap ko̧kkure n̄an er; aaet, raar m̧an elōn̄, im kar bōkļo̧k ro jet rikōm̧akoko ilo āne jem̧aden, aaet, im eļapļo̧k kōrā ro aer im ro nejier.

34 Kiiō naan in eļap, eo eaar itok n̄an armej ro kōnke nana eo aer, eaar bar kalim̧otak er ilo ememej Irooj aer Anij.

35 Im āindein eaar jem̧ļo̧k karuwalitōkn̄oul im juon iiō eo in iien tōl an riekajet ro.

36 Im ilo karuwalitōkn̄oul im ruo iiō eo raar bar jino meļo̧kļo̧k Irooj aer Anij. Im ilo karuwalitōkn̄oul im jilu iiō eo raar jino kanooj kajoor ilo nana. Im ilo karuwalitōkn̄oul im emān iiō eo raar jab ukōt iaļ ko aer.

37 Im ālikin men kein ilo karuwalitōkn̄oul im ļalem iiō eo raar kanooj kajoorļo̧k im kajoorļo̧k ilo aer juwa, im ilo aer jero̧wiwi; im āindein raar bar kaloļo̧k n̄an jorrāān.

38 Im āindein eaar jem̧ļo̧k karuwalitōkn̄oul im ļalem iiō eo.