1 Ma o lenei, ou uso pele e, faauta, ou te tau atu ia te outou vagana ai ua outou salamo o le a tuua o outou fale ia te outou e tuufua.

2 Ioe, vagana ai ua outou salamo o le a i ai se pogai tele o le a faanoanoa ai o outou fafine i le aso e failelele ai; ona o le a outou taumafai e sosola ma o le a leai se mea tou te sulufai i ai; ioe, ma oi talofa i e e maitaga, ona o le a latou mamafa ma lē mafai ona sosola; o lea, o le a soli i latou i lalo ma o le a tuua ai e fano.

3 Ioe, oi talofa i lenei nuu o e ua ta’ua o le nuu o Nifae pe a latou vaai i nei faailoga uma ma mea ofoofogia vagana ai ua latou salamo; aua faauta, sa avea i latou o ni tagata filifilia o le Alii; ioe, sa alofa o ia i tagata o Nifae, ma sa ia aoaiina foi i latou; ioe, sa ia aoaiina i latou i aso o lo latou amioletonu ona e alofa o ia ia te i latou.

4 Ae faauta, ou uso e, sa inoino o ia ia sa Lamanā ona sa leaga e le aunoa a latou mea sa fai, ma o le pogai o lenei mea ona o le amioletonu o le uputuu a o latou tamā. Ae faauta, ua oo mai le faaolataga ia te i latou ona o le talaiga a sa Nifaē; ma o le faamoemoe lenei na faalevalevaina ai e le Alii o latou aso.

5 Ma ou te manao ina ia outou vaai o le vaega tele o i latou o loo i ai i le ala o lo latou tiute, ma ua latou savavali ma le migao i luma o le Atua, ma ua latou tausisi e tausi ana poloaiga ma ana tulafono ma ana faamasinoga, e tusa ma le tulafono a Mose.

6 Ioe, ou te fai atu ia te outou, o le vaega tele o i latou o loo latou faia lenei mea, ma o loo latou taumafai ma le filiga e le faavaivai ina ia mafai ona latou aumai o e o totoe o o latou uso i le malamalama o le upumoni; o lea e toatele e ua faaopoopo i lo latou aofai i aso taitasi.

7 Ma faauta, ua outou iloa mo outou lava, ona ua outou molimauina, o le toatele o i latou o e ua aumai i le malamalama o le upumoni, ma ia latou iloa le leaga ma le inosia o uputuu a o latou tamā, ma ua taitai atu ia talitonu i tusitusiga paia, ioe, i valoaga a perofeta paia, ia ua tusia, ia ua taitai atu ai i latou i le faatuatua i le Alii, ma i le salamo, le faatuatua ma le salamo lea ua aumai ai se liliuga o le loto ia te i latou—

8 O lea, o le toatele o i latou ua o mai i lenei malamalama o le upumoni, ua outou iloa mo outou lava ua tutumau ma mausali i latou i le faatuatua, ma i mea ia ua faasaolotoina ai i latou.

9 Ma ua outou iloa foi ua latou tanumia a latou auupega o taua, ma ua latou fefefe e fetagofi i ai nei i ai se ala o le a latou agasala ai; ioe, e mafai ona outou vaai ua latou fefefe e agasala—aua faauta o le a latou tuu atu i latou lava ia soli i lalo ma fasioti e o latou fili, ma o le a latou le sii ae a latou pelu e faasaga ia te i latou, ma ua latou faia lenei mea ona o lo latou faatuatua ia Keriso.

10 Ma o lenei, ona o lo latou mausali ina ua latou talitonu i lena mea ua latou talitonu i ai, ona o lo latou tutumau ina ua faamalamalamaina i latou, faauta, o le a faamanuiaina i latou e le Alii ma ia faalevalevaina o latou aso, e ui i lo latou amioletonu—

11 Ioe, e tusa pe o le a faaitiitia i latou i le le talitonu, o le a faalevalevaina e le Alii o latou aso, seia oo ina oo mai le taimi lea na tautatala i ai o tatou tamā, ma le perofeta foi o Senosa, ma le toatele o isi perofeta, e faatatau i le toefuataiga o o tatou uso, o sa Lamanā, i le malamalama o le upumoni—

12 Ioe, ou te fai atu ia te outou, ua faaoo atu i aso e gata ai folafolaga a le Alii i o tatou uso, o sa Lamanā; ma e ui i le tele o puapuaga ia o le a oo ia te i latou, ma e ui ina o le a tutulia i latou i lea mea ma lea mea i luga o le fogaeleele, ma sailia, ma o le a taia ma faataapeape solo, ua leai se mea mo i latou e sulu i ai, o le a alofa mutimutivale le Alii ia te i latou.

13 Ma ua tusa ai lenei mea ma le valoaga, e faapea o le a toe aumai i latou i le malamalama moni, o le malamalama lea o lo latou Togiola, ma lo latou leoleo mamoe sili ma le faamaoni, ma faitauina i totonu o ana mamoe.

14 O lea ou te fai atu ai ia te outou, o le a sili ona lelei mo i latou nai lo outou vagana ai ua outou salamo.

15 Aua faauta, pe a na faaali atu ia te i latou galuega mamana ia ua faaali atu ia te outou, ioe, ia te i latou o e ua faaitiitia i le le talitonu ona o uputuu a o latou tamā, e mafai ona outou vaai mo outou lava po ua le mafai ona toe faaitiitia i latou i le le talitonu.

16 O lea, ua fetalai mai le Alii: O le a ou lē matua faaumatia lava i latou, ae o le a ou faia i le aso e tusa ai ma lo’u poto o le a latou toe foi mai ai ia te au, ua fetalai mai ai le Alii.

17 Ma o lenei faauta, ua fetalai mai le Alii, e faatatau i tagata o sa Nifaē: Afai latou te le salamo, ma tausisi e fai lo’u manao, o le a ou matua faaumatia lava i latou, ua fetalai mai ai le Alii, ona o lo latou le talitonu e ui i le tele o galuega mamana ua ou faia i totonu ia te i latou; ma e pei ona mautinoa o loo soifua le Alii, o le a faataunuuina lava nei mea, ua fetalai mai ai le Alii.