1 Babylon ho atsɛmbusɛm a Amoz ba Isaiah hunii.

2 Hom nsi frankaa wɔ bepɔw tsentsen no do, hom mma ndze do mma hɔn, hom nnyam nsa, ama wɔaakɛhɛn ekunyin mbotsen no mu.

3 Mahyɛ mo nkorɔfo a wɔatsew hɔnho no, nyew, mafrɛ me mbarimba akatakyi ama m’ebufuw, nnyi hɔ mma hɔn a wodzi mo tumdzi mu ehurusi no.

4 Nyimpa dodow hɔn dede wɔ mbepɔw no do dɛ gyama ɔman kɛse bi dze, aman ahendzi a wɔaboa ano ne gyigyeegye dede a! dɔm Ewuradze rotwe no dɔm aboa ano akɔkõ.

5 Wofi ekyirekyir asaase do, na ɔsor n’etsiwa mu no ho reba, nyew, Ewuradze na n’ebufuhyew akodze no a, dɛ ɔrebɛsɛɛ asaase no nyina.

6 Hom ntwa ewuo; na Ewuradze da no abɛn; ɔbɛba dɛ ɔsɛɛ a ofi Otumfo hɔ.

7 Dɛm ntsi nsa nyina bɛyɛ mberɛw na nyimpa akoma biara anan;

8 Na hɔn bo botu; nketsenketse nye awerɛhow bekitsa hɔn; ɔyaw bɛba hɔn do; obiara ne nyɛnko ho bɛyɛ no ahobow; hɔn enyim bɛyɛ gyaframee enyim.

9 Hwɛ Ewuradze ne da reba, etsirmɔdzen, nye ebufuw nye ebufuhyew, dɛ ɔrebɛyɛ asaase no afo, na ɔasɛɛ ndzebɔnyɛfo efi mu.

10 Na ɔsor nworaba nye hɔn nworaba ekuwekuw nnkɛma hɔn kan, ewia bɛhyɛ sum wɔ ne mfirii mu na bosoom so nnkɛma ne kan ahyerɛn.

11 Na mobɔtwe wiadzefo aso wɔ hɔn bɔn ntsi na emumuyɛfo wɔ hɔn emumuyɛ ntsi; na mama ntsɛntsɛnnyi ne ntsɛn abɔ adze, na mama ɔhoɔhunyi n’ahokyerɛ abrɛ adze.

12 Mebɛma nyimpa no ho asom bo asen sika mapã; ɔdasanyi bɛsen Ophir sika mpɔkowa mpo.

13 Dɛm ntsi, mebɛma ɔsorsor apopo na woeyi asaase efi ne sibea wɔ dɔm Ewuradze n’ebufuw no mu, na n’ebufuhyew da no mu.

14 Na ɔbɛba, dɛ ɔwansan a woritsiw no, na nguan a obi mmboa hɔn ano; na wɔbɛdandan hɔnho akokɔ hɔn nkorɔfo nkyɛn, na woeguanguan akokɔ hɔn asaase do.

15 Obiara a ɔyɛ ahantan no wobohwira no mu; na obiara a ɔdze noho abɔ emumuyɛfo ho no, ɔbɔtɔ afowa ano.

16 Na hɔn mbɔtowaba so mpo wɔdze hɔn bɔhwehwe famu atsetsew hɔn wɔ hɔn enyim; wɔbɔdodɔ hɔn efiefi asɛɛsɛɛ ndzɛmba na hɔn yernom dze wɔbogu hɔnho fi.

17 Hwɛ, mebɛhyɛ Mediafo tsirmu metsia hɔn, hɔn a wonnkobu dwetɛ bi, na sika dze, wɔnnkɛfa mu enyika.

18 Hɔn ngyen bɛtsetsew mberantsɛ mu esinesin, na worinnya yafun mu aba tsimbɔbɔr; hɔn enyi bɛsã mbofraba.

19 Na Babylon, ahendzi horow mu enyimnyamfo, Chaldeafo hɔn ahopɔw n’ahoɔfɛw no, ɔbɛyɛ dɛ ber a Nyame butuuw Sodom na Gomorrah no.

20 Wɔrenntsena mu ara da, eso wɔrenntsena ofi ebusuasantsen kesi ebusuasantsen; eso Arabnyi nnkesi ne ntamadan wɔ hɔ, eso nguanhwɛfo nnkɛma hɔn nguanban ebutuw hɔ.

21 Mbom sar do mbowa abɔyafo na wɔbɛdeda hɔ, na mpatu ebusufo bɛhyehyɛ hɔn adan amaama na nsohor bɛtsena hɔ, na satyrfo asaw wɔ hɔ.

22 Na mbowa abɔyafo a wɔwɔ nsupruw do no bosu wɔ hɔn amamfõ efiefi, na abowa bɔyafo wɔ hɔn enyigye ahemfi; na ne mber abɛn, na ne da nnkɛkyɛr ba. Na mebɛsɛɛ no ntsɛntsɛm; nyew, osiandɛ mubohu me man mbɔbɔr, na mbom emumuyɛfo bɛhera.