1 Faauta, o lenei sa oo ina o le tausaga e onosefulu ma le iva o le nofoaiga a faamasino i sa Nifaē, na toe foi mai ai Nifae, le atalii o Helamana, i le laueleele o Sara’emila mai le laueleele i matu.

2 Ona sa alu atu o ia i fafo i totonu o tagata o e sa i le laueleele i matu, ma ia tala’i atu le afioga a le Atua ia te i latou, ma sa ia vavalo atu mea e tele ia te i latou;

3 Ma sa latou teena ana upu uma, sa oo ina le mafai ona nofo o ia i totonu ia te i latou, ae sa toe foi mai o ia i le laueleele na ia fanau mai ai.

4 Ma ina ua vaai atu ua i ai tagata i se tulaga o le amioleaga matautia faapea, ma ua nofoia e ia au faomea a Katianetona nofoa-faamasino—ona sa latou fao faamalosi le mana ma le pule o le laueleele; ma tuu ese poloaiga a le Atua, ma e leai sina mea itiiti na sao ai lea mea i ona luma; ua latou le faia se mea tonu i le fanauga a tagata;

5 Ua latou tausalaina e amiotonu ona o lo latou amiotonu; ua latou tuu e ua sala ma e ua amioleaga e le faasalaina ona o a latou tupe; o lenei foi ina ia latou umia tofiga i le ao o le malo, latou te pule ma fai ai e tusa ma o latou loto, ina ia latou maua le oa ma le mamalu o le lalolagi, ma, o lenei foi, ina ia sili ona faigofie ai ia te i latou ona faia le mulilua, ma gaoi, ma fasioti, ma faia e tusa ma o latou lava loto—

6 O lenei, o lenei amioletonu tele sa oo mai i luga o sa Nifaē, i le va o ni tausaga e le tele naua; ma ina ua vaai atu i ai Nifae, sa tupu a’e i lona loto le faanoanoa i totonu o lona fatafata; ma sa alaga o ia i le tiga o lona agaga:

7 E, maumau pe a na mafai ona ou ola ai i aso na muai alu a’e ai lo’u tamā o Nifae mai le laueleele o Ierusalema, po ua mafai ona ou olioli faatasi ma ia i le laueleele na folafolaina; o aso na sa faigofie ai ona tauanauina ona tagata, ia tutumau e tausi poloaiga a le Atua, ma gese ona taitaiina e fai le amioletonu; ma sa vave ona latou faalogo atu i afioga a le Alii—

8 Ioe, a na mafai e o’u aso ona faapei o ia aso, po ua olioli lo’u agaga i le amiotonu o o’u uso.

9 Ae faauta, ua tofia a’u e faapea o o’u aso nei, ma o le a faatumuina lo’u agaga i le faanoanoa ona o lenei amioleaga a o’u uso.

10 Ma faauta, o lenei sa oo ina faapea o luga o se ’olo lea sa i le faatoaga a Nifae, sa i tafatafa o le alatele lea sa tau atu i le maketi tele sa i le aai o Sara’emila; o lea, sa punou ifo Nifae i luga o le ’olo lea sa i lana faatoaga, o se ’olo lea sa tu latalata foi i le faitotoa o le faatoaga lea sa alu ane ai le alatele.

11 Ma sa oo ina sa i ai ni tagata faapitoa sa ui ane ma vaai atu ia Nifae ao ia tuuina atu atoa lona agaga i le Atua i luga o le ’olo; ma sa latou taufetuli ma ta’u atu i tagata le mea na latou vaaia, ma sa o mai faatasi motu o tagata ina ia latou iloa le pogai o lea faanoanoaga tele mo le amioleaga o le nuu.

12 Ma o lenei, ina ua tulai Nifae sa ia vaai atu i motu o tagata o e ua faapotopoto mai faatasi.

13 Ma sa oo ina tatala e ia lona fofoga ma fai atu ia te i latou: Faauta, aisea ua outou faapotopoto faatasi ai outou lava? Ina ia ou ta’u atu ea ia te outou a outou amioletonu?

14 Ioe, ona ua ou alu ae i luga o lo’u ’olo ina ia mafai ona ou tuuina atu o lo’u agaga i lo’u Atua, ona o le faanoanoa tele o lo’u loto, ona o a outou amioletonu!

15 Ma ona o lo’u faanoanoa ma la’u auega ua outou faapotopoto faatasi ai outou lava, ma outou ofo ai; ioe, ma ua i ai ia te outou se manaomia tele e ofo ai; ioe, e tatau ona outou ofo ona ua outou tuuesea le mea ua uu malosi e le tiapolo i o outou loto.

16 Ioe, pe ua mafai faapefea ea ona outou tuu i faatosinaga a ia o le ua saili e lafo ese o outou agaga i lalo i le pagatia tumau e faavavau ma le malaia e le gata?

17 E, ia outou salamo, ia outou salamo! Aisea ea o le a outou oti ai? Ia outou liliu mai ia, ia outou liliu mai ia i le Alii lo outou Atua. Aisea ea ua ia tuulafoaiina ai outou?

18 Ona ua outou faamaaa o outou loto; ioe, ua outou lē fia faalogo i le siufofoga o le leoleo mamoe lelei; ioe, ua outou faaonoono ia te ia ina ia toatamai e faasaga mai ia te outou.

19 Ma faauta, nai lo le faapotopotoina o outou, vagana ai o le a outou salamo, faauta, o le a ia faasalalauina outou o le a avea ai outou ma meaai mo ulī ma manu aivao.

20 E, pe ua mafai faapefea ona outou faagaloina lo outou Atua i lea lava aso na ia laveaiina ai outou?

21 Ae faauta, ua outou faia lenei mea e maua ai oa, ina ia viia ai outou e tagata, ioe, ma ina ia mafai ona outou maua ai auro ma ario. Ma ua outou pupū o outou loto i luga o oa ma mea lē aoga a lenei lalolagi, ia ua outou fasioti tagata ai, ma vete, ma gaoi, ma molimau pepelo ai e faasaga i o outou tuaoi, ma faia uiga amioletonu eseese uma.

22 Ma o le pogai lenei o le a oo mai ai le malaia ia te outou vagana ai ua outou salamo. Auā afai tou te le salamo, faauta, o le aai tele lenei, ma aai tetele uma foi o faataamilo ai, ia o loo i ai i le laueleele ua tatou umia, o le a aveesea ma o le a outou le maua ai se nofoaga i na aai; aua faauta, o le a le tuuina mai e le Alii ia te outou le malosi, e pei ona ia faia e oo mai i le taimi nei, tou te tetee faasaga atu ai i o outou fili.

23 Auā faauta, ua faapea ona fetalai mai o le Alii: O le a ou le faaali atua lo’u malosi i e amioleaga, ia sili a’e le tasi i lo le isi, vagana ai ia te i latou o e salamo i a latou agasala, ma faalogo mai i a’u upu. O lenei o lea, ou uso e, ou te manao ia outou iloa, o le a sili atu ona lelei mo sa Lamanā nai lo outou vagana ai ua outou salamo.

24 Auā faauta, ua sili atu ona latou amiotonu nai lo outou, ona ua latou le agasala e faasaga i le malamalama tele lea ua outou maua; o lea o le a alofa mutimutivale tele ai le Alii ia te i latou; ioe, o le a ia faalevalevaina o latou aso ma faatoateleina a latou fanau, e oo lava pe a matuā faaumatiaina oe vagana ai ua e salamo.

25 Ioe, oi talofa ia te outou ona o lena mea inosia tele ua oo mai i totonu ia te outou; ma ua outou aufaatasi atu i ai outou lava, ioe, i lena vaega faalilolilo lea na faatuina e Katianetona!

26 Ioe, o le a oo mai le malaia ia te outou ona o lena faamaualuga ua outou tuu e ulu mai i o outou loto, lea ua faafefeteina ai outou i luga ia sili atu i lo le mea ua lelei ona o a outou oa ua silisili ona tele!

27 Ioe, oi talofa ia te outou ona o lo outou amioleaga ma a outou mea inosia!

28 Ma e vagana ai ua outou salamo o le a outou fano; ioe, e oo lava i o outou laueleele o le a aveesea mai ia te outou, ma o le a faaumatia ese outou mai luga o le fogaeleele.

29 Faauta o lenei, ou te le fai atu au lava ia, o le a oo mai nei mea, ona e le o au na ou iloa ai nei mea; ae faauta, ua ou iloa ua moni nei mea, ona o le Alii le Atua na ia faaalia mai nei mea ia te au, o lea ou te molimau atu ai o le a faataunuuina lava.