1 Ut anajwan, ex was wiitz’in raarookex inb’aan, k’ehomaq reetal, ninch’olob’ cheru naq wi ink’a’ nekejal eek’a’uxl, te’kanab’aaq eerochoch chi sachenaq choq’ eere.

2 Relik chi yaal, wi ink’a’ nekejal eek’a’uxl, eb’ lee rixqilal k’a’jo’ naq taawanq rajb’al naq te’yaab’aq sa’ li kutan naq te’tu’resinq; xb’aan naq teeyal eelelik ut maak’a’aq li na’ajej teekol wi’ eerib’; relik chi yaal, ut rahilal sa’ xb’eeneb’ li te’wanq sa’ yu’am, xb’aan naq te’aalo’q ut ink’a’ te’ruuq chi eelelik; jo’kan naq te’yeq’iiq ut te’kanab’aaq chi oso’k.

3 Relik chi yaal, rahilal sa’ xb’een li tenamit a’in, lix tenamit laj Nefi yeeb’il reheb’, wi ink’a’ neke’xjal xk’a’uxl, naq te’ril chixjunil li eetalil ut li sachb’a-ch’oolej li taak’utmanq chiruheb’; xb’aan naq k’ehomaq reetal, eb’ a’an wanjenaqeb’ choq’ jun tenamit sik’b’il ru xb’aan li Qaawa’; relik chi yaal, lix tenamit laj Nefi a’an kixra, ut jo’kan ajwi’ kixq’useb’; relik chi yaal, sa’ xkutankil lix maa’usilaleb’ kixq’useb’ xb’aan naq naxraheb’.

4 A’b’an k’ehomaq reetal, ex was wiitz’in, eb’ laj Lamanita xik’ kiril xb’aan naq ink’a’ us chaq xb’aanuhomeb’ rajlal, ut a’in xb’aan xmaa’usilal li na’leb’ kanab’anb’il chaq xb’aaneb’ lix yuwa’. A’b’an k’ehomaq reetal, chalenaq li kolb’a-ib’ rik’ineb’ a’an xb’aan xjultikahomeb’ laj Nefita; ut choq’ re a’in li Qaawa’ kixnajtob’resi ru lix kutaneb’.

5 Ut nawaj raj naq teek’e reetal naq lix k’ihaleb’ a’an wankeb’ sa’ xb’ehil li k’a’ru teneb’anb’il sa’ xb’eeneb’, ut neke’b’eek chi tiikeb’ xk’a’uxl chiru li Dios, ut k’eek’ookeb’ xch’ool chixpaab’ankil lix taqlahom ut lix k’uub’anb’il aatin ut lix raqb’a-aatin jo’ chanru lix chaq’rab’ laj Moises.

6 Relik chi yaal, ninye eere, naq lix k’ihaleb’ a’an yookeb’ chixb’aanunkil a’in, ut yookeb’ chixyalb’aleb’ xq’e chi ink’a’ neke’lub’, re te’ruuq chixk’amb’al li rela’eb’ li ras riitz’in chixnawb’al li yaal; jo’kan naq wankeb’ naab’al li neke’ok sa’ rajlankileb’ wulaj wulaj.

7 Ut k’ehomaq reetal, laa’ex nekenaw eejunes, xb’aan naq ak eerilom, naq jo’ k’ihal reheb’ neke’k’ame’ chixnawb’al li yaal, ut chixnawb’al chirix li ink’a’ us ut tz’eqb’eetal aj na’leb’ kanab’anb’il chaq xb’aaneb’ lix yuwa’, ut neke’b’eresiik chixpaab’ankileb’ li loq’laj tz’iib’anb’il hu, relik chi yaal, lix profeetil aatineb’ chixjunil li santil profeet, li tz’iib’anb’il, li naxb’eresiheb’ re xpaab’ankil li Qaawa’, ut re li jalb’a-k’a’uxlej, ut a’ paab’aal ut jalb’a-k’a’uxlej a’an naxk’am reheb’ jun xjalajikeb’ li raam—

8 Jo’kan naq jo’ k’ihaleb’ ke’chal sa’ a’in, laa’ex nekenaw eejunes naq ink’a’ neke’eek’an ut xaqxookeb’ junelik sa’ li paab’aal, ut sa’ li k’a’ru ke’ach’ab’aak wi’.

9 Ut nekenaw ajwi’ naq xe’xmuq lix k’anjeleb’aal re pleet, ut neke’xxuwa xxokb’al, maare anchal chan ru naq te’maakob’q; relik chi yaal, naru nekeril naq neke’xxuwa maakob’k—xb’aan naq k’ehomaq reetal, te’xkanab’ rib’ naq te’yeq’e’q ut te’kamsiiq xb’aaneb’ li xik’ neke’ilok reheb’, ut ink’a’ te’xtaqsi xyok’leb’ ch’iich’ chiruheb’, ut a’in xb’aan xpaab’aaleb’ chirix li Kristo.

10 Ut anajwan, rik’in naq xaqxookeb’ junelik naq neke’xpaab’ li k’a’ru paab’anb’il xb’aaneb’, xb’aan naq sa’ xk’ab’a’ lix kawilaleb’ chirix naq kutanob’resinb’ileb’ jun sutaq, k’ehomaq reetal, li Qaawa’ taarosob’tesiheb’ ut tixnajtob’resi ru xkutaneb’, us ta ke’wan xmaa’usilal—

11 Relik chi yaal, us ta maare te’lajq chi maak’a’aqeb’ xpaab’aal, li Qaawa’ tixnajtob’resi ru xkutaneb’, toj reetal naq tixtaw li kutan yeeb’il xb’aaneb’ li qayuwa’, ut xb’aan ajwi’ li profeet aj Tzenos, ut naab’al chik li profeet, chirix naq te’k’ojob’aaq wi’chik li qas qiitz’in, a’eb’ laj Lamanita, re xnawb’al wi’chik li yaal—

12 Relik chi yaal, ninye eere, naq sa’ li roso’jikil kutan lix yeechi’ihom li Qaawa’ wan chi ye’b’il reheb’ li qas qiitz’in, eb’ laj Lamanita; ut us ta wan k’iila ch’a’ajkilal te’xk’ul, us ta te’tiikisiiq chi ka’pak’al chiru lix b’een li ruchich’och’, ut te’yohe’q, ut te’sak’e’q ut te’jek’iiq chi najt, chi maak’a’aqeb’ xna’aj re xkolb’al rib’, li Qaawa’ taaruxtaanaheb’ ru.

13 Ut a’in jo’ chanru li profeetil aatin, naq te’k’ame’q wi’chik rik’in li na’leb’ li tz’aqal yaal, a’an li na’leb’ chirix laj Tojol rixeb’, ut lix nimal ru ut tz’aqal aj ilol reheb’, ut te’k’ehe’q sa’ ajl sa’ xyanqeb’ lix karneer.

14 Jo’kan naq ninye eere, usaq wi’chik choq’ reheb’ a’an cheru laa’ex wi ink’a’ nekejal eek’a’uxl.

15 Xb’aan naq k’ehomaq reetal, wi ta xk’utman chiruheb’ a’an li xninqal ru k’anjel li xk’ute’ cheru laa’ex, relik chi yaal, chiruheb’ li ke’laj chi maak’a’eb’ xpaab’aal xb’aan li na’leb’ kanab’anb’il chaq xb’aaneb’ lix yuwa’, naru nekeril eejunes naq maajun wa raj chik ke’laj chi maak’a’eb’ xpaab’aal.

16 Jo’kan ut, chan li Qaawa’: ink’a’ teb’insach chi junajwa; tink’e b’an naq sa’ li kutan k’oxlanb’il inb’aan te’sutq’iiq wi’chik wik’in, chan li Qaawa’.

17 Ut anajwan k’ehomaq reetal, chan li Qaawa’, chirix lix tenamiteb’ laj Nefita: Wi ink’a’ te’xjal xk’a’uxl ut te’xk’e xch’ool chixb’aanunkil li wajom, laa’in teb’insach chi junajwa, chan li Qaawa’, xb’aan xmaak’a’il lix paab’aaleb’, us ta kinb’aanu k’iila xninqal ru k’anjel sa’ xyanqeb’; ut jo’ chanru naq ch’olch’o ru naq li Qaawa’ yo’yo, taa’uxmanq li k’a’aq re ru a’in, chan li Qaawa’.