1 Ma sa oo i le lona fasefulu ma le lua o tausaga o le nofoaiga a faamasino, ina ua uma ona toe faatuina e Moronaea le filemu i le va o sa Nifaē ma sa Lamanā, faauta, sa leai se tasi e nofo i le nofoa-faamasino; o lea na amata ai ona toe i ai o se finauga i totonu o le nuu e uiga i sē e tatau ona nofo i le nofoa-faamasino.

2 Ma sa oo ina o Helamana, o le o le atalii o Helamana, na tofia i le finagalo o le nuu, e nofo i le nofoa-faamasino.

3 Ae faauta, o Kisakumena, o le na fasiotia Paorana, sa lafi faatalitali e faaumatia foi ia Helamana; ma sa lagolagoina o ia e lana vaega, o e na ulu atu i se feagaiga ia leai se tasi ia ona iloa lona amioleaga.

4 Ona sa i ai se tasi e igoa ia Katianetona, o le sa maoae lona tomai i upu e tele, ma faapea foi i lona faiva, o le faia lea o le galuega faalilolilo o le fasioti tagata ma le faomea; o lea na avea ai o ia ma ta’ita’i o le vaega a Kisakumena.

5 O lea na ia olegia ai i latou, ma Kisakumena foi, afai latou te faanofoina o ia i le nofoa-faamasino o le a ia tuu atu ia te i latou o e ua auai i lana vaega e tofia i latou ia iai le mana ma le pule i totonu o le nuu; o lea na saili ai Kisakumena e fasioti Helamana.

6 Ma sa oo ina a’o alu atu o ia agai i le nofoa-faamasino e fasioti Helamana, faauta, o se tasi o auauna a Helamana, sa i fafo i le po, ma sa ia maua, e ala i le ofu faananā, se malamalama e uiga i fuafuaga ia na faia e lenei vaega e fasioti Helamana—

7 Ma sa oo ina fetaiai o ia ma Kisakumena, ma ia tuu atu ia te ia se faailoga; o lea na faailoa mai ai e Kisakumena ia te ia le mea ua manao i ai o ia, e manao na te ta’ita’i atu o ia i le nofoa-faamasino, ina ia mafai ona ia fasiotia Helamana.

8 Ma ina ua iloa e le auauna a Helamana mea uma sa i le loto o Kisakumena, ma o lona faamoemoe o le fasioti tagata lea, ma o le faamoemoe foi lea o i latou uma o e na auai i lana vaega e fasioti tagata, ma faomea, ma maua le pule, (ma o la latou fuafuaga faalilolilo lenei, ma la latou pulepulega), sa fai atu le auauna a Helamana ia Kisakumena: Ta o atu ia i le nofoa-faamasino.

9 O lenei sa fiafia tele Kisakumena i lenei mea, ona sa manatu o ia o le a ia faataunuuina lana fuafuaga; ae faauta, a’o laua o atu i le nofoa-faamasino, sa tui e le auauna a Helamana ia Kisakumena seia tau i le fatu, sa oo ina pa’ū o ia i lalo ua oti e aunoa ma se leo. Ma sa momo’e atu o ia ma ta’u atu ia Helamana mea uma sa ia vaaia, ma faalogo i ai, ma ia faia.

10 Ma sa oo ina auina atu e Helamana ni tagata e tapu’e mai lenei vaega o tagata faomea ma fasioti tagata faalilolilo, ina ia fasiotia i latou e tusa ai ma le tulafono.

11 Ae faauta, ina ua iloa e Katianetona ua le foi mai Kisakumena sa fefe o ia nei faaumatia o ia; o lea na ia faatonu ai lana vaega ia mulimuli atu ia te ia. Ma ua alu la latou solaaga mai le laueleele, i se ala lilo, i totonu o le vao; ma o lea ina ua auina atu e Helamana ni tagata e tapu’e i latou, sa le mafai ona maua i latou i se mea.

12 Ma o le a faamatala atu ni isi mea e uiga i lenei Katianetona i se taimi o mulimuli mai. Ma sa faapea ona faaiuina ai o le lona fasefulu ma le lua o tausaga o le nofoaiga a faamasino i le nuu o Nifae.

13 Ma faauta, i le faaiuga o lenei tusi, o le a outou vaai ai o lenei Katianetona na pogai ai le faatoilaloina, ioe, le toetoe lava o le faafanoga atoa o le nuu o Nifae.

14 Faauta e le o faatatau la’u tala i le iuga o le tusi a Helamana, ae o le uiga o la’u tala o le iuga o le tusi a Nifae, lea na ou aumai ai le tala atoa lea ua ou tusia.