1 Na afei, ɔhen Benjamin nye nkorɔfo no kasaa wiei no, ɔdwen ho dɛ ohia dɛ ɔkyerɛw hɔn a wɔnye Nyankopɔn edzi ahyɛmu dɛ wobedzi ne mbrasɛm do no edzin.

2 Na ɔbaa dɛ ɔkra kor mpo nnyi hɔ kã mbofra nkakraba ho, na mbom obiara ahɛn ahyɛmudzi mu na wɔafa Christ ne dzin ato hɔn do.

3 Na bio, ɔbaa dɛ aber a ɔhen Benjamin dze ndzɛmba yi nyinara baa ewiei no, ɔtseew ne babanyin Mosiah ho ama ɔaabɛyɛ ɔhwɛfo na ɔhen wɔ no nkorɔfo no do, na ɔdze nhyehyɛɛ nyinara a ɔfa ahendzi ho no maa no, na ɔdze asɔfo no sisii hɔn gyinabew ama wɔaakyerɛkyerɛ nkorɔfo no, ma wɔatse na woehu Nyankopɔn ne mbrasɛm, na woekenyan hɔn ma wɔakaa nsew a woedzi no. Ɔpoon dɔmtutuw no, na wɔsanee kɔr hɔn efiefi dɛ mbrɛ hɔn ebusua ebusua no tse.

4 Na Mosiah besii n’egya n’ananmu na ɔhyɛɛ n’ahendzi no ase. Na ɔhyɛɛ n’ahendzi ase no nna oedzi mfe eduasa, na sɛ wɔkã ne nyinara bɔ mu a bɛyɛ mfe ahaanan eduoson esia fitsi ber a Lehi dze fii Jerusalem no.

5 Na ɔhen Benjamin tsenaa ase mfe ebiasa nna owui.

6 Na ɔbaa dɛ ɔhen Mosiah nantseew Ewuradze n’akwan mu, na ɔhwɛɛ n’atsɛmbu nye ne gyinabew yie, na odzii mbra biara a ɔhyɛɛ hɔn dɛ wondzi do no do.

7 Na ɔhen Mosiah maa no nkorɔfo no yɛɛ edwuma wɔ asaase no do. Na ɔnoara so yɛɛ edwuma wɔ asaase no do, amma ɔannyɛ adzesoadze annda no nkorɔfo do, ama aayɛ dɛ mbrɛ n’egya yɛe wɔ adze nyinara mu no. Na wentwiwentwi biara ennsi no nkorɔfo no mu bɛyɛ mfe ebiasa ntamu.