1 Im kiiō ālikin men kein Samuel, riLeman eo, eaar kanaane elōn̄ļo̧k men ko reļļap ko kar jab maron̄ jeje.

2 Im lo, eaar ba n̄an er: Lo, ij lewōj n̄an kom̧ juon kakōļļe; bwe ļalem iiō rej itok, im lo, innām ej itok eo Nejin Anij n̄an lo̧mo̧o̧ren aolep ro renaaj tōmak ilo Etan.

3 Im lo, men in inaaj lewōj n̄an kom̧ āinwōt juon kakōļļe in iien An itok; bwe lo, enaaj lōn̄ meram ko ilo lan̄, jon̄an ilo bon̄ōn eo m̧okta jān An itok enaaj ejjeļo̧k marok, jon̄an enaaj waļo̧k n̄an armej āinwōt n̄e e raan.

4 Kōn menin, enaaj wōr juon raan im juon bon̄ im juon raan, āinwōt n̄e eaar juon wōt raan im en kar ejjeļo̧k bon̄; im en̄in enaaj n̄an kom̧ juon kakōļļe; bwe kom̧ naaj jeļā kōn tak in aļ im barāinwōt an tulo̧k; kōn menin renaaj kanooj jeļā bwe enaaj wōr ruo raan im juon bon̄; mekarta bon̄ eo enaaj jamin marok; im enaaj bon̄ōn eo m̧okta jān An ļotak.

5 Im lo, enaaj wōr juon iju ekāāl enaaj tak, āinwōt juon eo kom̧ij jan̄in kar lo; im men in barāinwōt enaaj juon kakōļļe n̄an kom̧.

6 Im lo ejjab aolepān in, enaaj lōn̄ kakōļļe ko im kabwilōn̄lōn̄ ko ilo lan̄.

7 Im kom̧ aolep naaj bwilōn̄, im koļmānļo̧kijeņ, jon̄an kom̧ naaj wōtlo̧k n̄an laļ.

8 Im jabdewōt eo enaaj tōmak ilo eo Nejin Anij, ejja in wōt enaaj bōk mour indeeo.

9 Im lo, āindein Irooj eaar jiron̄ eō, jān enjeļ eo An, bwe in itok im ba men in n̄an kom̧; aaet, Eaar jiron̄ eō bwe in kanaan men kein n̄an kom̧; aaet, Eaar ba n̄an eō: Kwōn kūr n̄an armej rein, ukeļo̧k im kōpooj iaļ eo an Irooj.

10 Im kiiō, kōnke n̄aij juon riLeman, im kar kōnono n̄an kom̧ naan ko Irooj eaar jiron̄ eō, im kōnke eaar pen ņae kom̧, kom̧ij illu ippa im kom̧ij kappukot kilen n̄an ko̧kkure eō, im kar kadiwōjļo̧k eō jān ilubwiljimi.

11 Im kom̧ naaj ron̄ naan ko aō, im, bwe kōn un in iaar wanlōn̄tak ioon wōrwōr kein an jikin kwelo̧k in, bwe kom̧in maron̄ ron̄ im jeļā kōn ekajet ko an Anij ko rej kōttar kom̧ kōn nana ko ami, im barāinwōt bwe kom̧in maron̄ jeļā kūr ko an ukeļo̧k.

12 Im barāinwōt bwe kom̧in maron̄ jeļā kōn itok eo an Jisōs Kraist, eo Nejin Anij, Jemān lan̄ im laļ, Rikōm̧anm̧an aolep men ko otemjejļo̧k jān jinoin; im bwe kom̧in maron̄ jeļā kōn kakōļļe ko kōn itok eo An, n̄an un in bwe kom̧in maron̄ tōmak ilo Etan.

13 Im eļan̄n̄e kom̧ naaj tōmak ilo Etan kom̧ naaj ukeļo̧k jān aolep jero̧wiwi ko ami, bwe jān E kom̧in maron̄ bōk juon jeorļo̧kier kōn tōllo̧ke ko An.

14 Im lo, bar juon alen, juon bar kakōļļe ij lewōj n̄an kom̧, aaet, juon kakōļļe in An mej.

15 Bwe lo, em̧ool E eaikuj mej bwe lo̧mo̧o̧r en maron̄ itok; aaet, emennin aikuj n̄an E im emennin aorōk bwe E en mej, n̄an kakūrm̧ool jerkakpeje an ro remej, bwe jān E armej ren maron̄ itok im̧aan mejān Irooj.

16 Aaet, lo, mej in ej bōktok jerkakpeje, im lo̧mo̧o̧ren aolep armej jān mej eo m̧oktata—mej ilo jetōb eo; bwe aolep armej, jān wōtlo̧k eo an Adam kar m̧wijitļo̧k er jān im̧aan mejān Irooj, im watōke er rimej, jim̧or āinwōt ilo men ko an kanniōk im men ko an jetōb.

17 A lo, jerkakpeje eo an Kraist ej lo̧mo̧o̧ren aolep, aaet, em̧ool aolep armej, im bar bōktok er n̄an im̧aan mejān Irooj.

18 Aaet, im ej kakūrm̧ool kūr eo an ukeļo̧k, bwe jabdewōt eo ej ukeļo̧k ejja in wōt jab juokwelaļļo̧k im joļo̧k ilo kijeek eo; a jabdewōt eo ej jab ukeļo̧k juokwelaļļo̧k im joļo̧k ilo kijeek; im ej itok ioer bar juon mej ilo jetōb, aaet, mej eo kein karuo, bwe rej bar m̧wijkōk āinwōt n̄an men ko rej ekkejelļo̧k n̄an weeppān.

19 Kōn menin kom̧in ukeļo̧k, kom̧in ukeļo̧k, n̄e kom̧ij jeļā men kein im jab kōm̧m̧ani kom̧ ab naaj kōtļo̧k kom̧ make n̄an itok ium̧win liaakeļo̧k, im naaj bōklaļļo̧k kom̧ n̄an mej in kein karuo.

20 A lo, āinwōt iaar ba n̄an kom̧ kōn bar juon kakōļļe, juon kakōļļe in mej eo An, lo, ilo raan en bwe Enaaj en̄taan kōn mej aļ enaaj marok im abin kwaļo̧k an meram n̄an kom̧; im barāinwōt allōn̄ im iju ko; im enaaj ejjeļo̧k meram ioon mejān āniin, em̧ool jān iien eo Enaaj mej, n̄an tōrean eo jilu raan, n̄an iien eo Enaaj bar jerkak jān ro remej.

21 Aaet, ilo iien eo Enaaj kōtļo̧k jetōb eo enaaj wōr jourur ko im jarom ko n̄an juon tōrean eo eaetok, im laļ enaaj m̧akūtkūt im wūdiddid; im dekā ko rej ioon mejān laļ in, ko rej jim̧or ilōn̄in laļ im ium̧win laļ, ko kom̧ jeļā ilo iien in reppen, a eļapļo̧k m̧ōttan in ej juon eo en̄ūn̄, naaj tipdikdik;

22 Aaet, renaaj potak ilo ruo, im tokālik naaj loi ilo potak ko ilo kōk ko, im ilo m̧ōttan jidik ko ioon mejān aolepān laļ, aaet, jim̧or ioon laļ im ium̧win.

23 Im lo, enaaj wōr kōto ko reļļap, im enaaj lōn̄ toļ ko naaj kōttāik i, āinwōt n̄an juon kom̧laļ, im enaaj lōn̄ jikin ko kiiō ņa etaer kom̧laļ ko naaj erom toļ ko, ko utiejier enaaj ļap.

24 Im elōn̄ iaļ utiej naaj tipdikdik, im elōn̄ jikin kwelo̧k ko renaaj lo̧urō.

25 Im elōn̄ lōb ko renaaj peļļo̧k, im naaj kōtļo̧k elōn̄ aer rimej; im elōn̄ ro rekwōjarjar naaj waļo̧k n̄an elōn̄.

26 Im lo, āindein enjeļ eo eaar kōnono n̄an eō; bwe eaar ba n̄an eō bwe enaaj wōr jourur ko im jarom ko n̄an tōrean eo eaetok.

27 Im eaar ba n̄an eō bwe ilo iien eo ej jourur im jarom, im kōto eo, bwe men kein renaaj waļo̧k, im bwe marok enaaj kaliboboik mejān aolepān laļ n̄an tōrean eo jilu raan.

28 Im enjeļ eo eaar ba n̄an eō bwe elōn̄ renaaj lo men ko reļļapļo̧k jān kein, n̄an un in bwe ren maron̄ tōmak bwe kakōļļe kein im kabwilōn̄lōn̄ kein renaaj kūrm̧ool ioon aolepān mejān āniin, n̄an un in bwe en wōr unin jab tōmak ilubwiljin ro nejin armej—

29 Im men in n̄an un in bwe jabdewōt eo enaaj tōmak emaron̄ mour, im bwe jabdewōt eo enaaj jab tōmak, juon ekajet ejim̧we en maron̄ itok ioer; im barāinwōt eļan̄n̄e kar liaakeļo̧k er rej bōktok ioer make liaakeļo̧k eo aer.

30 Im kiiō keememej, keememej, ro jeiū im jatū, bwe jabdewōt eo ej jako, ej jako n̄an e make; im jabdewōt eo ej kōm̧m̧an nana, ej kōm̧m̧an n̄an e make; bwe lo, kom̧ij anemkwōj; kom̧ij rōļo̧k n̄an m̧akūtkūt kōn kom̧ make; bwe lo, Anij eaar lewōj n̄an kom̧ juon jeļāļo̧kjeņ im Eaar kaanemkwōj kom̧.

31 Eaar lewōj n̄an kom̧ bwe kom̧in maron̄ jeļā em̧m̧an jān nana, im eaar lewōj n̄an kom̧ bwe kom̧in maron̄ kāālet mour ak mej; im kom̧ maron̄ kōm̧m̧an im bar jepļaak n̄an men eo em̧m̧an, ak kōm̧m̧an bwe men eo em̧m̧an en bar jepļaak n̄an kom̧; ak kom̧ maron̄ kōm̧m̧an nana, im kōm̧m̧an bwe men eo enana en bar jepļaak n̄an kom̧.