1 Na afei ɔbaa dɛ Ammon nye ɔhen Limhi hyɛɛ ase bisabisaa dɔm no kwan a wobotum edua do agye hɔnho efi nkowaasom mu; na wɔmaa dɔm no nyinara poon hɔn ho hyiaa mu; na wɔyɛɛ dɛm ama hɔn nyinara woeetum akyerɛ hɔn adwen wɔ asɛm no ho.

2 Na ɔbaa dɛ woennhu kwan biara a wɔbɛfa do agye hɔnho efi nkowaasom mu, gyedɛ wɔfa hɔn mbasiafo nye mbofra no, nna hɔn nguankuw, nye anantwikuw, nye hɔn ntamadan, na woguan kɔ sar no do, osiandɛ Lamanfo no dɔɔ sõ ntsi ɔyɛ dzen dɛ Limhi ne dɔm no botum nye hɔn akõ na wɔagye hɔn ho efi nkowaasom mu.

3 Afei ɔbaa no dɛ Gideon kɔree kegyinaa ɔhen no n’enyim, na ɔsee no dɛ: O ɔhen, mpɛn pii na etsie me nsɛm ber a yɛnye hɛn enuanom Lamanfo nyaa akasakasa no.

4 Na afei, O ɔhen sɛ innhun dɛ meyɛ akowaa a mfaso nnyi no ho, anaa sɛ etsie me nsɛm kakra ara yie ma ɔayɛ mboa ama wo dze a, nna mebɛpɛ dɛ ibetsie me nsɛm dɛm aber yi so, na mebɛyɛ wo akowaa na magye nkorɔfo yi efi nkowaasom mu.

5 Na ɔhen no maa no kwan dɛ ɔnkasa. Nna Gideon see no dɛ:

6 Hwɛ kwan a ɔda ban no ekyir wɔ kurow n’ekyir afamu hɔ no. Lamanfo, anaa Lamanfo aweɔmfo, nom nsa bow anadwe biara; dɛm ntsi ma yɛnsoma ma wɔnkɔ nkɛse hɔn dɛ wɔmboaboa hɔn nguankuw na anantwikuw ano, ama wɔaaka hɔn akɔ sar no do anadwe.

7 Na dɛ mbrɛ wo mbra tse no, mobɔkɔ ekotua wenyin tow a odzi ewiei ama Lamanfo no, na wɔaabobɔw na ber a wɔabobow na wɔadeda no, yebodua nsumaamu kwan no a ɔda asaase no n’abankum afamu hɔ no akɔ.

8 Dɛm na yebotum nye hɛn mbasiafo na hɛn mba nye hɛn nguankuw na anantwikuw akɔ sar no do; na yɛbɛfa Shilom asaase ho akɔ.

9 Na ɔbaa dɛ ɔhen no tsiee Gideon ne nsɛm no.

10 Na ɔhen Limhi hyɛɛ mbra dɛ no nkorɔfo no mboaboa hɔn nguankuw ano; na wonkotua wenyin tow no mma Lamanfo no; na ɔsomaa so ma wɔdze wenyin pii kɛkyɛɛ hɔn; na wɔnoom wenyin a ɔhen Limhi dze kɛmaa hɔn no ara yie.

11 Na ɔbaa dɛ ɔhen Limhi no nkorɔfo no fii hɔ anadwe no kɔr sar no do, wɔdze hɔn nguankuw nye hɔn anantwikuw, na woduaa Shilom asaase nkyɛn wɔ sar no do, na wɔfaa Zarahemla asaase do kwan, Ammon nye no nuanom na wodzii hɔn enyim.

12 Na wɔfaa hɔn sika, na dwetɛ, nye hɔn ndzɛmba a ɔsom bo nyinara a wobotum asoa, nye hɔn edziban so dze sii mu tuu hɔn kwan kɔr sar no do.

13 Na wodzii nda pii wɔ sar no do ekyir no, wodur Zarahemla asaase do, na wɔkɛkãa Mosiah no nkorɔfo no ho na wɔbɛyɛɛ nedze.

14 Na ɔbaa dɛ Mosiah dze enyigye gyee hɔn; na ɔgyee hɔn nkyerɛwee no so, nye nkyerɛwee no so a Limhi no nkorɔfo no hunii no.

15 Na afei ɔbaa dɛ ber a Lamanfo no hun dɛ Limhi no nkorɔfo no eguan efi asaase no do anadwe no, wotuu nsordaafo dɛ wontsiw hɔn wɔ sar no do;

16 Na wotsiiw hɔn bɛyɛ nda ebien na woennhu bea a wɔfae; dɛm ntsi wɔyewee wɔ sar no do.