1 Ma o lenei, sa oo i le lona fasefulu ma le tolu o tausaga o le nofoaiga a faamasino, sa leai ni finauga i totonu o le nuu o Nifae vagana ai sina faamaualuga laitiiti sa i ai i totonu o le ekalesia, lea na mafua mai ai ni faatuiesega itiiti i totonu o le nuu, o ni mataupu sa faaleleia i le faaiuga o le lona fasefulu ma le tolu o tausaga.

2 Ma sa leai se finauga i totonu o le nuu i le lona fasefulu ma le fa o tausaga; pe sa i ai foi se finauga tele i le lona fasefulu ma le lima o tausaga.

3 Ma sa oo i le lona fasefulu ma le ono o tausaga, ioe, sa i ai finauga e tele ma faatuiesega e tele; ia na toatele naua ai e na o ese mai le laueleele o Sara’emila, ma o atu i le laueleele i matu e fai mo o latou tofi le laueleele.

4 Ma sa latou malaga atu i se mea mamao tele lava, sa oo ina latou tau atu i vaituloto tetele ma vaitafe e tele.

5 Ioe, sa oo ina latou salalau atu i vaega uma o le laueleele, i soo se vaega sa lei faatafunaina ma aunoa ma laau matua, ona o le toatele o tagata o e sa aina muamua ma fai mo latou tofi le laueleele.

6 Ma o lenei, sa leai se vaega o le laueleele sa faatafunaina, vagana ai laau matua; ae ona o le tele o le faafanoga o tagata o e sa ’ainā muamua le laueleele o lea na ta’ua ai o tafuna.

7 Ma ona sa itiiti laau matua sa i ai i luga o le laueleele, ae ui i lea o tagata o e na o atu i ai sa oo ina atamamai tele i le faaaogaina o le sima; o lea na latou fausia ai fale i le sima, ia na latou nonofo ai.

8 Ma sa oo ina latou uluuluola ma salalau atu, ma o atu mai le laueleele i saute i le laueleele i matu, ma salalau atu sa oo ina amata ona ufitia ia te i latou luga o le fogaeleele atoa, mai le sami i saute i le sami i matu, mai le sami i sisifo i le sami i sasae.

9 Ma o tagata o e sa i le laueleele i matu, sa nonofo i faleie, ma i fale sima, ma sa latou faasao soo se laau e totogo a’e i luga o le laueleele ina ia tupu ae, ina ia latou maua ai i se taimi laupapa e fau ai o latou fale, ioe, o o latou aai, ma o latou malumalu, ma o latou sunako, ma o latou falesa, ma o latou fale o ituaiga eseese uma.

10 Ma sa oo talu ai ona sa tau le maua tele laau matua i le laueleele i matu, o lea sa latou auina atu ai le tele e ala i vaa.

11 Ma sa faapea ona latou faia ia mafai ai e tagata i le laueleele i matu ona latou fausia o aai e tele, i laau ma i le sima.

12 Ma sa oo ina sa i ai le toatele o tagata o le nuu o Amona, o e o ni sa Lamanā i lo latou fananau mai, na o atu foi i lenei laueleele.

13 Ma o lenei e tele talafaamaumau na tausia e uiga i le taualumaga a nei tagata, e le toatele o i latou, ia ua faapitoa ma tele naua, e uiga ia te i latou.

14 Ae faauta, o se tasi vaeselau o taualumaga a nei tagata, ioe, o le tala e uiga ia sa Lamanā ma sa Nifaē, ma a latou taua, ma finauga, ma faatuiesega, ma a latou talaiga, ma a latou valoaga, ma a latou felauaiga i vaa ma lo latou fausiaina o vaa, ma lo latou fausiaina o malumalu, ma sunako ma o latou falesa; ma lo latou amiotonu, ma lo latou amioleaga, ma lo latou fasioti tagata, ma lo latou faomea, ma a latou vetega, ma uiga inosia ma faitaaga eseese uma, e le mafai ona faamauina i lenei galuega.

15 Ae faauta, e tele tusi o i ai ma talafaamaumau e tele o ituaiga eseese, ma sa tausia faapitoa i latou e tagata sa Nifaē.

16 Ma sa tuulima faasolo ifo nei talafaamaumau mai le tasi tupulaga i le isi tupulaga e tagata sa Nifaē, seia oo ina latou pa’u’ū atu i le solitulafono ma sa fasiotia, veteina, ma tuliloaina, ma tutulia, ma fasia, ma faataapeapeina i luga o le fogaeleele, ma fefiloi ma sa Lamanā seia oo ina lē toe ta’ua i latou o ni sa Nifaē, ona ua amioleaga, ma aivao, ma fe’ai, ioe, ua avea ai lava o ni sa Lamanā.

17 Ma o lenei ou te toe foi atu i la’u tala; o lea, o mea na ou fai atu ai ua tuanai atu ina ua mavae lea ona i ai o finauga tetele, ma faalavelave, ma taua, ma faatuiesega, i totonu o le nuu o Nifae.

18 Ua faaiuina le lona fasefulu ma le ono o tausaga o le nofoaiga a faamasino;

19 Ma sa oo ina sa i ai pea finauga tetele i le laueleele, ioe, e oo lava i le lona fasefulu ma le fitu o tausaga, ma le lona fasefulu ma le valu foi o tausaga.

20 Ae ui i lea sa nofo Helamana i le nofoa-faamasino ma le faamasinotonu ma le lē faaitu’au; ioe, sa ia tausisi e tausi tulafono, ma faamasinoga, ma poloaiga a le Atua; ma sa ia faia e le aunoa le mea sa’o i le silafaga a le Atua; ma sa ia savali i ala o lona tamā, sa oo ina manuia o ia i le laueleele.

21 Ma sa oo ina i ai ia te ia ni atalii se toalua. Sa ia tuu atu i le ulumatua le igoa o Nifae, ma i le laitiiti, le igoa o Liae. Ma sa amata ona laua tutupu ae i le Alii.

22 Ma sa oo ina amata ona taofia o taua ma finauga, i se tulaga itiiti, i totonu o tagata sa Nifaē, i le taufaaiuga o le lona fasefulu ma le valu o tausaga o le nofoaiga a faamasino i le nuu o Nifae.

23 Ma sa oo i le lona fasefulu ma le iva o tausaga o le nofoaiga a faamasino, sa faaauau pea ona i ai le filemu sa faatuina i le laueleele, i mea uma, vagana ai pulega faalilolilo ia na faatuina e Katianetona le faomea i vaega sili ona aina o le laueleele, ia sa le iloa i le taimi lena e i latou o e sa faauluulu i le malo; o lea sa le faaumatia ai i latou mai le laueleele.

24 Ma sa oo i lenei lava tausaga sa i ai le manuia tele naua i le ekalesia, sa oo ina i ai le afe ma afe o e na latou auai i latou lava i le ekalesia, ma sa papatisoina i le salamo.

25 Ma sa matuā tele naua le manuia o le ekalesia, ma matuā tele naua faamanuiaga na liligi ifo i luga o tagata, e oo i faitaulaga sili ma a’oa’o sa lē mafuatiaina lo latou ofo tele.

26 Ma sa oo ina manuia lava le galuega a le Alii i le papatisoina ma le faatasia i le ekalesia a le Atua, o agaga e toatele, ioe, e oo lava i le atu sefulu o afe.

27 Ua faapea ona mafai ona tatou vaai ai e alofa mutimutivale le Alii ia te i latou uma o e e valaau atu i lona suafa paia, ma le faamaoni o o latou loto.

28 Ioe, ua faapea ona tatou vaai ai ua tatala le faitotoa o le lagi i tagata uma, ioe ia i latou lava o e e talitonu i le suafa o Iesu Keriso, o ia o le Alo o le Atua.

29 Ioe, ua tatou vaai e mafai e soo se tasi e manao i ai ona taofimau i le afioga a le Atua, lea ua vave ma malosi, lea o le a veteina ai le poto leaga ma mailei ma fuafuaga uma a le tiapolo, ma ta’ita’i atu ai le tagata o Keriso i le ala lauitiiti ma vaapiapi, i luga atu o le vanu pagatia tumau e faavavau lea ua saunia e faaumatia ai e e amioleaga—

30 Ma tuuina atu o latou agaga, ioe, o latou agaga ola pea, i le itu taumatau o le Atua i le malo o le lagi, e nonofo faatasi ma Aperaamo, ma Isaako, ma Iakopo, ma faatasi ma o tatou tamā paia uma, e le toe o atu i fafo.

31 Ma sa i ai i lenei tausaga olioliga faifai pea i le laueleele o Sara’emila, ma nofoaga uma o faataamilo ai, e oo lava i le laueleele atoa lea sa maua e sa Nifaē.

32 Ma sa oo ina i ai le filemu ma le olioli tele naua i le vaega na totoe o le lona fasefulu ma le iva o tausaga; ioe, ma sa i ai foi le filemu ma le olioli tele faifai pea i le lona limasefulu o tausaga o le nofoaiga a faamasino.

33 Ma sa i ai foi le filemu i le lona limasefulu ma le tasi o tausaga o le nofoaiga a faamasino, vagana ai le faamaualuga lea na amata ona ulu mai i totonu o le ekalesia—e le o le ekalesia a le Atua, ae i totonu o loto o tagata o e na fai mai ua latou auai i le ekalesia a le Atua—

34 Ma sa faafefeteina i latou i le faamaualuga, e oo lava i le latou sauaina o le toatele o o latou uso. O lenei o se mea leaga tele lenei mea, lea na mafua ai ona mafatia o le toatele o le vaega sili ona lotomaualalalo o tagata i sauaga tetele, ma latou asa atu ai i puapuaga e tele.

35 Ae ui i lea, sa latou anapopogi ma tatalo pea lava pea, ma sa faasolo malolosi ma faatupulaia ai pea i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga, ioe, seia oo ina faamamāina ma faapaiaina o latou loto, o le faapaiaga lea e oo mai ona o lo latou tuuina atu o o latou loto i le Atua.

36 Ma sa oo ina faaiuina foi le lona limasefulu ma le lua o tausaga i le filemu, vagana ai le faamaualuga tele lea ua ulu i totonu o loto o tagata; ma o le pogai ona o a latou oa ua tele naua ma lo latou manuia i luga o le laueleele; ma sa tupu ae i luga o i latou mai lea aso i lea aso.

37 Ma sa oo i le lona limasefulu ma le tolu tausaga o le nofoaiga a faamasino, ua maliu Helamana, ma sa amata ona nofoia e lona atalii matua o Nifae e suitulaga ia te ia. Ma sa oo ina tauave e ia le nofoa-faamasino ma le faamasinotonu ma le lē faaitu’au; ioe, sa ia tausi poloaiga a le Atua, ma sa savali o ia i ala o lona tamā.