1 Ma ua faapea ona mafai ona tatou vaai i le sese, ma le le maumaututu foi o loto o le fanauga a tagata; ioe, ua mafai ona tatou vaai e faamanuia ma faatamaoaiga e le Alii, i lona agalelei silisili e le uma, i latou o e e tuu atu lo latou faalagolago ia te ia.

2 Ioe, ma e mafai ona tatou vaai o le taimi lava e faamanuiaina ai e ia ona tagata, ioe, i le fua tele mai o o latou fanua, o a latou lafu ma a latou fagaga, ma i auro, ma ario, ma mea taua uiga eseese uma o ituaiga ma gaosiga taitasi; i le faasaoina o o latou ola, ma laveai i latou mai lima o o latou fili; i le faamaluluina o loto o o latou fili ina ia latou le sii taua faasaga mai ia te i latou; ioe, ma i se aotelega, i le faia o mea uma mo le manuia ma le fiafia o ona tagata; ioe, o le taimi lena latou te faamaaa ai o latou loto, ma galo ai ia i latou le Alii lo latou Atua, ma soli i lalo o o latou vae le Paia e Toatasi—ioe, ma o le pogai ona o lo latou le popole, ma lo latou tamaoaiga tele.

3 Ma ua faapea ona tatou vaai ai vagana ua aoa’i e le Alii ona tagata i puapuaga e tele, ioe, vagana ai ua asiasi mai o ia ia te i latou i le oti ma le mata’u, ma le oge ma faamai uiga eseese uma, latou te le manatua o ia.

4 E, ua ese lava le valelea, ma ese lava le fiasili, ma ese lava le leaga, ma le faaletiapolo, o le fanauga a tagata, ma ese lava le vave ona latou faia o le amioletonu, ma gese lava ona latou faia o le lelei; ioe, ua ese lava le vave ona faalogo i upu a le ua leaga, ma tuu atu o latou loto i mea lē aoga o le lalolagi.

5 Ioe, ua ese lava le vave ona faafefeteina i le faamaualuga; ioe, ua ese lava le vave ona mitamitavale, ma fai mea uiga eseese uma ua amioletonu; ma ua ese lava ona gese ia te i latou ona manatua o le Alii lo latou Atua, ma uai atu o latou taliga i ana fautuaga, ioe, ua ese lava le gese ona latou savavali i ala o le poto.

6 Faauta, ua latou le mananao i le Alii lo latou Atua, o le na faia i latou, ia pule ma nofotupu ia i latou; e ui lava i lona agalelei tele ma lona alofa mutimutivale ia te i latou, ua latou tuu faameanoa ana fautuaga, ma ua latou le mananao e avea o ia ma o latou taitai.

7 E, ua matua tele lava le meanoa o le fanauga a tagata; ioe, e oo lava i le efuefu o le eleele ua latou maualalalo ifo ai.

8 Aua faauta, o le efuefu o le eleele e fegaoioiai i i ma o, ma ua vaevaeina ai i ni vaega itiiti, i le poloaiga a lo tatou Atua silisili ma tumau e faavavau.

9 Ioe, faauta, o lona siufofoga e gatete ma luluina ai maupuepue ma mauga.

10 Ma o le mana o lona siufofoga e nutililiina ai i latou, ma avea ai ma mea laugatasi, ioe, e pei lava o se vanu.

11 Ioe, e ala i le mana o lona siufofoga e luluina ai le lalolagi atoa;

12 Ioe, o le mana o lona siufofoga e luluina ai faavae, e oo lava i le totonugalemu.

13 Ioe, ma afai e fetalai atu o ia i le lalolagi—Gaoioi—e gaoioi lava.

14 Ioe, afai e fetalai atu o ia i le lalolagi—Ia e toe foi i tua, ina ia faaumiumi ai le aso mo ni itula se tele—e faia lava;

15 Ma ua faapea lava, ona toe foi i tua le lalolagi, e tusa ma lana fetalaiga, ma foliga ai i le tagata ua tumau i le mea e tasi le la; ioe, ma faauta, ua faapea lava; aua e moni o le lalolagi e gaoioi ae le o le la.

16 Ma faauta, afai e fetalai atu foi o ia i vai o le moana loloto—Ia matutu oe, e faia lava.

17 Faauta, afai e fetalai atu o ia i lenei mauga—Ia siitia ae oe i luga, ma oo mai ma faapa’ū ifo i luga o lena aai, ina ia tanumia ai—faauta e faia lava.

18 Ma faauta, afai e nana e se tagata se oa i le eleele, ma o le a fetalai mai le Alii—Ia fetuuina lena oa, ona o le amioletonu a le na ia natia—faauta, o le a fetuuina lava.

19 Ma afai e fetalai mai le Alii—Ia fetuuina oe, ina ia le maua oe e se tagata mai i le taimi nei e oo i le faavavau—faauta, e leai se tagata na te mauaina lena oa mai lena taimi e oo i le faavavau.

20 Ma faauta, afai e fetalai mai le Alii i se tagata—Ona o au amioletonu, o le a fetuuina oe e faavavau—o le a faia lava.

21 Ma afai e fetalai mai le Alii—Ona o au amioletonu o le a vavae ese ai oe mai o’u luma—o le a ia faia ina ia faataunuuina lava.

22 Ma oi talofa ia te ia o lē o le a ia fetalai atu i ai lenei mea, ona o le a oo atu ia te ia o le a faia le amioletonu, ma o le a le mafai ona faaolaina o ia; o lea, ona o lenei mafuaaga, ina ia mafai ona faaolaina o tagata, ua tala’i atu ai le salamo.

23 O lea, amuia lava i latou o ē o le a salamo ma faalogo i le siufofoga o le Alii lo latou Atua; ona o i latou ia o le a faaolaina.

24 Ma ia tuuina mai e le Atua, i lona atoatoa silisili, ina ia mafai ona aumai o tagata i le salamo ma galuega lelei, ina ia mafai ona toefuataiina ia i latou le alofa tunoa mo le alofa tunoa, e tusa ma a latou galuega.

25 Ma ou te manao ia faaolaina tagata uma. Peitai ua tatou faitau e faapea i le aso tele ma le gataaga, e i ai ni isi o le a tutulia i fafo, ioe, o ē o le a tutuli ese mai luma o le Alii;

26 Ioe, o ē o le a tuu i se tulaga o le pagatia e le gata, e faataunuu ai upu ua fai mai: O i latou o ē na faia le lelei, o le a latou maua le ola tumau e faavavau; ma o i latou o ē na faia le leaga o le a latou maua le faasalaga tumau e faavavau. Ma ua faapea lava. Amene.