1 Ma o lenei, sa oo ina sa toatele i latou o e na faalogo i upu a Samuelu, le sa Lamanā, ia na ia tautala atu ai i luga o pa o le aai. Ma o le toatele o i latou o e na talitonu i ana upu sa o atu ma saili mo Nifae; ma ina ua latou o atu ma ua maua o ia sa latou ta’uta’u atu ia te ia a latou agasala ma latou le faafitia, ua mananao ia papatisoina i latou mo le Alii.

2 Ae o le toatele o i latou sa i ai o e sa le talitonu i upu a Samuelu sa feita ia te ia; ma sa latou fetogi atu maa ia te ia i luga o le pa, ma e toatele foi na latou tafana ‘aū ia te ia a o tu o ia i luga o le pa; peitai sa faatasi le Agaga o le Alii ma ia, sa oo ina le mafai ona lavea o ia iā latou maa po o a latou ‘aū.

3 O lenei ina ua latou vaai ua le mafai ona lavea o ia iā i latou, sa i ai ni isi e toatele atu o e sa talitonu i ana upu, sa oo ina latou o atu ia Nifae ina ia papatisoina i latou.

4 Aua faauta, o le taimi lea o papatiso atu Nifae, ma vavalo atu, ma tala’i atu, ma alaga atu le salamo i tagata, ma faaali atu faailoga ma mea ofoofogia, ma faia vavega i totonu o tagata, ina ia latou iloa ai ua lata ona afio mai o Keriso—

5 Ma ta’u atu ia te i latou mea ua lata ona oo mai, ina ia latou iloa ma manatua i le taimi o lo latou oo mai, sa faailoa atu ia te i latou ae lei oo mai, i le faamoemoe ia latou talitonu ai; o lea na o atu ai ia te ia le toatele o i latou o e na talitonu i upu a Samuelu, ina ia papatisoina, ona sa latou o mai ma le salamo ma tautino mai o a latou agasala.

6 Ae o le vaega toatele atu o i latou sa le talitonu i upu a Samuelu; o lea ina ua latou vaai atu ua le mafai ona lavea o ia iā latou maa ma a latou ‘aū, sa latou valaau atu i o latou kapeteni, ua faapea atu: Ave le tagata lenei ma saisai o ia, ona faauta ua ia te ia se tiapolo; ma ona o le mana o le tiapolo lea ua ia te ia ua le mafai ai ona lavea o ia iā matou maa ma a matou ‘aū; o lea ia ave o ia ma saisai o ia, ma aveese atu o ia.

7 Ma ina ua latou o atu e faaoo atu o latou lima ia te ia, faauta, sa oso ifo o ia i lalo mai le pa, ma sola atu i fafo mai lo latou laueleele, ioe, i lona lava atunuu, ma amata ona tala’i ma vavalo atu i totonu o ona lava tagata.

8 Ma faauta, sa le toe faalogoina lava o ia i totonu o tagata sa Nifaē; ma sa faapea mataupu sa i ai i le nuu.

9 Ma sa faapea ona iu o le tausaga e valusefulu ma le ono o le nofoaiga a faamasino i luga o le nuu o Nifae.

10 Ma sa faapea foi ona iu o le tausaga e valusefulu ma le fitu o le nofoaiga a faamasino, o le vaega toatele o tagata sa tutumau pea i lo latou faamaualuluga ma le amioleaga, ma o le vaega toaitiiti sa savavali ma le migao i luma o le Atua.

11 Ma o tulaga foi ia, i le tausaga e valusefulu ma le valu o le nofoaiga a faamasino.

12 Ma sa na’o sina suiga itiiti sa i ai i mataupu o le nuu, vagana ai le amata ona atili maaa o tagata i le amioletonu, ma fai ma saga fai tele o mea sa le talafeagai ma poloaiga a le Atua, i le tausaga e valusefulu ma le iva o le nofoaiga a faamasino.

13 Peitai sa oo i le tausaga e ivasefulu o le nofoaiga a faamasino, sa i ai faailoga tetele ma mea ofoofogia na tuuina mai i tagata; ma sa amata ona faataunuuina upu a perofeta.

14 Ma sa faaali mai agelu i tagata, o tagata popoto, ma sa tala’i mai ia te i latou tala fiafia o le olioli tele; o lea sa faapea ona amata i le tausaga lenei ona faataunuuina o tusitusiga paia.

15 Ae ui i lea, sa amata ona faamaaa e tagata o latou loto, tagata uma ia vagana ai le vaega sa sili ona talitonu o i latou, o sa Nifaē ma sa Lamanā foi, ma amata ona latou faalagolago i lo latou lava malolosi ma lo latou lava popoto, fai mai:

16 Atonu e i ai ni isi mea sa latou mateina sa’o, mai totonu o mea e tele; ae faauta, ua matou iloa e le mafai ona faataunuuina o nei galuega tetele uma ma ofoofogia, ia ua ta’ua.

17 Ma sa amata ona latou talanoa ma fefinauai i totonu ia te i latou lava, fai mai:

18 E lē o se mea ua tonu i le mafaufau le afio mai o se tagata ua faapea o se Keriso; afai e i ai, ma o ia o le Alo o le Atua, le Tamā o le lagi ma le lalolagi, e pei ona ta’ua mai, aisea e le faaali mai ai e ia o ia lava ia te i tatou e faapei foi ia te i latou o ē o le a i ai i Ierusalema?

19 Ioe, aisea o le a ia le faaali mai ai o ia lava i lenei laueleele e faapei foi i le laueleele o Ierusalema?

20 Ae faauta, ua tatou iloa o se uputuu amioleaga lenei, lea na tuutaliga faasolo mai ia te i tatou e o tatou tamā, e tosina ai i tatou ia tatou talitonu i ni mea maoae ma ofoofogia o le a oo mai, ae le i totonu ia te i tatou, ae i se laueleele ua mamao ese lava, o se laueleele ua tatou le iloa; o lea e mafai ai ona latou taofia ai i tatou i le lē malamalama, ona e le mafai ona tatou molimauina i o tatou lava mata ua moni i latou.

21 Ma o le a latou faia ai, e ala i le faitogafiti ma tomai faalilolilo o le ua leaga, se mealilo tele e le mafai ona tatou malamalama i ai, lea o le a tuua ai i tatou i lalo o ni auauna ia latou upu, ma ni auauna foi ia te i latou, ona ua tatou faalagolago ia te i latou e a’oa’o mai ia te i tatou ana afioga; ma o le a faapea ona latou taofia ai i tatou i le lē malamalama pe afai tatou te tuu atu i tatou lava ia te i latou, i aso uma o o tatou olaga.

22 Ma e tele atu isi mea sa mafaufauina e tagata i o latou loto, o mea valea ma lē aoga; ma sa latou fesoua’iina lava, ona sa faaosoina i latou e Satani e fai le amioletonu e le aunoa; ioe, sa ia fealuai ma faasalalau talatua ma finauga i luga o le laueleele atoa, ina ia mafai ona ia faamaaaina loto o tagata e faasaga i mea lelei ma faasaga i mea o le a oo mai.

23 Ma e ui i faailoga ma mea ofoofogia ia na faia i totonu o tagata o le Alii, ma le tele o vavega na latou faia, sa malosi tele le uumau a Satani i loto o tagata i luga o le laueleele atoa.

24 Ma sa faapea ona iu o le tausaga e ivasefulu o le nofoaiga a faamasino i luga o le nuu o Nifae.

25 Ma ua faapea ona iu o le tusi a Helamana, e tusa ma le talafaamaumau a Helamana ma ona atalii.