1 Na afei emi, Moroni, makyerɛw dza mekae dɛ wɔhyɛɛ me dɛ menkyerɛw no, na dza masɔw ano no makã akyerɛ wo; dɛm ntsi mma mmfa wo nsa nnkã dɛ erebɛkyerɛ ase; osiandɛ wɔabra wo wɔ dɛm adze no ho, kɛpem ber a Nyame noara bodua ne nyansa kwan mu ada no edzi.

2 Na hwɛ, wɔbɛma wo kwan ma edze mprɛtse no akyerɛ hɔn a wɔbɔboa wɔ dwumadzi yi mu;

3 Na wɔdze bɛkyerɛ baasa wɔ Nyankopɔn no tum do; dɛm ntsi wobohu dɛ ampa, dɛm ndzɛmba yinom yɛ nokwar.

4 Na adasefo baasa anomusɛm do na dɛm ndzɛmba yinom betsim; na baasa hɔn dasegye do, na wɔnam dɛm edwuma yi do bɛda Nyankopɔn no tum nye n’asɛm so edzi akyerɛ, na dza Egya no, nye Ɔba no, nye Sunsum Krɔnkrɔn gye ho dase—na iyi nyinara begyina hɔ dɛ dasegye etsia wiadze wɔ da a odzi ewiei no mu.

5 Na sɛ ɔba so dɛ wonu hɔnho na wɔba Egya no hɔ wɔ Jesus dzin mu a, wɔbɛgye hɔn akɔ Nyankopɔn n’aheman mu.

6 Na afei, sɛ minnyi tumdzi wɔ dɛm ndzɛmba yi ho a, hom ara mbua atsɛn; na hom bohu dɛ mowɔ tumdzi wɔ ber a hom bohu me no, na yebegyina Nyankopɔn n’enyim wɔ da a odzi ewiei no mu. Amen.