Aman, ebusuafo, kasa horow na nyimpa nyinara a dɛm nsɛm yi bɛba hɔn hɔ no nhu dɛ: Yɛnam Nyame Egya na hɛn Ewuradze Jesus Christ adom do ehu dɛm mprɛtse a kyerɛwsɛm yi wɔan do no. Kyerɛwsɛm a ɔfa Nephi no nkorɔfo, na Lamanfo so a wɔyɛ hɔn nuanom, na Jared no nkorɔfo so a wofii abantsentsen no do sianee a wɔakã ho asɛm no. Na yenyim so dɛ wɔnam Nyankopɔn n’akyɛdze na no tum do kyerɛɛ ase, osiandɛ ne ndze na ɔada no edzi akyerɛ hɛn, dɛm ntsi yenyim pefee dɛ dɛm nsɛm yi yɛ nokwar. Na hɛn so yɛgye ho dase dɛ yehun nkrukye no a ɔwɔ mprɛtse no do no; na wɔnam Nyankopɔn no tum do yii kyerɛɛ hɛn, na nnyɛ nyimpa no tum do bi. Na yɛkã no wɔ botooyɛ mu dɛ Nyame no sor bɔfo fi sor sianee dze boguu hɛn enyim, na yɛhwɛe na yehun mprɛtse no na nkrukye a ɔwɔ do no; na yenyim dɛ ɔnam Nyame Egya, na hɛn Ewuradze Jesus Christ, adom do na yehunii na yɛgye dase dɛ dɛm ndzɛmba yi yɛ nokwar. Na ɔyɛ nwanwa wɔ hɛn enyi do. Naaso Ewuradze ne ndze hyɛɛ hɛn dɛ yɛngye ho dase, dɛm ntsi ama yɛayɛ setsie ama Nyankopɔn ne mbrasɛm no, yɛgye dɛm ndzɛmba yi ho dase. Na yenyim dɛ sɛ yedzi nokwar wɔ Christ mu a, yebeyi hɛn ntar efi adasamba nyinara hɔn bɔgyaa mu, na woennhu nkekaaba wɔ hɛnho wɔ Christ n’atsɛmbu egua no enyim, na yɛnye no atsena ase onnyiewiei mu wɔ sor. Na enyimnyam nkã Nyame Egya, nye Ɔba, nye Sunsum Krɔnkrɔn no a ɔyɛ Nyame kor no. Amen.