1 Na afei ɔbaa dɛ ber a Ammon no nkorɔfo no hɔn ase gyee wɔ Jershon asaase do, na wɔkyekyeer asɔr so wɔ Jershon asaase do, na Nephifo hɔn nsordaafo no bɔɔ Jershon asaase ho ban, nyew, nye mbea nyina a etwa Zarahemla asaase ho ehyia no; hwɛ Lamanfo hɔn nsordaafo no tsiiw hɔn enuanom no kɔr sar no do.

2 Na dɛm maa ɔkõ dzendzen bi sii hɔ; nyew, dza ɔtse dɛm yi bi nnsii wɔ nyimpa nyinara mu da wɔ asaase no do fi ber a Lehi dze fii Jerusalem; nyew, na Lamanfo no hɔn mu ɔpepe du na wokum hɔn petsee mbeambea.

3 Nyew, na wokum Nephifo no so hɔn mu pii; naaso wɔpaam Lamanfo no, bɔɔ hɔn petsee, na Nephifo no saan hɔn ekyir bio kɔr hɔn asaase do.

4 Na afei aber yi mu no wɔtsee nkrumsi nye kwadwom twa kɛse wɔ Nephifo nyinara mu wɔ asaase no do—

5 Nyew, ekunafo a worusũ ma hɔn kunnom, nna egyanom a worusũ ma hɔn mbabanyin, nna akyerɛbaa dze rema no nuabanyin, nyew, onuabanyin dze rema n’egya; na dɛm na ɔmaa wɔtsee nkrumsi wɔ hɔn nyinara hɔn mu, wosũi dze maa hɔn ebusuafo a woekuku hɔn no.

6 Na afei nokwar, dɛm da no yɛɛ awerɛhow da; nyew, awerɛhow mber, mber a wɔdze faa akɔnkye na wɔbɔɔ mpaa kɛse.

7 Na dɛm na atsɛmbuafo a wɔhwɛ Nephi no nkorɔfo do no hɔn afe a otsĩa duenum no dze baa ewiei.

8 Na iyi nye nsɛm a ɔfa Ammon nye n’enuanom ho, dza ɔfa hɔn akwantu nyina ho wɔ Nephi asaase do, nye hɔn haw wɔ asaase no do hɔ, hɔn awerɛhow nye hɔn amandzehu nye hɔn enyigye a onnyi kabea, na mbrɛ wosii gyee enuanom no dwudwoodwo dze hɔn kɔr Jeshon asaase do. Na afei Ewuradze no a ɔyɛ adasa nyina hɔn Pomfo no nhyira hɔn akra afebɔɔ.

9 Na iyi nye dza ɔfa akõkoekõ na wentwiwentwi a osii Nephifo mu, nye akodzi so a osii Nephifo nye Lamanfo ntamu no; na atsɛmbuafo no hɔn afe a otsĩa duenum no aba ewiei.

10 Na ofi afe a odzi kan no dze kesi duenum no mu no akra mpempem na wɔsɛɛ hɔn; nyew, bɔgyaka pii na osii.

11 Na mpempem hɔn efun na ɔkɛhyɛɛ asaase mu, na mpempem pii so efun aboa ano ayɛ esiw wɔ asaase enyi no bɔɔ etur; nyew, na mpempem pii so na wosũi maa hɔn ebusuafo a wɔayew hɔn, na osiandɛ Ewuradze abɔ anohoba dɛ oegyaa hɔn mu ama mbusu a onnyi ewiei tsebew mu ntsi iyi abɔ hɔn hu.

12 Ber a mpempem binom rusũ nokwar mu ma hɔn ebusuafo a wɔayew no, nna woridzi dɛw so wɔ enyidado a wɔwɔ, na wonyim so dɛ Ewuradze n’anohoba kyerɛ mpo dɛ, wobenyan hɔn ma wɔaakɛtsena Nyankopɔn n’abanyimfa wɔ enyigye tsebew a onnyi ewiei da mu.

13 Na dɛm ma yehu nsonsonee wɔ nyimpa mu osian bɔn nye mbrato ntsi, nye abɔnsam no tum a ɔnam ndabraba nhyehyɛɛ a ɔayɛ do dze sua nyimpa hɔn akoma efir ntsi.

14 Na dɛm ma yehu ɔfrɛ kɛse dɛ nyimpa bɛyɛ edwuma wɔ Ewuradze ne wenyin ture enyimpi mu; na dɛm kyerɛ hɛn ma yehu mbrɛ awerɛhow tse, na mbrɛ enyigye so tse—awerɛhow ba osian owu nye ɔsɛɛ a osi nyimpa mu ntsi, na enyigye so ba osian Christ ne kan a ɔma nkwa no ntsi.