Nkɔnhyɛnyi Joseph Smith ne Dasegye
Nkɔnhyɛnyi Joseph Smith nankasa n’anomusɛm a ɔfa mbrɛ Mormon Nwoma no sii bae ho:
“Fankwa ne da a otsĩa eduonu-biako [1823] n’ewimbir no … Morobɔ mpaa na morotɔtɔ serɛ Otumfo Nyankopɔn. …
“Aber a mugu do robɔ mpaa ma Nyame no, muhun kan bi dɛ orupue me dan no mu, na ɔkɔr do hyerɛnee araa kɛpeem dɛ dan no mu yɛɛ kann kyɛn ewiaber mpo. Annkyɛr na nyimpa-su bi puee me mpa ne nkyɛn, nna ɔsensɛn hɔ a ne nan nnkã famu.
“Ɔhyɛ bataker fufuw bi a ɔhoa kyɛn adzefufuw biara a mehu no wɔ asaase yi do pɛn; na menngye nndzi dɛ biribi wɔ asaase yi do a wobotum ayɛ ma ahoa na ahyerɛn dɛm. Ne nsaho na n’abasa, fitsi ne nsakɔn dze kɔ sor kakra no da hɔ kwa a biribiara nnkata ho. N’anamɔn na ne nanho so da hɔ kwa, n’anan pɔw dze kɔ sor kakra no so da hɔ kwa. Ne tsir na no kɔn ho so da hɔ kwa. Muhun dɛ ɔnnhyɛ atar biara bio ka bataker no ho osiandɛ nna no mu ebue ma mutumii hun n’akoko.
“Nnyɛ n’atar no nko na ɔhoa mbordo, mbom ɔnoara so mbrɛ noho si hyerɛn no ano nnkotum akyerɛkyerɛ mu, na no hwɛbea hyerɛn dɛ enyinam. Dan no mu hyerɛnee na mbom nna ɔnnto kan a etwa ne nyimpadua no ho ehyia no. Muhun no ahyɛse no suro kitsaa me, mbom annkyɛr na suro no fii hɔ ntsɛmara.
“Ɔdze me dzin frɛɛ me na ɔsee dɛ ɔyɛ ɔbɔfo a wɔsomaa no fii Nyame nkyɛn dɛ ɔmbra mo hɔ, na wɔfrɛ no Moroni; na Nyame wɔ dwumadzi bi dze ma me; na aman ebusuafo na kasa horow nyina mu no binom bɛkã dza oye wɔ me dzin ho na binom so akã dza omuo so. Dza ɔkyerɛ nye dɛ nyimpakuw ahorow nyina mu no binom bɔbɔ me dzin pa na binom so abɔ me dzin bɔn.
“Ɔsee me dɛ wɔdze nwoma bi a wɔakyerɛw no wɔ sika mprɛtse do esie. Na nwoma no kã tsetse nkorɔfo a wɔtsenaa asaase tɔw yi do na bea a wofi baa ho asɛm. Ɔsee bio dɛ Asɛmpa ne mãhyɛ a ɔwɔ hɔ daapem no a Agyenkwa no dze maa tsetsemba no wɔ nwoma no mu.
“Bio so dɛ, wɔdze abo ebien a ogu dwetɛ egyen mu akã mprɛtse no ho esie—na wɔdze afam akatabo ho, na wɔfrɛ hɔn Urim na Thummim—na dɛm abo yi na hɔn a wɔwɔ no ɔboaa wɔ tsetseberdo anaa nkaano no ma wɔyɛɛ ‘adzehufo’, na Nyankopɔn yɛɛ iyi kãa ho ama wɔdze aakyerɛ nwoma no ase. …
“Bio, ɔsee me dɛ, sɛ me nsa kã mprɛtse a ɔakã ho asɛm no a—na ber no nnyaa nnsõe a ɔdze bɛma me—mma memmfa nnkyerɛ obiara; ɔno nye akatabo nye Urim na Thummim no; kã nkorɔfo a ɔbɛhyɛ me dɛ memfa nkyerɛ hɔn no nko ho; sɛ meyɛ a wɔbɛsɛɛ me. Ber a ɔnye me rotwetwe mprɛtse no ho nkɔmbɔ no, wobuee enyido-adzehu no wɔ m’adwen mu ma muhun bea pɔkyee a mprɛtse no hyɛ, dɛm ntsi ber a mokɔr bea no do no muhunii.
“Ɔkãa dɛm ndzɛmba yinom kyerɛɛ me ekyir no, muhun dɛ kan a ɔwɔ dan no mu no rotwe bɛn ne nyimpadua no. Ɔkɔr do yɛɛ dɛmara kɛpeem aber a dan no mu yɛɛ sum dɛ mbrɛ ɔtse dada no kã dza oetwa ehyia noho no nko; nna awerɛfir mu ara muhun dɛ, ma ɔyɛ dɛ, kwan bi ebue wɔ sor, na ɔfaa mu kɔree a mennhu no bio. Iyi ekyir no, dan no mu yɛɛ sum dɛ mbrɛ ɔtse wɔ ber a kan a ofi sor no mmpuee hɔ no.
“Medaa hɔ komm dwendween anwanwadze kɛse a osii na nsɛm a ɔsomafo nwanwanyi no kãa kyerɛɛ me no ho; ber a mugu do rodwendwen no, awerɛfir mu ara muhun dɛ me dan no mu ahyɛ ase reyɛ kann bio. Annkyɛr koraa na muhun dɛ dɛm ɔsomafo a ofi sor no gyina me mpa ne nkyɛn bio.
“Ɔhyɛɛ ase bio kãa dɛm asɛm kor no ara a ɔkãa no ahyɛse no kyerɛɛ me, a ɔannsesã biribiara. Ɔno ekyir, ɔkãa atsɛmbu kɛse a ɔreba asaase yi do ɔnam ɔkɔm na akõkoekõ na ahokyer dze amamfoyɛ kɛse bɛba ho asɛm kyerɛɛ me; na dɛm atsɛmbu kɛse yi bɛba asaase yi do wɔ dɛm mbasantsen yi do. Ɔkãa iyinom kyerɛɛ me ekyir no, ɔfowee kɔr sor dɛ mbrɛ ɔyɛɛ no ahyɛse no.
“Dɛm aber yi nsɛm no tɔɔ m’adwen do ara ma nda efi m’enyiwa mu. Dza mehu na matse no maa medaa hɔ ahobow mu. Na dza ɔyɛɛ me ahobow kɛse mpo nye dɛ muhun dɛ ɔsomafo kor no ara wɔ me mpa nkyɛn na metsee dɛ orisi nsɛm a ɔkãa kyerɛɛ me no do bio. Ɔbɔɔ me kɔkɔ dɛ Satan bɛpɛ dɛ ɔsɔ me hwɛ (ɔnam dɛ m’egya n’ebusua yɛ abɔbɔfo ntsi) ama maagye mprɛtse no dze enya mo ho. Ɔbɔɔ me kɔkɔ dɛ mma minnya adwen fofor biara wɔ mprɛtse no ho kã dɛ medze bɛhyɛ Nyame enyimnyam, na mma memmfa botae biara nnsi m’enyi do kã n’ahenman ne nkyekyeree ho, annyɛ dɛm a me nsa rennkã.
“Ne mpɛn a otsĩa ebiasa ekyir no, ɔfowee kɔr sor bio dɛ mbrɛ ɔyɛɛ no ahyɛse no na ɔkaa monko a nna meda hɔ rodwendwen anwanwadze a mehu no seseiara no ho. Ɔsomafo no fowee fii me nkyɛn ne mpɛn a otsĩa ebiasa no annkyɛr koraa na akokɔ bɔnee na muhun dɛ adze akye, iyi kyerɛɛ dɛ hɛn kokoa mu mpɛnsampɛnsamu no gyee hɛn anafua no nyinara.
“Ɔyɛɛ kakra no, mosoɛree wɔ me mpa do, na, dɛ mbrɛ ɔtse no, mokɔr me daadaa dwumadzi do; mbom ber a mobɔɔ mbɔdzen dɛ mereyɛ edwuma dɛ mbrɛ meyɛ no dada no, muhun dɛ mayɛ mberɛw na dɛm ntsi menntum annyɛ hwee koraa. M’egya a menye no reyɛ edwuma no hun dɛ biribi rehaw me, na ɔsee me dɛ monkɔ fie. Mefaa kwan dɛ morokɔ fie; mbom aber a mehyɛɛ ase dɛ morofow ban a wɔdze agye haban a yɛwɔ mu no ho no, m’ahom nyina pae na mohwee famu a munntum nkekã moho na m’enyi do siiw me mber kakra.
“Adze a odzi kan a mekaa nye ndze a ɔrekasa kyerɛ me na ɔdze me dzin refrɛ me. Memaa m’enyi do wɔ sor na muhun ɔsomafo kor no ara dɛ ogyina m’etsifi na kan etwa noho ehyia dɛ mbrɛ muhun no ahyɛse no. Ɔsanee sii nsɛm a ɔkãa no anafua no nyinara do. Ɔhyɛɛ me dɛ monkɔ m’egya hɔ na menkɛkã enyido-adzehu na mbrasɛm no a menya no nkyerɛ no.
“Midzii do. Mesanee kɔr m’egya hɔ wɔ haban no mu kɛkãa dza ɔfa nyikyerɛ no ho nyinara kyerɛɛ no. Obuaa me dɛ ofi Nyame na ɔsee me dɛ monkɔ nkɛyɛ dza ɔsomafo no ahyɛ me dɛ menyɛ no. Mifii haban no mu na mokɔr bea no a ɔsomafo no akã akyerɛ me dɛ mprɛtse no hyɛ no. Ɔnam dɛ enyido-adzehu a menya no yɛ pefee ntsi, ber a mudur hɔ ara nna muhunii.
“Koko a ɔsõ ara yie bi si Manchester ekuroba a ɔwɔ Ontario mansin a ɔwɔ New York mu no nkyɛn. Ɔno nye koko a ɔwar kyɛn akoko a ɔwɔ bea no do nyina. Mprɛtse no wɔ ɔbo adaka mu hyɛ ɔbo kɛse bi ase wɔ dɛm koko yi n’anee afamu wɔ bea a odzi kɔ no sor no ne finimfin yɛ kɛse na no sor yɛ korkorba. Odzi kɔ ne nkyɛnkyɛn no yɛ tseatseaba na dɛtse akata do ma dɛm ntsi odzi kɔ ne finimfin no nko na opue sor.
“Modwurudwuruuw dɛtse no wiei no, mohwehwɛɛ poma bi dze hyɛɛ boba no ase. Medze ahoɔdzen kakra ara maa bobaa no do kɔr sor. Mohwɛɛ adaka no mu na nokwar muhun mprɛtse, Urim na Thummim no na akatabo no dɛ mbrɛ ɔsomafo no akã no ara pɛr. Adaka a ɔwɔ mu no wɔatow abo dze dza ɔfam ayɛ. Wɔdze abo ebien abeabea adaka no ase. Dɛm abo ebien yi do na mprɛtse no na ndzɛmba nkaa no gu.
“Mobɔɔ mbɔdzen dɛ mibeyi mprɛtse no epue na ɔsomafo no amma me kwan. Ɔsee me bio dɛ mber nnsõe a medze pue, nna nnyɛ n’aber nye no gyedɛ mfe anan etwa mu ana; mbom ɔsee me dɛ afrenhyia pɛpɛɛpɛr mensan mbra koko no ho na obehyia me wɔ hɔ; na dɛ menyɛ dɛm afe biara nkɛpem dɛ aber bɔsõ ma me nsa akã mprɛtse no.
“Afe biara ewiei no mokɔr koko no ho dɛ mbrɛ ɔhyɛɛ me no; mihyiaa dɛm ɔsomafo kor no ara wɔ hɔ na aber biara minyaa nkyerɛkyerɛ na nyimdzee fii no hɔ wɔ kokoa mu mpɛnsampɛnsamu kor biara mu no, ɔkãa dza Ewuradze rebɛyɛ, na mbrɛ obesi ahyehyɛ n’ahendzi wɔ nda a odzi ekyir no mu. …
“Afei ber a ɔwɔ dɛ me nsa kã mprɛtse, Urim na Thummim na akatabo no sõe. Fankwa ne da a otsĩa eduonu-ebien, wɔ afe apem aha awɔtwe eduonu esuon mu no mokɔɔr bea no a ndzɛmba no hyɛ no, dɛ mbrɛ afe biara meyɛ no, na dɛm ɔsomafo kor no ara a ofi sor no dze maa me, nye bɔhyɛ yi: dɛ noho asodzi da mo do; na sɛ mannhwɛ no yie ma ɔyew anaa mubu enyi gu do a, Ewuradze botwa me akyen; mbom sɛ mobɔ mbɔdzen biara a mobotum dze sie kɛpem aber a ɔno ɔsomafo no bɛba abɛgye a, ɔno Ewuradze bɔkora do.
“Annkyɛr biara na muhun siantsir a ɔnam do ma ɔsomafo no hyɛɛ me dzendzenndzen dɛ monhwɛ mprɛtse no do yie no, na siantsir a ɔmaa ɔsee dɛ sɛ muwie dza wɔdze ahyɛ me nsa dɛ menyɛ no a ɔbɛba abɛgye akɔ no. Nkorɔfo tsee dɛ mprɛtse no wɔ mo hɔ no ara, wɔbɔɔ mbɔdzen biara a wobotum dɛ wɔbɛgye efi me nkyɛn. Enyitsew kwan biara a nyimpa fa do a nsa kã a ɔbɛyɛ yie biara no wɔfaa do. Afei atseetsee no yɛɛ yaayaw kyɛɛn ma nkyɛ ɔtse no, na dɔmtutuw yɛɛ krado dabiara dɛ wɔbɛgye efi mo hɔ. Mbom ɔnam Nyame ne nyansaa do, ɔkaa me nsamu dwodwoodwo, kodur dɛ muwiee dza wɔdze hyɛɛ me nsa dɛ menyɛ wɔ ho no. Dɛ mbrɛ nhyehyɛɛ no tse no, ɔsomafo no bae ma medze sanee maa no, na ɔwɔ ne nkyɛn bodu ndɛ a ɔyɛ Esusow Aketseaba ne da a otsĩa ebien wɔ afe 1838 mu yi.”
Ama enya nkyerɛwee yi n’emudzi no, hwɛ Joseph Smith—Abakɔsɛm a ɔwɔ Bota a Ɔsom Bo Mapã no mu.
Tsetseberdo kyerɛwsɛm a woyii fii asaase mu dɛ nyimpa dodow hɔn ndze awɔrekasa fi huntuma mu no, na wɔnam Nyankopɔn n’akyɛdze na no tum do kyerɛɛ ase kɔr nkyirmba hɔn kasaa mu na wɔnam Nyame ahoɔdzen do edzi ho dase no; wodzii kan dze puee wiadze wɔ Borɔfokasa mu dɛ The Book of Mormon wɔ afe 1830 mu.