1 Na ɔbaa dɛ atsɛmbuafo hɔn afe a ɔtɔ do eduosia ebien no baa ewiei no nna dɛm ndzɛmba yi nyina esisi, na Lamanfo no mu kɛsenara bɛyɛɛ atseneneefo araa ma hɔn tseneneeyɛ bɛkyɛɛn Nephifo no mpo osiandɛ nna hɔn gyedzi yɛ dzen.

2 Na hwɛ, Nephifo no mu pii bɛyɛɛ asoɔdzenfo, a wonnyi nnuho biara na emumuyɛfo ara yie, dɛm ntsi wɔpoow Nyame n’asɛm nye nkyerɛkyerɛ na nkɔnhyɛ a ɔbaa hɔn mu no.

3 Naaso iyi ekyir nyina, dɔm a wɔwɔ asɔr mu no nyaa enyigye kɛse osian Lamanfo a woenya nsakyer no ntsi, nyew, osian Nyame n’asɔr a wɔakyekyer wɔ hɔn mu no ntsi. Na wɔnye hɔnho dzii nkitaho nkorkor na wonyaa enyigye wɔ hɔn mu nkorkor na wonyaa enyigye mbordo.

4 Na ɔbaa dɛ Lamanfo no hɔn mu pii baa Zarahemla asaase do bɛkãa mbrɛ wɔyɛɛ nyaa nsakyer dze kyerɛɛ Nephifo no, na wɔhyɛɛ hɔn nkuran ama woeenya gyedzi nye nnuho.

5 Nyew, na dodowara dze tum nye tumdzi kɛse kãa nsɛmpa no ma dodowara ara baa ahobrɛadze no bun mu; maa wɔbɛyɛɛ Nyankopɔn nye Eguambaa no hɔn akãdofo ahobrɛadzefo.

6 Na ɔbaa dɛ Lamanfo no mu dodowara kɔr etsifi mantam asaase afamu; na Nephi na Lehi so kɔr etsifi asaase afamu kɛkãa nsɛmpa no kyerɛɛ dɔm no. Na dɛm na afe a ɔtɔ do eduosia ebiasa no dze baa ewiei.

7 Na hwɛ, asomdwee baa asaase nyina do ara yie ma Nephifo kɔr asaase n’afã beebiara a wɔpɛ, wɔ Nephifo anaa Lamanfo hɔn mu.

8 Na ɔbaa dɛ Lamanfo no so kɔr beebiara a wɔpɛ, dɛ wɔ yɛ Lamanfo o anaa Nephifo mu o; na dɛm na ɔmaa wɔnye hɔnho dzii afora dzii gua; wɔtɔ na wɔtɔn, ama woeenya mfaso dɛ mbrɛ ɔsɛ.

9 Na ɔbaa dɛ wɔbɛyɛɛ esikafo mbordo, Lamanfo nye Nephifo nyina; na wonyaa sika pii, nye dwetɛ, na boran a ɔsom bo horow nyina, wɔ anaafo asaase nye etsifi asaase afamu.

10 Afei asaase a ɔwɔ anaafo afamu hɔ no wɔfrɛɛ no Lehi, na asaase a ɔwɔ etsifi afamu no so wɔfrɛɛ no Mulek, wɔdze too Zedekiah ne babanyin; osiandɛ Ewuradze dze Mulek baa asaase a ɔwɔ etsifi no do na ɔdze Lehi so baa asaase a ɔwɔ anaafo no do.

11 Na hwɛ, sika a ogu ahorow pii wɔ dɛm nsaase ebien yi do, nye dwetɛ na abo ahorow pii a ɔsom bo; na mbanyin so a wodzi edwin soronko wɔ hɔ a wɔdze abo dzii edwin ahorow pii na wɔbeer ho fɛɛfɛw; na dɛm na ɔmaa wɔbɛyɛɛ esikafo.

12 Woduaa eburow pii, wɔ etsifi nye anaafo nyina; na wɔyɛɛ prɔmprɔm mbordo, wɔ etsifi nye anaafo asaase nyina do. Na wɔdɔree na hɔn ho yɛɛ dzen wɔ asaase no do. Na wɔnyɛɛn nguankuw, na anantwikuw, nyew, wɔnyɛɛn mbowa pii.

13 Hwɛ hɔn mbaa yɛɛ edwumadzen na wɔtoow yɛɛ atam asorɔtow pii, wɔwen atam a ɔyɛ fɛw ahorow pii, dze kataa hɔn adagyaw do. Na dɛm na afe a ɔtɔ do eduosia anan dze baa ewiei wɔ asomdwee mu.

14 Na afe a ɔtɔ do eduosia enum mu no, wonyaa enyigye na asomdwee, nyew, nsɛmpa ne kã nye nkɔnhyɛ pii a ɔfa dza ɔbɛba nyina ho no kɔr do ara yie. Na dɛm na afe a ɔtɔ do eduosia enum twaa mu kɔree.

15 Na ɔbaa dɛ atsɛmbuafo hɔn afe a ɔtɔ do eduosia esia mu no, hwɛ obi kum Cezoram wɔ atsɛmbu egua no do a woennhu onyia kor no. Na ɔbaa dɛ afe kor noara mu so ne babanyin a dɔm no dze no sii n’ananmu no so wokum no. Na dɛm na afe a ɔtɔ do eduosia esia dze baa ewiei.

16 Na afe a ɔtɔ do eduosia esuon n’ahyɛse no, dɔm no hyɛɛ ase dɛ wɔreyɛ emumuyɛdze mbordo bio.

17 Na hwɛ, osiandɛ nna Ewuradze dze wiadze ahonya hyira hɔn mber pii ntsi ebufuw ennkenyan hɔn mma wɔannkõ, anaadɛ wɔannkã bɔgya enngu; dɛm ntsi, wɔhyɛɛ ase dze hɔn akoma dzii hɔn ahonya ekyir; nyew, wɔhyɛɛ ase peree hwehwɛɛ ahonyadze ama ankorankor eetum amema noho do wɔ binom do; dɛm ntsi wɔhyɛɛ ase dzii nsumaamu ewudzi, na wotwa edwoo na wɔbɔ epoo, ama woeenya ahonyadze.

18 Na afei hwɛ, dɛm ewudzifo nye epoobɔfo fɛkuw yi, Kishkumen nye Gadianton na wɔ tsewee. Na afei ɔbaa dɛ Nephifo no hɔn mu pii kɔdɔɔm Gadianton no kuw no. Na mbom hwɛ, nna wɔdɔɔ sõ wɔ Lamanfo a nna wɔyɛ emumuyɛfo no mu. Na wɔfrɛɛ hɔn Gadianton n’edwotwafo nye n’ewudzifo.

19 Na hɔn na wokum atsɛmbuafo hɔn panyin Cezoram na ne babanyin no wɔ ber a wɔtse atsɛmbu egua no do; na hwɛ, woennhu hɔn.

20 Na afei ɔbaa dɛ aber a Lamanfo no hun dɛ edwotwafo aba hɔn mu no, hɔn werɛ hoow mbordo; na wɔbɔɔ mbɔdzen biara a wobotum dɛ wɔbɛsɛɛ hɔn efi asaase n’enyi do.

21 Mbom hwɛ, Satan nunuu Nephifo dodowara akoma ma wɔdze hɔn ho kɔbɔɔ dɛm edwotwafo yi ho, na wɔnye hɔn bɔɔ mu dzii ahyɛmu na nsew, dɛ wɔbɔbɔ hɔn ho ban na woetwitwa agye ankorankor biara wɔ kwan biara wɔdze hɔn bodua mu no amma woennhu amandze wɔ hɔn ewudzi, nye epoobɔ, na adzewia ho.

22 Na ɔbaa dɛ wonyaa hɔn nsɛnkyerɛdze bi, nyew, hɔn nsumaamu nsɛnkyerɛdze, nye nsumaa mu nsɛm bi; na iyi boae ama woeetum ehu onua a ɔwɔ ahyɛmudzi no mu ama emumuyɛdze biara a onua bi bɛyɛ no aannhaw no nua bi anaa enuanom no a wɔkã hɔn kuw no ho no a, wɔabɛhyɛ dɛm ahyɛmudzi yi mu.

23 Na dɛm no ɔbɛma woetum edzi ewu, na wɔabɔ epoo, na woewia adze, na wɔabɔ ndwamambra, ayɛ emumuyɛdze ahorow pii a ɔnye hɔn man ne mbra nye hɔn Nyankopɔn so ne mbra bɔ ebira.

24 Na wɔhyehyɛɛ dɛ hɔn mu biara a ɔkã hɔn kuw noho na ɔbɛda hɔn emumuyɛdze nye hɔn ebusudze edzi no, nnyɛ hɔn man ne mbra kwan do na wɔbɛfa do nye hɔn edzi, na mbom wɔ hɔnankasa hɔn emumuyɛ mbra kwan do, dɛ mbrɛ Gadianton nnye Kishkumen ahyehyɛ ato hɔ no.

25 Afei hwɛ, dɛm nsumaamu nsewdzi nye ahyɛmudzi yi nna Alma hyɛɛ ne babanyin dɛ ɔnnsɛ dɛ ɔkɔ wiadzefo mu amma wɔannyɛ biribi a ɔdze dɔm no bɛba ɔsɛɛ mu.

26 Afei hwɛ, dɛm nsumaamu nsewdzi nye ahyɛmudzi no mmfir kyerɛwsɛm a wɔdze maa Helaman no mu; mbom hwɛ, onyia noara a ɔdaadaa hɛn awofo a wodzii kan no ma wodzii eduaba a nkyɛ ɔnnsɛ dɛ wodzi no na ɔdze hyɛɛ Gadianton n’akoma mu—

27 Nyew, onyia noara so nye Cain hyehyɛɛ dɛ sɛ oku no nuabanyin Abel a wiadzefo runnhu no no. Na ɔnye Cain nye n’akãdofo hyehyɛe fitsi dɛm aber no dze ba.

28 Na onyia noara so na ɔdze hyɛɛ dɔm no akoma mu dɛ wonsi abantsentsen ma ɔnkɔ sor ara yie ama woeetum akɔ sor. Na onyia noara na odzii dɔm no ne kan dze hɔn fii abantsentsen no ho baa asaase yi do; ɔno na ɔdze sum mu ndwuma nye ebusudze kataa asaase nyina enyido kesi dɛ ɔbɔtwe nyimpa nyina akɔ ɔsɛɛ mu, na ɔnye hɔn akɔ hɛl a ɔwɔ hɔ daapem no mu.

29 Nyew, onyia yi ara so na ɔdze bɔn ahyɛ Gadianton n’akoma mu ma ɔrokɔ do yɛ sum mu ndwuma, nye nsumaamu ewudzi; na ɔdaa no edzi fi ɔdasanyi n’ahyɛse dze besi dɛm aber yi mu mpo.

30 Na hwɛ, ɔno nye bɔn nyina ne farbaa. Na hwɛ, ɔno na ɔyɛ sum mu ndwuma nye nsumaamu ewudzi, na ɔdze hɔn nhyehyɛɛ, nye hɔn nsewdzi, na ahyɛmudzi na hɔn emumuyɛdze ho nsusui a ɔyɛ hu brɛ hɔn, fi ebusuasantsen kesi ebusuasantsen dɛ mbrɛ obotum esuo adasamba hɔn akoma mu.

31 Na afei hwɛ, ne nsa esuo Nephifo hɔn akoma mu yie; nyew, ma wɔabɛyɛ emumuyɛfo mbordo; nyew, hɔn mu dodowara adan efi tsenenee kwan no ho, na woetsiatsia Nyankopɔn ne mbrasɛm do, na wɔadan afa hɔnankasa hɔn akwan do, na wɔdze hɔn sika na dwetɛ ayeyɛ abosom ama hɔnho.

32 Na ɔbaa dɛ dɛm emumuyɛ yi nyina baa hɔn do mfe kakraabi ntamu, na ne kɛse baa hɔn do wɔ afe a ɔtɔ do eduosia esuon no mu, wɔ aber a nna atsɛmbuafo no hwɛ Nephi no nkorɔfo no do no.

33 Na wonyinii wɔ hɔn emumuyɛ mu wɔ afe a ɔtɔ do eduosia awɔtwe so mu, na ɔmaa awerɛhow kɛse kãa atseneneefo no na wotwaa kwadwom.

34 Na dɛm na yehu dɛ Nephifo no hyɛɛ ase dɛ wɔrowodow wɔ gyedzi mu, na wonyinii wɔ emumuyɛdze nye ebusudze ne yɛ mu, wɔ aber a nna Lamanfo no hyɛɛ ase nyiin mbordo wɔ hɔn Nyankopɔn ho nyimdzee mu; nyew, wɔhyɛɛ ase dzii n’ahyɛdze nye ne mbrasɛm do, na wɔnantseew nokwar nye tseneneeyɛ mu wɔ n’enyim.

35 Na dɛm na yehu dɛ Ewuradze no Sunsum hyɛɛ ase twee no ho fii Nephifo nkyɛn, osian hɔn emumuyɛdze nye hɔn akomadzen ntsi.

36 Na dɛm na yehu dɛ Ewuradze hyɛɛ ase huee no Sunsum guu Lamanfo no do, osiandɛ nna wɔayɛ krado na woenya pɛ dɛ wɔbɛgye ne nsɛm edzi.

37 Na ɔbaa dɛ Lamanfo no hwehwɛɛ Gadianton n’edwotwafo kuw no; na wɔkãa Nyame n’asɛm no wɔ hɔn a wɔyɛ emumuyɛfo kɛse no mu araa ma dɛm edwotwafo kuw no wɔsɛɛ hɔn koraa wɔ Lamanfo no mu.

38 Na ɔbaa dɛ Nephifo no mbom gyinae na wɔboaa hɔn, wɔhyɛɛ ase wɔ hɔn a wɔyɛ emumuyɛfo kɛse no mu kesii dɛ wɔpetsee Nephifo hɔn nsaase nyina do, na wɔdaadaa atseneneefo no mu dodowara ma wɔgyee hɔn ndwuma no dzii na wɔnye hɔn kyɛɛ hɔn asadze, na wɔkɛkãa hɔnho wɔ hɔn nsumaamu ewudzi nye mfɛkuw.

39 Na dɛm a wɔyɛe no maa hɔn nsa kãa tum wɔ amambu mu ma wɔnam do tsiatsiaa hɔn do na wɔhwee hɔn na wɔkekaa mu guu hɔn do na wɔdaan hɔn ekyir maa ehiafo na hɔn a wɔdwe na Nyankopɔn n’akãdofo ahobrɛadzefo.

40 Dɛm ntsi yehu dɛ wɔwɔ tsebew a ɔyɛ hu mu, na worinyin ma daapem ɔsɛɛ.

41 Na ɔbaa dɛ dɛm na afe a ɔtɔ do eduosia awɔtwe dze baa ewiei wɔ atsɛmbuafo no mber a wɔdze hwɛɛ Nephi no nkorɔfo do no.