1 Mbom hwɛ, emi Jacob, mebɛkasa akyerɛ hom a hom akoma mu tsew. Hom mfa adwen a osi pi nhwɛ Nyame, na hom mfa gyedzi mbordo mbɔ mpaa mma no, na ɔbɛkyekye hom werɛ wɔ hom amandzehu mu, na obedzi hom nsɛm ama hom, na ɔdze pɛrpɛr atsɛmbu aba hɔn a wɔhwehwɛ asɛɛ hom no do.

2 O hom a hom akoma mu tsew nyina, hom mma hom tsir do na hom ngye Nyankopɔn n’asɛm a ɔyɛ enyigye no, na hom mmee wɔ no dɔ mu; na sɛ hom adwen si pi afebɔɔ a hom botum ayɛ.

3 Mbom, wondue, wondue, nkã hɔn a hɔn akoma mu nntsew, dɛ wɔyɛ efĩfĩdze ndɛ da yi wɔ Nyame enyim; na gyedɛ hom nu homho annyɛ dɛm a wɔbɔdom asaase no wɔ hom ntsi; na Lamanfo no a, wɔnnyɛ efĩfĩdze dɛ mbrɛ hom tse no, naaso wɔdze ndom a ɔyɛ dzen akã hɔn no, bɔhwe hom mbaa dze akɔ ɔsɛɛ mu.

4 Na mber no reba ntsɛm, dɛ gyedɛ hom nu homho annyɛ dɛm a wɔbɛfa hom egyapadze asaase no, na Ewuradze Nyankopɔn beyi atseneneefo no efi hom mu akɔ.

5 Hwɛ, hom nuanom Lamanfo no a, hom kyir hɔn osian hɔn efĩfĩdze na ndom a wɔdze adom hɔn wer no ntsi, yɛ atseneneefo koraa sen hom; osiandɛ hɔn werɛ mmfir Ewuradze ne mbrasɛm no, dza wɔdze maa hɛn egya no—dɛ wonya yer kor, na nwewee dze mma wɔmmfa bi koraa, na mma wɔmmbɔ edwaman wɔ hɔn mu.

6 Na afei, dɛm mbrasɛm yi wɔhwɛ na wodzi do; dɛm ntsi, osiandɛ wɔhwɛ na wodzi mbrasɛm yi do ntsi, Ewuradze Nyankopɔn rennsɛɛ hɔn, mbom obohu hɔn mbɔbɔr; na da bi wɔbɛyɛ nhyira mba.

7 Hwɛ, hɔn kunnom dɔ hɔn yernom, na hɔn yernom dɔ hɔn kunnom; na hɔn kunnom na hɔn yernom dɔ hɔn mba; na hɔn ekyingye na hɔn tan a ɔwɔ hom ho no fir hɔn egyanom hɔn emumuyɛ; dɛm ntsi ɔyɛ dɛn na hom ye sen hɔn, wɔ hom Bɔadze kɛse no enyim?

8 O mo nuanom, musuro dɛ gyedɛ hom nu homho fi hom bɔn ho annyɛ dɛm a hɔn wer bɔhoa asen hom dze, sɛ wɔdze hom beenu nyina ba Nyankopɔn n’ahengua no enyim a.

9 Dɛm ntsi mbrasɛm a medze ma hom yi a ɔyɛ Nyankopɔn n’asɛm, dɛ mma hom nnkasa bɔn nntsia hɔn bio osian hɔn wer a obir no ntsi, eso mma hom nnkasa bɔn nntsia hɔn osian hɔn efĩfĩdze ntsi; mbom hom nkaa homankasa hom efĩfĩdze, na hom nkaa dɛ ɔnam hɔn egyanom do na wonyaa dɛm efĩfĩdze no.

10 Dɛm ntsi, hom nkaa hom mba, dɛ mbrɛ hom ama woedzi yaw wɔ hɔn akoma mu osian ɔbra bɔn a hom abɔ akyerɛ hɔn ntsi; na hom nkaa so dɛ, osian hom efĩfĩdze ntsi hom dze hom mba bɛba ɔsɛɛ mu, na wɔdze hɔn bɔn bogu hom etsifi wɔ da a odzi ewiei no mu.

11 O mo nuanom, hom ntsie me nsɛm; hom nkenyan hom akra; hom nkeka homho ama hom eenyan efi nkom a hom rotɔ wɔ owu mu no; na hom ntwe homho mfi hɛl yaayaw no mu amma hom ammbɛyɛ abɔnsam n’abɔfoe, mma wɔanntow hom annkyen ogya baka na brimstone no a ɔyɛ owu mprɛnu no mu.

12 Na afei emi, Jacob, mekãa nsɛm pii kyerɛɛ Nephi no nkorɔfo no, bɔɔ hɔn kɔkɔ wɔ ndwamanbɔ na ntantan bra na bɔn ahorow nyinara ho, me kãa mbusu a odzi iyinom ekyir kyerɛɛ hɔn.

13 Na nkorɔfo yi hɔn ndzeyɛɛ no, sɛ wɔkyɛ mu ɔha a no mu kor mpo dɔɔ so araa ma worunntum nnkyerɛw wɔ dɛm mprɛtse yinom do; mbom hɔn ndzeyɛɛ no mu dodowara wɔakyerɛw wɔ mprɛtse akɛse no do, dza ɔfa hɔn akõkoekõ, na wentwiwentwi ahorow, na hɔn ahemfo hɔn ahendzi mu nsɛm ho.

14 Dɛm mprɛtse yinom wɔfrɛ no Jacob mprɛtse, na Nephi dze ne nsa yɛe. Na medze me nsɛm yi aba ewiei.