1 Im kiiō, ro jeiū im jatū rejitōnbōro, lo, i kwaļo̧k n̄an kom̧ bwe ijello̧kun wōt n̄e kom̧ naaj ukeļo̧k m̧ōko im̧ōmi naaj likūt n̄an kom̧ jeepepļo̧k.

2 Aaet, ijello̧kun wōt n̄e kom̧ij ukeļo̧k, kōrā ro ami naaj wōr unin aer būrom̧ōj eļap ilo raan eo renaaj kaninnin; bwe kom̧ naaj kajjion̄ in ko im enaaj ejjeļo̧k jikin n̄an koņe; aaet, im wo n̄an er ro rej etta, bwe renaaj eddo im jab maron̄ ko; kōn menin, er naaj jujur er ilaļ im naaj likūt er n̄an mej.

3 Aaet, wo n̄an armej in ro kūr er armej in Nipai ijello̧kun wōt n̄e renaaj ukeļo̧k, n̄e renaaj lo aolep kakōļļe kein im bwilōn̄ ko naaj kwaļo̧k n̄an er; bwe lo, kar kāālet er armej ro an Irooj; aaet, armej in Nipai Eaar iakwe er, im barāinwōt Eaar kauweik er; aaet, ilo raan ko in aer nana Eaar kauweik er kōnke E ej iakwe er.

4 A lo ro jeiū im jatū, riLeman ro Eaar dike er kōnke kōm̧m̧an ko aer raar jab bōjrak aer nana, im men in kōnke nana in imminene ko an ro jemāer. A lo, lo̧mo̧o̧r eaar itok n̄an er kōn kwaļo̧k naan eo an riNipai; im kōn un in Irooj eaar kaetokļo̧k raan ko aer.

5 Im ikōņaan bwe kom̧in lo bwe eļapļo̧k m̧ōttan eo aer rej ilo iaļ in ijo kuņaer, im rej etetal jim̧we im̧aan Anij, im rej lale n̄an kōjparok kien ko An im kakien ko An im ekajet ko An ekkar n̄an kien Moses.

6 Aaet, ij ba n̄an kom̧, bwe eļapļo̧k m̧ōttan eo aer rej kōm̧m̧ane men in, im rej kijejeto kōn tiljek ejjab kijeļo̧k bwe remaron̄ bōktok bwe in ro jeir im jatier n̄an jeļā kōn m̧ool eo; kōn menin elōn̄ ro rej kobaļo̧k n̄an oran ko aer raan n̄an raan.

7 Im lo, kom̧ jeļā kom̧ make, bwe kom̧ ar kam̧ool e, bwe jon̄an wōt an lōn̄ier kar bōktok n̄an jeļā kōn m̧ool eo, im n̄an jeļā imminene ko an ro jemāer renana im kajjōjō, im kar tōlļo̧k er n̄an tōmak jeje ko rekwōjarjar, aaet, kanaan ko an rikanaan ro rekwōjarjar, ko kar jeje, ko rej tōlļo̧k er n̄an tōmak ilo Irooj, im n̄an ukeļo̧k, tōmak im ukeļo̧k eo ej bōktok juon oktak in bōro n̄an er—

8 Kōn menin, jon̄an wōt eo eaar itok n̄an men in, kom̧ jeļā jān kom̧ make rej pen im dim ilo tōmak eo, im ilo men eo jān ekar kaanemkwōj er.

9 Im kom̧ jeļā barāinwōt bwe raar kalbwin kein tariņae ko aer, im rej lōļn̄o̧n̄ n̄an kotak i n̄e raab jān jabdewōt wāween renaaj jero̧wiwi; aaet, kom̧ maron̄ lo bwe rej lōļn̄o̧n̄ n̄an jero̧wiwi—bwe lo rej jamin kōtļo̧k er make bwe ren jujuri er ilaļ im m̧an er jān rikōjdat ro aer, im naaj jab kotak jāje ko aer ņae er, im men in kōnke aer tōmak ilo Kraist.

10 Im kiiō, kōnke dim eo aer n̄e rej tōmak ilo men eo rej tōmak ie, bwe kōnke pen eo aer n̄e kōmeram er, lo, Irooj enaaj kōjeraam̧m̧an er im kaetokļo̧k raan ko aer, mekarta nana eo aer—

11 Aaet, em̧ool eļan̄n̄e ren naaj idakunkunļo̧k ilo jab tōmak Irooj enaaj kaetokļo̧k raan ko aer, m̧ae iien eo enaaj itok eo kar kōnono kake jān ro jemād, im barāinwōt jān rikanaan Zinōs, im elōn̄ bar rikanaan ro jet, kōn bar jepļaaktok eo an ro jeid im jatid, riLeman ro, bar n̄an jeļā kōn m̧ool eo—

12 Aaet, ij ba n̄an kom̧, bwe ilo iien ko āliktata kallim̧ur ko an Irooj kar erļo̧kiļo̧k n̄an ro jeid im jatid, riLeman ro, im mekarta elōn̄ kaen̄tanaan ko renaaj būki, im mekarta n̄e naaj lukwarkwar erļo̧k im tok ioon mejān laļ, im naaj kakiduduik er, im naaj m̧an er im kōjjeplōklōk er ijoko jabdewōt, im ejjeļo̧k aer jikin koņe, Irooj enaaj tūriam̧okake er.

13 Im men in ej ekkar n̄an kanaan eo, bwe naaj bar bōktok er n̄an jeļā em̧ool, eo ej jeļā eo kōn Ripinmuur eo aer, im seperd eo eļap im em̧ool aer, im naaj bōnbōn ilubwiljin sip ko An.

14 Kōn menin ij ba n̄an kom̧, enaaj em̧m̧anļo̧k n̄an er jān n̄an kom̧ ijello̧kun n̄e kom̧ij ukeļo̧k.

15 Bwe lo, n̄e jerbal ko rekajoor naaj kar kwaļo̧k n̄an er ko kar kwaļo̧ki n̄an kom̧, aaet, n̄an er ro raar idakunkunļo̧k ilo jab tōmak kōnke imminene ko an ro jemāer, kom̧ maron̄ lo n̄an kom̧ make bwe ren kar jab bar idakunkunļo̧k ilo jab tōmak.

16 Kōn menin, Irooj ej ba: Inaaj kanooj ko̧kkure er, a Inaaj kōm̧m̧an bwe ilo raan in Aō mālōtlōt renaaj bar ro̧o̧l tok n̄an Eō, Irooj ej ba.

17 Im kiiō lo, Irooj ej ba, kōn armej in riNipai: Eļan̄n̄e rej jamin ukeļo̧k, im lale n̄an kōm̧m̧an Ankilaō, Inaaj kanooj ko̧kkure er, Irooj ej ba, kōnke aer jab tōmak mekarta elōn̄ jerbal ko rekajoor Iaar kōm̧m̧ani ilubwiljier; im āinwōt em̧ool Irooj ej mour men kein renaaj kūrm̧ool, Irooj ej ba.